ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ފެސިލިޓީތަކާ ބެހޭ ގޮތުން ރަނގަޅު ކުރުމަށް އަންގާފައިވާ އެންގުންތައް ބަލައިގަންނަ ކަމަށާއި، އެކަންކަން ރަނގަޅު ކުރުމުގެ މަސައްކަތްތައް ކުރާ ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވެއްޖެ އެވެ.

ހޯމަ ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ އެޗްއާރްސީއެމުން ރަނގަޅު ކުރުމަށް ފާހަގަކޮށްފައިވާ ކަންކަން ރަނގަޅު ކުރުމުގެ މަސައްކަތްތައް ކުރިއަށްދާނެ ކަމަށާއި، މިހާރު މަޝްވަރާތައް ކުރަމުންދާ ކަމަށެވެ.

އެގޮތުން އެތަންތަނަށް ގެންނަން ޖެހޭ އައު މަރާމާތުތަކަކީ ކޮބައިތޯ ހޯދާ، އެކަންކަން ކުރެވޭނެ ތާވަލްތަކެއް ހަދައިގެން މަސައްކަތް ފައްޓާނެ ކަމަށެވެ. މި މަސައްކަތުގެ ތަފްސީލް މިހާތަނަށް ލިބިފައިނުވާ ކަމަށް މަބްރޫކް ވިދާޅުވި އެވެ.

ކ. ވިލިވަރު ފެސިލިޓީއާ ބެހޭ ގޮތުން މަބްރޫކް ވިދާޅުވީ އެތަންތަނުގައި މީހުން ބައިތިއްބާނީ އިންސާނީ ކަރާމާތްތައް ނުގެއްލޭ ގޮތަށް އެމީހުންނަށް ވެސް ލިބެންޖެހޭ ހައްގުތައްް ލިބޭ ގޮތަށް ކަމަށެވެ.

ވިލިވަރު ފެސިލިޓީއާ ބެހޭ ގޮތުން އެޗްއާރްސީއެމުން ބުނީ މީހުން ބައިތިއްބަންވާނީ، އިސްލާހު ކުރަން ބުނި ކަންކަން އިސްލާހު ކުރުމަށްފަހު ކަމަށެވެ.

އެ ކޮމިޝަނުން އާންމުކޮށްފައިވާ ރިޕޯޓްގައި ބުނެފައިވާގޮތުގައި، ފާހަގަކުރެވުނު މުހިއްމު ކަންކަމުގެ ތެރޭގައި 22 ކަމެއް ހިމެނެ އެވެ. އެކަންތައްތަކާއި ގުޅިގެން، 11 ހުށަހެޅުމެއް ޑިފެންސް މިނިސްޓްރީއަށާއި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އަށް ހުށަހަޅާފައި ވެއެވެ.