ޕޮޒިޓިވްވި ސިފައިންނާއި އެފަރާތްތަކުގެ ޢާއިލާތަކުގެ ބަހަކަށްވީ ޤައުމު ގޮވާލި މިދަނޑިވަޅުގައި އެންމެ ފަހު ވަގުތާއި ޖެހެންދެންވެސް މަސައްކަތުގައި ދެމިހުރުން ކަމަށް ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ ވިދާޅުވެއްޖެ އެވެ.
ހުޅުމާލޭގައި ތައްޔާރުކުރި މެޑިކަލް ފެސިލިޓީ ހުޅުވުމަށް ބޭއްވި ރަސްމިއްޔާތުގައި މިިނިސްޓަރ ވިދާޅުވީ ޕޮޒިޓިވްވި ސިފައިންނާއި އެފަރާތްތަކުގެ ޢާއިލާތަކާއި މިނިސްޓަރ އަމިއްލަފުޅަށް ގުޅުއްވި ކަމަށާއި އެފަރާތްތަކުގެ ބަހަކަށްވީ ޤައުމު ގޮވާލި މިދަނޑިވަޅުގައި އެންމެ ފަހު ވަގުތާއި ޖެހެންދެންވެސް މަސައްކަތުގައި ދެމިހުރުންކަމުގައި ކަމަށެވެ.
މި މަސައްކަތް ލީޑްކުރި މުއައްސަސާގެ ވަޒީރެއްގެ ހައިސިއްޔަތުން މި ނިންމާލެވުނީ ވަރަށް ބޮޑު މަަސައްކަތެއް ކަމުގައި އިޙްސާސް ކުރެވޭކަމަށް ވެސް މިނިސްޓަރ ވިދާޅުވި އެވެ.
ޑިފެންސް މިނިސްޓަރގެ ވާހަކަފުޅު ނިންމަވާލެއްވީ ފުރާނަ އަތްމައްޗަށް ލައިގެން މި ފެސިލިޓީ ތަރައްޤީކުރުމުގެ ބުރަ މަސައްކަތް ކުރި އެންމެހާ ފަރާތްތަކަށް ޝުކުރު ދަންނަވަމުންނެވެ.
ކޮވިޑް ވިލެޖްގެ މަސައްކަތް ފަށާފައިވަނީ އޭޕްރިލްމަހުގެ 1 ވަނަ ދުވަހު އެވެ. އަދި އެޕްރީލް 25 ވަނަ ދުވަހު މިތަނުގެ މަސައްކަތް ކުރި ފަރާތްތަކުގެ ތެރެއިން ބައެއް މީހުން ޕޮޒިޓިވްވުމާއި ގުޅިގެން 76 ސިފައިން މި ފެސިލިޓީގައި ކަރަންޓީނު ވެގެންވެސް މަސައްކަތްކޮށްފައި ވެއެވެ.
