ޝަރީއަތްތައް ވަގުތުން ދެއްކުމުން އިންސާފު ހޯދަން ހިނގަންޖެހޭ ދިގު މަގު ކުރުވެއްޖެ
20 މެއި 2020 | ބުދަ 07:15ހަރަދާއި ވަގުތު ސަލާމަތްވާނެ ކަމަށް ވިދާޅުވި
ބަންޑާރަ ނައިބް އިބްރާހިމް ރިއްފަތު: އޮންލައިންކޮށް ޝަރީއަތް ކުރިޔަށް ގެންދިނުމުން ހަރަދާއި ވަގުތު ސަލާމަތްވާނެ ކަމަށް ވިދާޅުވި
ސުޕްރީމް ކޯޓުގެ ޝަރީއަތްތައް ޓްވިޓާ އަދި ޔޫޓިއުބު މެދުވެރިކޮށް ލައިވްކޮށް ދެއްކޭ ގޮތަށް އެ ކޯޓުން ނިންމި ނިންމުމަށް އެޓަރނި ޖެނެރަލް (އޭޖީ) އިބްރާހިމް ރިއްފަތު ވަރަށް ބޮޑަށް ތައުރީފު ކުރައްވައިފި އެވެ.
އޭޖީ ކުރައްވާފައިވާ ޓްވީޓެއްގައި ވިދާޅުވީ، އޮންލައިންކޮށް ޝަރީއަތް ކުރިޔަށް ގެންދިޔުމަކީ ބޭނުން ބޮޑު ތާރީޚީ ބަދަލެއްް ކަމަށެވެ. ޓެކްނޮލޮޖީ ބޭނުންކުރުމުން ޚަރަދާއި ވަގުތު ސަލާމަތްވުމުގެ އިތުރުން ޝަރީއަތް އަވަސްވެ، އިންސާފު ހޯދަން ހިނގަންޖެހޭ ދިގު މަގު ކުރުވެގެން ދާނެ ކަމެއް ކަމަށް ވިދާޅުވި އެވެ.
ސުޕްރީމް ކޯޓުން ވަނީ ސިއްހީ ޚާއްސަ ހާލަތްތަކުގައި ސުޕްރީމް ކޯޓުގެ ޝަރީއަތްތައް މުއާސަލާތީ ވަސީލަތްތައް ބޭނުންކޮށްގެން ދުރުން ކުރިއަށް ގެންދިއުމުގައި އަމަލުކުރާނެ ގޮތުގެ ގަވާއިދެއް އަންގާރަ ދުވަހު އާއްމުކޮށްފަ އެވެ.
އެ ކޯޓުން ބުނީ، ކޮންމެހެން ކޯޓަށް ހާޒިރުވެގެން ނޫނީ ކުރިއަށް ގެންދެވެން ނެތް ޝަރީއަތްތައް ފިޔަވައި އެނޫން ޝަރީއަތްތައް ކުރިއަށް ގެންދިއުމަށް ހަމަޖެހިފައި ވަނީ މައިކްރޯސޮފްޓް ޓީމްސް މެދުވެރިކޮށް ކަމަށެވެ.
ކޯޓަށް ހުށަހެޅޭ މައްސަލަތަކުގެ ޝަރީއަތްތައް މެދުކެނޑުމެއް ނެތި ކުރިއަށް ގެންދިއުމުގެ އިންތިޒާމު ހަމަޖެހިގެން ދާނެތީ، ސިއްހީ ކުއްލި ނުރައްކަލުގެ ހާލަތާ ގުޅިގެން ސަރުކާރުގެ އޮފީސްތައް ނުހުޅުވާ ދުވަސްތައް ސުޕްރީމް ކޯޓުގައި މައްސަލަ އިސްތިއުނާފު ކުރުމުގައި ނުގުނާގޮތަށް އޮތްއޮތުން ނިމުމަކަށް އަންނާނެ ކަމަށެވެ.
