ކޮވިޑް-19 އާ ގުޅިގެން ބްރެޒިލްގެ ހާލަތު ގޯސްވެފައި ވަނިކޮށް ބޮލްސޮނާރޯ މުޒާހަރާގައި ބައިވެރިވެ ވަޑައިގެންފި

ބްރެޒިލްގައި ހަލުވިކަމާއެކު ކޮވިޑް-19 ފެތުރެމުން ދާއިރު އެގައުމުގެ ރައީސް ޖައި ބޮލްސޮނާރޯ އަށް އަމާޒުވަމުންދާ ފާޑުކިޔުންތަކާއި ސިޔާސީ ގޮތުން ކުރިމަތިވެފައިވާ ގޮންޖެހުންތަކާއެކު އެމަނިކުފާނަށް ތާޢީދު ކުރާ ފަރާތްތަކުން ކުރިޔަށް ގެންދިޔަ މުޒާހަރާ އެއްގައި ބައިވެރިވެ ވަޑައިގެންފި އެވެ.

އެމަނިކުފާނުގެ ސެކިޔުރިޓީ ގާޑުން މާސްކު އަޅައިގެން ތިބެ އެމަނިކުފާނު ގާޑު ކުރަމުން ދިޔައިރު ބޮލްސޮނާރޯ ހުންނެވީ މާސްކު ނާޅުއްވަ އެވެ. އެމަނިކުފާނުގެ ފޭސް ބުކް ޕޭޖުން އެ މުޒާހަރާ ލައިވް ކުރަމުން ދިޔައިރު ބްރެޒިލްގެ ދިދަ އާއި އެމަނިކުފާނަށް އަމާޒުކޮށް ލެޖެންޑޭ ގޮވަމުންދިޔަ މުޒާހަރާގެ ބައިވެރިންނަށް ހަނާ އަޅުއްވަމުން ބޮލްސޮނާރޯ ގެންދެވި އެވެ. މުޒާހަރާ އާއި ގުޅިވަޑައިގެން އެކަމަށް ހިތްވަރު ދެއްވަމުން ގެންދެވި އިރު ބްރެޒިލް އަކީ މިވަގުތު ދުނިޔޭގައި ދެވަނަ އަށް އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓުކުރަމުން އަންނަ ގައުމެވެ.

ފާއިތުވި ހަފުތާތަކުގައި ބްރެޒިލްގައި ކުރިޔަށް ގެންދިޔަ މިފަދަ އެތައް ހަރަކާތަކަކަށް ބޮލްސޮނާރޯ ވަނީ ހިތްވަރު ދެއްވާފަ އެވެ. އަދި އަމަލީ ގޮތުން އެ ހަރަކާތްތަކުގައި ބައިވެރިވެ ވަޑައިގެންނެވި އެވެ. ބްރެޒިލްގައި ކޮވިޑް-19 ގެ ހާލަތު ގޯސްވަމުން ދާއިރު ބޮލްސޮނާރާ އަށް ވާގިވެރިވާ އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން މިހާރު ވަނީ ފާއިތުވި ދުވަސްތަކުގައި ބްރެޒިލް އަށް ގޮސްފައިވާ އެއްވެސް މީހަކު އެމެރިކާއަށް އެތެރެވުން މަނާކޮށްފަ އެވެ.

ހޮނިހިރު ދުވަހު އެގައުމުގައި އަލަށް 16508 މީހަކަށް ވައިރަސް ޖެހިފައިވެ އެވެ. އަދި އެދުވަހު އެކަނިވެސް 965 މީހުން ވަނީ މަރުވެފަ އެވެ.

މުޒާހަރާގައި ބައިވެރިވެ ވަޑައިގެން ބޮލްސޮނާރޯ ގެންދެވީ ފޮޓޯ ނަންގަވަމުން މުޒާހަރާގެ ބައިވެރިންނާއި ސަލާމް ވެސް ކުރައްވަމުންނެވެ. ހަލުވިކަމާއެކު ވައިރަސް ފެތުރުން ހުއްޓުވުމަށް ކުރަން ޖެހޭ ހުރިހާ ކަމަކާ ދިމާ އިދިކޮޅަށް ބޮލްސޮނާރޯ ކަންކަން ކުރައްވަމުން ގެންދެވި އިރު ކުރިޔަށް އޮތްތަނުގައި ވެސް ބޮލްސޮނާރޯ އަށް ތާއީދުކޮށް ބްރެޒިލްގެ އެންމެ މަޝްހޫރު އަދި ވައިރަސް ހަލުވި މިނުގައި ފެތުރެމުންދާ ސިޓީތަކުގައި މިފަދަ މުޒާހަރާތައް ކުރިޔަށްދާނެ ކަމަށް ވަނީ ބެލެވިފަ އެވެ.

ބޮލްސޮނާރޯ އަށް ތާއީދުކޮށް ހަރަކާތްތައް ކުރިޔަށް ގެންދަން ފަށާފައި މިވަނީ މިދިޔަ ހަފތާގައި އެގައުމުގެ ފެޑެރަލް ސުޕްރީމް ކޯޓުން އޭޕްރީލް މަހުގެ 22 ވަނަ ދުވަހު ބޭއްވި މިނިސްޓީރިއަލް މީޓިންގ އެއްގެ ވީޑިއޯ ރިލީޒްކުރުމަށް އަމުރުކޮށްފައި ވަނިކޮށެވެ. މިމީޓިންގ ގައި ބޮލްސޮނާރޯ ވިދާޅުވެފައި ވަނީ އެމަނިކުފާނުގެ އާއިލާ އާއި ރައްޓެހިން ސަލާމަތް ކުރުމަށްޓަކައި ސެކިޔުރިޓީ އޮފިޝަލުންނާއި އެމީހުންގެ ވެރިންނާއި މިނިސްޓަރުން ބަދަލުކުރައްވަން ބޭނުންފުޅުވާ ކަމަށެވެ.

ސިޔާސީ ގޮތުން ކުރިޔަށް ދާ މިހަލަބޮލިކަމާއި ކޮވިޑް-19 އިން ރައްކާތެރިވުމަށް އަޅުއްވަމުން ގެންދަވާ ދޯހަޅި ފިޔަވަޅުތަކުގެ ސަބަބުން ބޮލްސޮނާރޯގެ ތާޢީދު ވަނީ ވަރަށް ބޮޑަށް ދަށަށް ގޮސްފަ އެވެ.