ރާއްޖޭގައި ތިބި އިންޑިއާ މީހުން ގެންދަން ފްލައިޓްތަކެއް
19 މެއި 2020 | އަންގާރަ 07:14ފްލައިޓް ބާއްވަނީ 22 އަދި 23 ގައި
ރާއްޖޭގައި ތިބި އިންޑިއާ މީހުން ފޮނުވާލުމުގެ ތެރެއިން
ރާއްޖޭގައި ތާށިވެފައި ތިބި އިންޑިއާ ރައްޔިތުން އަނބުރާ ގައުމަށް ގެންދަން އެއަރ އިންޑިއާގެ ދެ ފްލައިޓެއް ރާއްޖެެ ދަތުރު ކުރުމަށް ހަމަޖެހިއްޖެ އެވެ.
އިންޑިއާގެ ރައްޔިތުން ގެންދަން އަންނަ ފްލައިޓްތައް ރާއްޖެ އަންނަން ހަމަޖެހިފައި ވަނީ މި މަހުގެ 22 އަދި 23ގަ އެވެ. ރާއްޖޭގައި ހުންނަ އިންޑިއާ ހައިކޮމިޝަނުން ބުނީ، 22 ވަނަ ދުވަހު އަންނަ ފްލައިޓް ދަތުރުކުރާނީ މާލެއިން ބެންގަލޫރަަށް ކަމަށެވެ.
އަދި 23 ވަނަ ދުވަހު އޮންނަ ފްލައިޓް ދަތުރުކުރާނީ މާލެއިން ވެރިރަށް ނިއު ދިއްލީ އަށް ކަމަށެވެ. ބެންގަލޫރަށް ދަތުރުކުރާ ފްލައިޓުގައި އިސްކަން ދޭނީ ޓެމިލްނާޑޫ، އަންދްރަޕްރަދޭޝްގެ އިތުރުން ކަރްނާޓަކާ ސްޓޭޓްގައި ދިރިއުޅޭ ފަރާތްތަކަށް ކަމަށް ހައިކޮމިޝަނުން ބުނެއެވެ. އަދި ނިއު ދިއްލީ އަށް ދަތުރުކުރާ ފްލައިޓުގައި އިސްކަން ދޭނީ ޗަންދީގަރް އަދި ހަރްޔާނާ ސްޓޭޓުގައި ދިރިއުޅޭ ފަރާތްތަކަށް ކަމަށްވެސް ހައިކޮމިޝަނުން ބުނެފައި ވެއެވެ.
މި ފްލައިޓްތަކުގައި ގައި ދާން ބޭނުންވާ ހުރިހާ ފަރާތްތަށްވެސް ޓިކެޓު ނަގަން ޖެހެނީ އަމިއްލަ ޚަރަދު ގައެވެ. ހައި ކޮމިޝަނުގެ ޓްވިޓަރ އަދި ފޭސްބުކް އެކައުންޓުން ދަނީ އެ ފްލައިޓްތަކުގައި ދަތުރުކުރާ މީހުންގެ ލިސްޓު ޢާންމު ކުރަމުންނެވެ.
ރާއްޖޭގައި ހުންނަ އިންޑިއާ ހައިކޮމިޝަނުގެ ޑެޕިއުޓީ ހައި ކޮމިޝަނަރު ރޯހިތު ރަތީޝް ވިދާޅުވީ، ޤައުމަށް ދާން ބޭނުންވެގެން ގިނަ ޢަދަދެއްގެ މީހުން ހައިކޮމިޝަނުގައި އެދިފައިވާ ކަމަށެވެ. ނަމަވެސް ފްލައިޓުތަކުގައި ޖާގަހުރި ވަރަކުން ފުރުޞަތު ދެމުން ދާނެ ކަމަށެވެ.
ޤައުމުން ބޭރުގައި ދިރިއުޅޭ އިންޑިއާގެ ހަތަރު ލައްކައަށް ވުރެ ގިނަ މީހުން އަނބުރާ ޤައުމަށް ގެންދިއުމަށް އިންޑިއާގެ މައި ސަރުކާރުން ފަށާފައިވާ ބިޔަ އޮޕަރޭޝަނުގެ ތެރެއިން، ރާއްޖޭގައި ތިބި އެ ޤައުމުގެ ބައެއް ރައްޔިތުން 2 މަނަވަރެއްގައި ވަނީ އިންޑިއާއަށް ގެންގޮސްފަ އެވެ.
