ލޮކްޑައުން ނިންމާލުމާ ގުޅިގެން މައިނާ ސަރޖެއް އައުން އެކަށީގެންވޭ: ޑރ. އަފްޒަލް

މާލެސިޓީގެ ލޮކްޑައުން ނިންމާލުމާ ގުޅިގެން މައިނާ ސަރޖެއް (ކުއްލިއަކަށް ކޭސްތައް ފެނުން) އެކަށީގެންވާކަމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް ވިދާޅުވެއްޖެއެވެ.

ހުކުރު ދުވަހުގެ ރޭ ނޭޝަނަލް އިމަރެޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ.އަފްޒަލް ވިދާޅުވީ ލޮކްޑައުންއިން ލުއި ދޭތަނުން ނަތީޖާ ނުފެނިދާނެ ކަމަށެވެ.

ޑރ. އަފްޒަލް ވިދާޅުވީ ލޮކްޑައުންއަށް ލުއި ދިނުމާ ގުޅިގެން ފުދޭ ވަރަކަށް މީހުން ބޭރަށް ނުކުންނާނެ ކަމަށް ލަފާ ކުރެވޭ ކަމަށެވެ. އަދި ލޮންޑައުން ނިންމާލުމާ ގުޅިގެން މައިނާ ސަރޖެއް ފެނުން އެކަށީގެންވާ ކަމަށް ޑރ. އަފްޒަލް ވިދާޅުވިއެވެ.

އެގޮތުން މިކަން ރައްޔިތުންނަށް ވިސްނައިދޭން ޖެހޭ ކަމަށާއި، ފޭސް އެކެއްގައި ކޮންޓްރޯލް ނައްޓާގެންދާ ވަރަށް ބޭރުތެރެއަށް ނުކުމެ ނޫޅުމަށް އާންމުންނަށް ހަނދާން ކޮށްދޭން ޖެހޭ ކަމަށް ޑރ. އަފްޒަލް ވިދާޅުވިއެވެ. އަދި ވިދާޅުވީ ފޭސް އެކެއްގައި ކޮންޓްރޯލް ކުރުމަކީ މުހިންމު ކަމެއް ކަމަށެވެ.

ޑރ. އަފްޒަލް ވިދާޅުވީ ލޮކްޑައުން ފިލުވާލާއިރުގަ އެންމެ ޚާއްސަކަމެއްގެ ގޮތުގައި ބަލަމުންދާނީ ކޭސްތައް ފެންނަ އަދަދަށް ކަމަށާއި، މައްޗަށް ދާނަމަ އެއީ ބޮޑު މައްސަލައެއް ކަމަށެވެ.

މީގެއިތުރުން ޑރ. އަފްޒަލް ވިދާޅުވީ ލޮކްޑައުންކޮށް، ދެމުންދިޔަ އިރުޝާދުތަކަށް ރައްޔިތުން އަމަލުކުރަން ފެށި ހިސާބުން ރަނގަޅު ނަތީޖާއެއް ފެނިފައިވާ ކަމަށާއި، ކުރިއަށް އޮތްތާގައި ވެސް މަސައްކަތަށް އާންމުންގެ ފަރާތުން މިފަދަ އެއްބާރުލުމެއް ލިބިއްޖެނަމަ ހާލަތު ރަނގަޅުވާނެ ކަމަށެވެ.