ރާއްޖޭގައި ތިބި ޗައިނާގެ 274 މީހަކު ފުރުވާލައިފި
ގެންގޮސްފައިވަނީ ދެ ފްލައިޓެއްގައި
ރާއްޖޭގައި ތިބި ޗައިނާ މީހުން ފުރުވާލުމުގައި އެއާޕޯޓް މުވައްޒަފުން ހަރަކާތްތެރިވަނީ
ރާއްޖޭގައި ތިބި ޗައިނާގެ 274 މީހަކު އަނބުރާ ގައުމަށް ގެންގޮސްފި އެވެ.
މި މީހުން ޗައިނާ އަށް ގޮސްފައިވަނީ އެ މީހުން ބަލާ ރާއްޖެ އައި ޗައިނާ އީސްޓަން އެއާލައިނުގައި ދެ ފްލައިޓެއްގައި އެވެ. މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް) އިން ބުނީ، އާދިއްތަ ދުވަހު ފުރުވާލާފައިވަނީ، ވޫހަން އަށްދާ 138 މީހުންގެ އިތުރުން ޖެންގްޖޯ ސިޓީއަށްދާ 136 މީހުން ކަމަށެވެ.
އެމީހުން ފުރުވާލުމުގައި ވެދިން އެހީތެރިކަމަށާއި، އެއާޕޯޓުގައި މަސައްކަތްކުރާ މުވައްޒަފުންނަށް ޗައިނާ ސަފީރު ޒަންގް ލީ ޒޮންގް ވަނީ ހާއްސަ ޝުކުރެއް އަދާކުރައްވާފައެވެ.
ކޮވިޑް-19 އާ ގުޅިގެން ރާއްޖޭގެ ވައިގެ ބަނދަރު ވަނީ ބަންދުކޮށްފަ އެވެ.
މާލެ ލޮކްޑައުން ކުރުމާއި ގުޅިގެން ރާއްޖޭގައި ދިރިއުޅޭ ބިދޭސީން ގައުމަށް ފޮނުވާލުމުގެ މަސައްކަތް ފޮރިން މިނިސްޓްރީއާ ގުޅިގެން އެކި ގައުމުތަކުން ދަނީ ކުރަމުންނެވެ. އެގޮތުން މިހާތަނަށް ސްރީލަންކާ، ކޮރެޔާ، ޖަޕާނު، އިންޑޮނޭޝިއާ، ބަންގްލަދޭޝްގެ އިތުރުން އިންޑިއާގެ ގިނަ ރައްޔިތުންތަކެއް ވަނީ ގެންގޮސްފަ އެވެ.
ވައިގެ ދަތުރުފަތުރު އަލުން ފަށާނެ ކަމަށް ބެލެވެނީ ޖުލައި މަހު އެވެ. އަދި އެއާޕޯޓް ހުޅުވާލާނީ ރައްކާތެރިކަމުގެ ފިޔަވަޅުތަކާއިއެކު އެވެ.
ރާއްޖެއަކީ ދުވާލެއްގެ މައްޗަށް އެތައް ހާސް ފަތުރުވެރިން ދަތުރުކުރާ ގައުމަކަށްވާއިރު، އެއާޕޯޓް ބަންދުކުރުމުން އިގްތިސާދު ވަނީ ވަރަށް ބޮޑަށް ހީނަރުވެފައެވެ.
