ފުވައްމުލައް ސިޓީ ފިހާރަތައް ހުޅުވައިގެން ވިޔަފާރިކުރުން މަޑުޖައްސާލުމަށް ނިންމާފައިވާ ނިންމުމުގެ މުއްދަތު އިތުރުކޮށްފި އެވެ.
ފުވައްމުލައް ސިޓީ ކައުންސިލުން ބުނީ ދުނިޔޭގެ އެކި ގައުމުތަކުގައި މިހާރު ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ނުރައްކާތެރި މިންވަރަށް ފެތުރެމުންދާތީ އާއި، އަދި ކުރިއަށް ދުވަސްތަކުގައި މިބަލި އިތުރަށް ފެތުރުމުގެ ފުރުސަތު އޮތުމާގުޅިގެން، މި ބަލި މަޑުކަމުން ރައްޔިތުން ސަލާމަތްކުރުމަށް ގިނަ ފިޔަވަޅުތަކެއް އަޅާފައިވާ ކަމަށެވެ.
އެގޮތުން 03 މެއި 2020 ން ފެށިގެން 17 މެއި 2020 އާ ހަމަޔަށް އެސިޓީގެ ފިހާރަތައް ހުޅުވައިގެން ވިޔަފާރިކުރުން މަޑުޖައްސާލުމަށް ނިންމާފައިވާ ނިންމުމުގެ މުއްދަތު 31މެއި 2020 ވާ އާދީއްތަ ދުވަހާ ހަމަޔަށް އިތުރުކޮށްފައިވާ ކަމަށް ފުވައްމުލަކު ކައުންސިލުން ބުނެއެވެ.
ފުވައްމުލަކު ކައުންސިލުން ބުނީ މިމުއްދަތުގެ ތެރޭގައި ކައުންސިލުން ޑެލިވަރީ ކުރުމަށް ހުއްދަ ދޫކޮށްފައިވާ ފިހާރަތަކުން މިހާރު ވެސް އަމަލުކުރަމުންދާ އުސޫލާ އެއްގޮތަށް ގޭގެއަށްގެއަށް ތަކެތި ޑެލިވަރީކުރުމަށް އެދޭ ކަމަށެވެ.
މީގެ އިތުރުން ކައުންސިލުން ބުނީ ފިހާރަތަކުންނާއި އަދި އެނޫންވެސް ވިޔަފާރިތަކުން އޮންލައިންކޮށް ފައިސާ ބަލައިގަންނަމުން ދާއިރު، ވިޔަފާރި ކުރާ ބައެއް ފަރާތްތަކުން އެކައުންޓަށް ފައިސާ ޖަމާނުކޮށް ފޯޖްކޮށްފައިވާ ސްލިޕްތައް ވައިބަރ ކުރަމުން ގެންދާ ކަމަށެވެ.
އެހެންކަމުން ހުރިހާ ފަރާތްތަކުން މިކަމަށް ސަމާލު ކަންދީ، މުދާ ޑެލިވަރީ ކުރުމުގެ ކުރިން އިންޓަރނެޓް ބޭންކިންގ އިން ފައިސާ ޖަމާކޮށްފައި ހުރިކަން ޔަގީން ކުރުމަށް ވެސް ކައުންސިލުން އެދިފައިވެ އެވެ.
