ޓްރާންސިޓް ކަރަންޓީން ފެސިލިޓީށް އަށް 830 މީހަކު ފޮނުވައިފިން: މިނިސްޓަރ އިމްރާން
19 މެއި 2020 | އަންގާރަ 13:44އި މަހުގެ 24ގެ ކުރިން މަދުވެގެން 1800 މީހުން ރަށަށް ފޮނުވުމަށްޓަކައި ކަރަންޓީން ކުރެވޭނެ
ކަރަންޓީނަށް މީހުން ގެންދިއުމުގެ ތެރެއިން
ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުންގެ ތެރެއިން 830 މީހަކު "ޓްރާންސިޓް ކަރަންޓީން ފެސިލިޓީސް" އަށް ފޮނުވާފައިވާކަމަށް ހޯމް މިނިސްޓަރ ޝައިޚް އިމްރާން ޢަބްދުﷲ ވިދާޅުވެއްޖެ އެވެ.
މިނިސްޓަަރ އިމްރާން ޓްވިޓަރ މެދުވެރިކޮށް ވިދާޅުވީ، ފުރަބަންދުގެ ޙާލަތު މެދުވެރިވި ވަގުތު އެކި ބޭނުންތަކަށް އަތޮޅުތަކުން މާލެ އައިސް ތިބި މީހުންގެ ތެރެއިން ރަށަށް ދާން ބޭނުންވާ 830 މީހުން ކަރަންޓީން ފެސިލިޓީއަށް ފޮނުވާލާފައިވާ ކަމަށެވެ. އަދި މެއި މަހުގެ 24 ވަނަ ދުވަހުގެ ކުރިން މަދުވެގެން 1800 މީހުން ރަށަށް ފޮނުވުމަށްޓަކައި ކަރަންޓީނަށް ފޮނުވޭނެ ކަމަށެވެ. އެ ފަރާތްތަކަށް ރަށަށް ދެވޭނީ ކަރަންޓީން ފެސިލިޓީތަކުގައި 14 ދުވަހުގެ މުއްދަތެއް ހަމަކުރުމަށް ފަހުގައި ކަމަށްވެސް އިމްރާން ވިދާޅުވެފައި ވެއެވެ.
ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުން ރަށަށް ދިއުމުގެ ކުރިން ކަރަންޓީން ވުމަށް "ޓްރާންސިޓް ކަރަންޓީން ފެސިލިޓީސް" ގެ ގޮތުގައި ޖުމުލަ 7 ރިސޯޓެއް އަންނަނީ ބޭނުން ކުރަމުންނެވެ. ޓްރާންސިޓް ކަރަންޓީން ފެސިލިޓީގެ ގޮތުގައި އައްޑޫ، ދ، ޅ، އަދި ރ އަތޮޅުގައި ވާ ރިސޯޓުތަކެއް ދަނީ ބޭނުން ކުރަމުންނެވެ.
އަދި ހދ، ފ، އަދި މ އަތޮޅުން 3 ރިސޯޓު ވަނީ ހަމަޖެހިފައެވެ. އެއީ ހދ. އަތޮޅުން ހޮނޑާފުށި އައިލެންޑް ރިސޯޓު، ފ. އަތޮޅުން ފިލިތެޔޮ އައިލެންޑް ރިސޯޓު އަދި މ. އަތޮޅުން މެދުފުށި އައިލެންޑް ރިސޯޓެވެ. އައްޑޫ ސިޓީގައި ހެރެތެރެ އައިލެންޑް ރިސޯޓު ހަމަޖައްސާފައި ވާއިރު، ދ. އަތޮޅުން ސަން އަކުއާ އިރުވެލި، ޅ އަތޮޅުން ފުށިފަރު މޯލްޑިވްސް އަދި ރ އަތޮޅުން ފުރަވެރި އައިލެންޑް ރިސޯޓް އެންޑް ސްޕާ ވަނީ ހަމަޖައްސާފަ އެވެ.
ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުން އަނބުރާ ރަށަށް ފޮނުވުމުގައި ލަސްތަކެއް އުޅެނީ ވަޞީލަތްތައް ނެތިގެން ނޫންކަމަށާއި، ބަލިމަޑުކަމެއްގެ ތެރޭގައި 'ރިސްކް' ނަގަން ބޭނުން ނުވާތީ ކަމަށް ޓުއަރިޒަމް މިނިސްޓަރ އަލީ ވަހީދު ވަނީ މީގެކުރިންވެސް ވިދާޅުވެފައެވެ.
ސަރުކާރުގެ މައިގަނޑު ޢަމާޒަކީ އަތޮޅުތެރެއަށް ބަލި ފެތުރުނަ ނުދީ ކޮންޓްރޯލް ކުރުން ކަމަށް ވާއިރު، ރަށަށް ދާން ބޭނުންވާ މީހެއްގެ ފުށުން އެ ބަލި ރަށުތެރޭގައި ފެތުރިއްޖެ ނަމަ، ރަށުގައި ދިރިއުޅޭ އެންމެން ނުރައްކަލެއްގެ ތެރެއަށް ހުށަހެޅިގެން ދާނެ އެވެ.
