ކުޅުދުއްފުށީ ގައި އޮކްސިޖަން ޕްލާންޓް ބަހައްޓާ އިމާރާތުގެ މަސައްކަތް ބަޔަކާއި ހަވާލުކޮށްފި
27 މެއި 2020 | ބުދަ 03:30ސީޓީ ސްކޭނާއި ކާޑިއެކް ސެންޓަރުގެ ހިދުމަތް ވަނީ މިދިޔަ އަހަރު ފަށާފައި
ކުޅުދުއްފުށީ ރީޖަނަލް ހޮސްޕިޓަލް: ދުވަލެއްގެ މައްޗަށް 300 ށް ވުރެ ގިނަ މީހުން މި ހޮސްޕިޓަލުން ފަރުވާ ހޯދާ
ކުޅުދުއްފުށި ސިޓީގެ، ރީޖަނަލް ހޮސްޕިޓަލުގައި ބެހެއްޓުމަށް ހަަމަޖެހިފައިވާ މެޑިކަލް އޮކްސިޖަން ޕްލާންޓް، ބަހައްޓާ އިމާރާތް ކުރުމުގެ މަސައްކަތް ބަޔަކާއި ހަވާލުކޮށްފި އެވެ.
33 ދުވަހުގެ ތެރޭގައި މި މަސައްކަތް ނިންމުމަށް ހަވާލުކޮށްފައި ވަނީ ކަލެކްޓިން ކޮމްޕެނީ ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާއި އެވެ. މި މަސައްކަތަށް 462,297.75 (ހަތަރު ލައްކަ ފަސްދޮޅަސް ދެ ހާސް ދުއިސައްތަ ނުވަދިހަ ހަތް ރުފިޔާ ހަތްދިހަ ފަސް ލާރި) ޚަރަދުވާނެ ކަމަށް ހޮސްޕިޓަލުން މައުލޫމާތު ދެއެވެ.
އެ އޮކްސިޖަން ޕްލާންޓް ބަހައްޓަނީ، މޯލްޑިވްސް ގޭސްގެ ފަރާތުންނުވެ. ހޮސްޕިޓަލުގެ މެނޭޖަރ އަހްމަދު ދާއޫދު ރާއްޖެ.އެމްވީ އަށް ވިދާޅުވީ، އޮކްސިޖަން ޕްލާންޓް ބެހެއްޓުމުން ވަރަށް ބޮޑެތި ލުއި ފަސޭހަތަކެއް ލިބިގެން ދާނެ ކަމަށެވެ. އަދި ހޮސްޕިޓަލުން އޮކްސިޖަން އަށް ކުރާ ޚަރަދު ވެސް ވަރަށް ބޮޑަށް ކުޑަވެގެން ދާނެ ކަމަށެވެ.
ރާއްޖޭގެ ސިއްހީ މަރުކަޒުތަކާއި ހޮސްޕިޓަލުގައި ބޭނުން ކުރަނީ އޮކްސިޖަން ސިލިންޑަރެެވެ. އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)، ދަރުމަވަންތަ، އޭޑީކޭގެ އިތުރުން ޓްރީޓޮޕް ހޮސްޕިޓަލުގައި ދެމުންދާ އޮކްސިޖަން އަކީ، އޮކްސްިޖަން އުފައްދާ މެޝިން ބޭނުން ކޮށްގެން އުފައްދާ އޮކްސިޖަން އެވެ.
ކުޅުދުއްފުށީ ހޮސްޕިޓަލުގައި މެޑިކަލް އޮކްސިޖަން ޕްލާންޓް ބެހެއްޓުމަށް ބަޔަކާއި ހަވާލުކޮށްފައި ވާއިރު، ހޮސްޕިޓަލުން ދެމުންދާ ޚިދުމަތް އިތުރަށް ފުޅާކުރުމުގެ ގޮތުން ސީޓީ ސްކޭނާއި ކާޑިއެކް ސެންޓަރުގެ ޚިދުމަތް ވަނީ މިދިޔަ އަހަރުގެ އޮކްޓޫބަރު މަހު ރަސްމީކޮށް ފަށާފަ އެވެ. ސީޓީ ސްކޭން އަދި ކާޑިއެކް ސެންޓަރަކީ ސަރުކާރުން ތަރައްގީ ކުރުމަށް ނިންމާފައިވާ ޓަރޝަރީ 5 ހޮސްޕިޓަލް ގެ މަޝްރޫއުގެ ދަށުން ހިމެނޭ ކަމެކެވެ.
ހޮސްޕިޓަލުގެ ތަފާސް ހިސާބުތައް ދައްކާ ގޮތުން، އެވްރެޖްކޮށް 305 ބަލި މީހުން ހޮސްޕިޓަލުން ޚިދުމަތް ހޯދަ އެވެ. މީގެ ތެރޭގައި ހިމެނެނީ ހދ، ހއ އަދި ށ އަތޮޅު މީހުންނެވެ.
