ބޯޑަރު އަލުން ހުޅުވާލާއިރު، ފަތުރުވެރިންގެ އަތުން އިތުރު ފީތަކެއް ނުނަގާނެ
އިތުރު ފީތަކެއް ނަގަން ތާއީދެއް ނުކުރަން: އަލީ ވަހީދު
މިނިސްޓަރ އަލީ ވަހީދު: ފަތުރުވެރިންނަށް ބޯޑަރު ހުޅުވާލަން ނިންމާފައިވަނީ ޖުލައި މަހު
ދިވެހިރާއްޖޭގެ ބޯޑަރު އަލުން ހުޅުވާލާއިރު، ޓޫރިޒަމް މިނިސްޓްރީގެ ސޭފް ޓޫރިޒަމް ގައިޑްލައިންގެ ފުރަތަމަ ޑްރާފްޓުގައި ހިމެނި ފީތައް ނުނަގާނެ ކަމަށް ޓޫރިޒަމް މިނިސްޓަރ އަލީ ވަހީދު ހާމަކުރައްވައިފި އެވެ.
ބުރާސްފަތި ދުވަހުގެރޭ ބޭއްވި ރައްޔިތުންގެ މަޖިލީހުގެ އިގްތިސާދީ ކޮމިޓީގެ ބައްދަލުވުމުގައި އަލީ ވަހީދު ވިދާޅުވީ، މިހާރު އާންމުވެގެން އުޅެނީ ބަލި ބޮޑަށް ފެތުރިފައިވާ ހާލަތުގައި އަމަލުކުރަން އެކުލަވާލާފައިވާ އުސޫލެއް ކަމަށެވެ. އެ އުސޫލު ތައްޔާރު ކުރެވުނީ ބޯޑަރު ބަންދު ކުރެވުނު ފަހުން ރާއްޖެއަށް ދިގު މުއްދަތެއްގައި ކަރަންޓީނު ވާން އަންނަން ބޭނުންވި ފަތުރުވެރިންނަށް ކަމަށް އަލީ ވަހީދު ވިދާޅުވި އެވެ.
ބޯޑަރު ބަންދުކުރުމަށް ފަހު ވެސް ރާއްޖެއަށް ދިގު މުއްދަތަކަށް ކަރަންޓީނު ވާން އަންނަން ބޭނުންވެގެން ބޯޑަރު ހުޅުވުމުގެ ހުއްދައަށް އެދި އެތައް ބަޔަކު ތިބިކަން ފާހަގަ ކުރައްވާ އަލީ ވަހީދު ވިދާޅުވީ، އެއީ އެ ހާލަތުގައި އަންނަން ބޭނުންވި ފަރާތްތަކަށް ހަމަހަމަ، ދެފުށް ފެންނަ އުސޫލެއްގެ ތެރެއިން އަމަލު ކުރުމަށް އެކުލަވާލި ޑްރާފްޓެއް ކަމަށެވެ.
އަލީ ވަހީދު ވަނީ ޑްރާފްޓް އާންމުކުރި އެސޯސިއޭޝަނުން އެކުރީ ވަރަށް "އަންޕްރޮފެޝަނަލް" ކަމެއް ކަމަށް ވިދާޅުވެ، އެއީ ވަރަށް "ހިތާމަވެރި" ކަމެއްގެ ސިފަކުރައްވާފަ އެވެ. އަދި އެހެން އެކަން ކުރުމާއި ކަމުގެ ހަގީގަތް އޮޅިފައިވާ އަސްލު ގެއްލިފައިވާ ކަމަށް ވެސް ވިދާޅުވި އެވެ.
ޑްރާފްޓް އެކުލަވާލީ މަޝްވަރާ ކުރުމެއް ނެތިކަމަށް ބުނެ ފަތުރުވެރިކަމުގެ ސިނާއަތުގައި ހަރަކާތްތެރިވާ ޖަމިއްޔާތަކުން ބުނަމުން އަންނަ ދަނޑިވަޅެއްގައި، އަލީ ވަހީދު ވިދާޅުވީ މިހާރު ތައްޔާރުކުރަމުން އަަންނަނީ އުސޫލުގެ ތިންވަނަ ޑްރާފްޓް ކަމަށެވެ. އަދި މި ޑްރާފްޓް އެކުލަވާލާނީ ސިނާއަތުގެ މަސްލަހަތުވެރިންގެ މަޝްވަރާއާއެކު ކަމަށް ވިދާޅުވި އެވެ. އެގޮތުގެ މަތިން ފާއިތުވި ދެ ދުވަހު މަޓީ، ސިވިލް އޭވިއޭޝަން، އެމްއޭސީއެލް، އެމްއެމްޕީއާރްސީ އަދި ޑރ. އަލީ ލަތީފް ހިމެނޭގޮތަށް މަޝްވަރާތަކެއް ކުރެވުނު ކަމަށް ވިދާޅުވި އެވެ.
އަލީ ވަހީދު އިތުރަށް ވިދާޅުވީ ރާއްޖެއަކީ އަގުބޮޑު މަންޒިލަކަށް ހަދާކަށް ބޭނުން ނުވާކަމަށާއި، ބޭނުންވަނީ ރާއްޖެއަކީ ބޮޑަށް މީހުން އަންނަ މަންޒިލަކަށް ހެދުމަށް ކަމަށެވެ. މިނިސްޓަރ ވަނީ ޖުލައި މަހު ނިމިގެން އަންނަ ޕޮލިސީން ހުރިހާ ފަރާތްތަކުން ބޭނުންވާ ބަދަލުތައް ފެންނާނެ ކަމުގެ ޔަގީންކަން އަރުވާފަ އެވެ.
އާންމުވެގެން އުޅޭ ޑްރާފްޓުގައި ފަތުރުވެރިންގެ އަތުން 200 ޑޮލަރު އިތުރަށް ނެގުމަށް ހިމަނާފައި އޮތުމުންނާއި އޭގައި ހިމަނާފައިވާ ބައެއް ޝަރުތުތަކާއި ގުޅިގެން ޓޫރިޒަމް މިނިސްޓްރީއަށާއި ސަރުކާރަށް ފާޑުކިޔުން އަމާޒުވި އެވެ.
