ދިވެހިރާއްޖޭގެ މަސްވެރިކަމުގެ ޤާނޫނުގެ ދަށުން ހެދުމަށް ލާޒިމު ކޮށްފައިވާ ގިނަ ޤަވާއިދުތައް ހެދުމަށްވުރެ އިސްކަމެއްދިނީ މަސްވެރިކަމާއި ގުޅިގެން ޔޫރަޕިއަން ޔޫނިއަން (އީޔޫ) އިން ދީފައިވާ ރެކޮމެންޑޭޝަންގެ މަސައްކަތްތައް ނިންމުމަށް ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެ އެވެ.
ރާއްޖެޓީވީގެ ކޮވިޑް-19 ކަވަރޭޖަށް ދެއްވި ޚާއްސަ އިންޓަރވިއުއެއްގައި މިނިސްޓަރ ވިދާޅުވީ ރާއްޖޭގައި ގަވާއިދާ ޚިލާފަށް ކުރެވޭ މަސްވެރިކަމާއި ގުޅިގެން އީޔޫއިން ރެކޮމެންޑޭޝަންތަކެއް ދީފައިވާ ކަމަށެވެ. އަދި ގާނޫނުގެ ދަށުން ހަދަން ޖެހޭ ގަވާއިދުތައް އެކުލަވާލުމަށްވުރެ އެ މަސައްކަތް ނިންމުމަކީ މާ މުހިއްމު ކަމެއް ކަމަށް ދެކިވަޑައިގަންނަވާ ކަމަށް ވިދާޅުވި އެވެ.
އޭރު އަޅުގަނޑުމެންގެ ކަމަކަށް އޮތީ ޔޫރަޕިއަން ޔޫނިއަނުން 2015 ވަނަ އަހަރުއްސުރެ ފެށިގެން ދިވެހިރާއްޖޭގެ މަސްވެރިކަމުގައި ހުރި ކުރެވޭ ބައެއް ކަހަލަ ގާނޫނާއި ގަވާއިދާއި ޚިލާފަށް ކުރެވޭ މަސްވެރިކަމަކަށްވާތީ އަޅުގަނޑުމެންނަށް ވަރަށް ގިނަ ރެކޮމެންޑޭޝަންތަކެއް ވޭ ކަނޑައަޅާފައި. އަޅުގަނޑުމެންގެ އިސްކަމަކަށްވީ މި މަސައްކަތްތައް އަޅުގަނޑުމެން ނިންމުން.މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު
މިނިސްޓަރ މިހެން ވިދާޅުވެފައިވާއިރު މަސްވެރިކަމުގެ ޤާނޫނުގެ ދަށުން ހެދުމަށް ލާޒިމު ކޮށްފައިވާ ގިނަ ޤަވާއިދު ޤަވާއިދުތައް 90 ދުވަހުގެ ތެރޭގައި ނިންމުމަށް ޤާނޫނުގައި ބުނެފައި ވެއެވެ.
ޒަހާ ވިދާޅުވީ އީޔޫގެ ރެކޮމެންޑޭޝަންގެ މަސައްކަތްތައް ނުނިންމައިފި ނަމަ ރާއްޖެއިން އެއްވެސް ވަރަކަށް މަހެއް އެކްސްޕޯޓު ނުކުރެވޭނެ ކަމަށެވެ. އަދި 'އެތެރޭގެ' ގަވާއިދުތަކެއް އެކުލަވާމުމަށްވުރެ މިވަގުތަށް މުހިއްމުވީ މަސްވެރިކަމުގެ ސިނާއަތަށް ކުރާނެ އަސަރުތަކުން ގައުމު 'ސަލާމަތް ކުރުމަށް' ކަމަށެވެ. ގަވާއިދު އެކުލެވޭނެ ތާރީހަކާއި ގުޅިގެން މިނިސްޓަރ ވިދާޅުވީ މިމަސް ނިމެންވާއިރަށް ގަވާއިދުތައް ހެދިގެންދާނެކަމަށް ގަބޫލު ކުރައްވާކަމަށެވެ.
މަސްވެރިކަމުގެ ޤާނޫނުގެ ދަށުން ހެދުމަށް ލާޒިމު ކޮށްފައިވާ ގިނަ ޤަވާއިދު ތަކެއް ޤާނޫނުގައި ބަޔާންކޮށްފައިވާ މުއްދަތުގައި ނިންމިފައިނުވާތީ ރައްޔިތުންގެ މަޖިލީހުގެ ޤަވާއިދު ކޮމެޓީން މިނިސްޓަރ ޒަހާ ވަހީދު މަޤާމުގެ މަސްއޫލިއްޔަތު އަދާ ނުކުރައްވާ ކަމަށް ނިންމާފަ އެވެ.
މަސްވެރިކަމުގެ ޤާނޫނުން މިނިސްޓަރ ޒަހާ ވަހީދަށް މަތިކޮށްފައިވާ މަސްއޫލިއްޔަތު އަދާކުރުމަށް ޤަނޫނުގައި ކަނޑައަޅާފައިވާ މުއްދަތުގައި އަދާނުކުރެއްވުމުގެ ސަބަބުން އަދި އެ މުއްދަތު ފަހަނައަޅާ ދިޔަ ފަހުން، މިއަދާ ހަމައަށް ވެސް އެ މަސްއޫލިއްޔަތު އަދާކުރައްވާފައި ނުވާތީ، މިނިސްޓަރ ޒަހާ ވަހީދު ދިވެހިރާއްޖޭގެ މަސްވެރިކަމުގެ ޤާނޫނާ ޚިލާފުވެ ވަޑައިގަންނަވާފައިވާ ކަމަށް ކޮމެޓީގެ ނިންމުމުގައި ވެއެވެ.
އެމްޑީޕީގެ "އެޖެންޑާ 19"ގައި މަސްވެރިކަން އިތުރަށް ތަރައްޤީކޮށް، ކުރިއެރުވުމަށް ގިނަ ކަންތައްތަކެއް ހިމަނާފައި ވެއެވެ. އަދި ސަރުކާރުގެ ވަޢުދުތަކުގެ ތެރޭގައި ވެސް މިކަންކަން ހިމެނެ އެވެ.
