ފްރޮންޓް ލައިންގައި މަސައްކަތް ކުރައްވާ ފަރާތްތަކުން ވަމުންދާ ޤުރުބާނީއަށް ޝުކުރު އަދާކުރަން: ރައީސް
އެފަރާތްތަކުން ވަމުންދަނީ ވަރަށް ބޮޑު ޤުރުބާނީއެއް
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ޤައުމާ މުޚާތަބު ކުރެއްވުން- ރައީސް ވަނީ އެކި ދާއިރާތަކުން ކުރަމުންދާ މަސައްކަތަށް ޝުކުރު ދަންނަވާފައި
ކޮވިޑް-19 އާ ދެކޮޅަށް ރާއްޖޭގެ ފްރޮންޓްލައިންގައި މަސައްކަތް ކުރައްވަމުން ގެންދަވާ ފަރާތްތަކުން ވަމުންދާ ޤުރުބާނީއަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ޝުކުރު އަދާ ކުރައްވައިފި އެވެ.
ބުދަ ދުވަހުގެރޭ ޤައުމާ މުޚާޠަބު ކުރައްވައި ދެއްކެވި ވާހަކަފުޅުގައި ރައީސް ޞާލިޙު ވިދާޅުވީ، ކޮވިޑް-19 އާ ދެކޮޅަށް ކުރީ ސަފުގައި މަސައްކަތް ކުރައްވަމުން ގެންދަވާ ފަރާތްތަކުން ވަމުންދަނީ ވަރަށް ބޮޑު ޤުރުބާނީއެއް ކަމަށެވެ. އަދި އެ ފަރާތްތަކުގެ ޢާއިލާތަކުންވެސް ކެތްތެރިކަމާއެކު ގޭގައި މަޑު ކުރުމަށް ރައީސް ޞާލިޙު ވަނީ އިލްތިމާސް ކުރައްވާފަ އެވެ.
ރައީސް ޞާލިޙު އެހެން ވިދާޅުވެފައި ވާއިރު، ރާއްޖޭގައި ކޮވިޑް-19 ގެ މަސައްކަތުގައި އިސްސަފުގައި ޙަރަކާތްތެރިވާ މީހުންގެ ތެރެއިން ކޮވިޑް-19ށް ޕޮޒިޓިވްވީ މީހުންގެ ޢަދަދު 199ށް އަރާފައިވާ ކަމަށް އެޗްޕީއޭއިން މީގެ ކުރިން ވަނީ ހާމަކޮށްފައެވެ. މީގެ ތެރޭގައި ޞިއްޙީ ޚިދުމަތްތެރިންގެ އިތުރުން، އެހެނިހެން ދާއިރާތަކުން ފްރޮންޓްލައިންގައި މަސައްކަތް ކުރާ މުވައްޒަފުން ހިމެނޭކަމަށް އެޗްޕީއޭއިިން ބުނެއެވެ.
މާލެ ސިޓީގައި ހަލުވި މިނެއްގައި ކޮވިޑް-19 ފެތުރެމުން ދާއިރު، ރާއްޖެއިން މިހާތަނަށް 1100ށް ވުރެ ގިނަ މީހުން ވަނީ މި ވައިރަސްއަށް ޕޮޒިޓިވް ވެފައެވެ.
