ކޮވިޑް-19ގެ ހާލަތު އިތުރަށް ގޯސްނުވެ ރަނގަޅަށް ދާނަމަ ޖުލައި މަހު ވެލާނާ އިންޓަނޭޝަނަލް އެއަރޕޯޓު ބައިނަލްއަގުވާވީ ދަތުރުތަކަށް ހުޅުވާލާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެ އެވެ.

ބުދަ ދުވަހުގެ ރޭ ކޮވިޑް-19 ގެ ބަލިމަޑުކަމާއި ގުޅިގެން ރައީސުލްޖުމްހޫރިއްޔާ ގައުމާ މުޚާތަބު ކުރައްވާ ވިދާޅުވީ ކޮވިޑް-19އާ ގުޅިގެން އަޅާފައިވާ ފިޔަވަޅުތަކަށް ލުއިތައް ދިނުމަށް ނިންމާފައި ވާއިރު، ރާއްޖޭގައި ކޮވިޑް-19ގެ ޙާލަތު އިތުރަށް ގޯސްނުވެ، ރަނގަޅަށް ދާނަމަ، އަންނަ ޖުލައި މަހުގެ ތެރޭގައި، ވެލާނާ އިންޓަރނޭޝަނަލް އެއަރޕޯރޓް، ބައިނަލްއަގުވާމީ ދަތުރުތަކަށް ހުޅުވާލަން މިހާރު ނިންމާފައިވާ ކަމަށެވެ.

އޭގެ އިތުރުން، ރިސޯޓުތައް ހުޅުވުމުގެ ހުއްދަ ދެވޭނެ ކަމަށް އެމަނިކުފާނު ވިދާޅުވި އެވެ. ރައީސް ސާލިހު ވިދާޅުވީ މިކަންކަންކުރާނެ ގޮތުގެ ގައިޑްލައިންތައް، ކަމާ ބެހޭ ދާއިރާތަކުގެ އިރުޝާދާއެކު ކަނޑައެޅުމުގެ މަސައްކަތްތައް ކުރިއަށްދާ ކަމަށެވެ.

ކޮވިޑް-19ން ކޮންޓްރޯލް ކުރުމަށް ރާއްޖޭގެ މައި ދޮރާށި، އެއަރޕޯޓު ވަނީ ބަންދުކޮށްފައެވެ. އޮން އެރައިވަލް ވިސާ ދިނުން ހުއްޓާލުމާ ގުޅިގެން ފަތުރުވެރިކަމުގެ ސިނާއަތް މިހާރު ވަނީ ހުއްޓުމަކަށް އައިސްފަ އެވެ. އަދި ރާއްޖޭގެ އިގްތިސާދަށް ވަނީ ބޮޑު ހީނަރުކަމެއް އައިސްފަ އެވެ.