އޭވިއޭޝަން ސެކިއުރިޓީ ކޮމާންޑް ސީއެސްސީގެ ދަށުން ހިންގުމަށް ދަތިތަކެއް ދިމާވާތީ އެ މައްސަލަ މަޖިލީހުން ބަލަނީ
ވީހާ އަވަހަކަށް އެ މައްސަލަ ބަލައި ގޮތެއް ނިންމުން މުހިންމުކަމަށް ކޮމިޓީއަށް ފާހަގަކުރެވޭ
އޭވިއޭޝަން ސެކުއިރިޓީ ކޮމާންޑްގެ މުވައްޒަފުން ޕެސެންޖަރުން ސްކްރީން ކުރުމުގައި ހަރަކާތްތެރިވަނީ
ދިވެހިރާއްޖޭގެ އޭވިއޭޝަން ސެކިއުރިޓީ ކޮމާންޑް (އެވްސެކޮމް) ސިވިލް ސަރވިސް ކޮމިޝަނު (ސީއެސްސީ)ގެ ދަށުން ހިންގުމުގައި ދަތިތަކެއް ހުރިކަމުގެ މަޢުލޫމާތު ލިބުމުން އެ މައްސަލަ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން ބަލަން ފަށައިފި އެވެ.
ކޮވިޑް-19 އާ ގުޅިގެން ޤައުމީ ސަލާމަތަށް އިތުރު ނުރައްކަލެއް އޮތްތޯ ބެލުމަށާއި، ޓޫރިޒަމް ސިނާޢަތަށް ކޮށްފާނެ އަސަރު ދެނެގަތުމަށް ސަލާމަތީ ޚިދުމަތްތަކާ ބާހޭ ކޮމިޓީން ދިރާސާކޮށް ނިންމިގޮތުގެ ރިޕޯޓުގައި ވާގޮތުން އެވްސެކޮމް އާއި ގުޅޭގޮތުން މިނިސްޓްރީ އޮފް ޑިފެންސުން ސާފުކުރި މަޢުލޫމާތު ތަކުން، ސީއެސްސީގެ ދަށުން ހިންގުމުގައި ދަތިތަކެއް ހުރިކަމަށް ކޮމެޓީއަށް ފާހަގަކުރެވިފައި ވެއެވެ.
އެހެންކަމުން އެ މައްސަލަ އަވަސް މުއްދަތެއްގައި ކޮމިޓީއިން ބަލާނެކަމަށާއި، އަދި ވީހާ އަވަހަކަށް އެ މައްސަލަ ބަލައި ގޮތެއް ނިންމުމުގެ މުހިންމުކަން ކޮމިޓީން ފާހަގަކޮށްފައި ވެއެވެ.
ކޮމެޓީން ބުނީ އެވްސެކޮމްގެ މުވައްޒަފުންނާ ގުޅޭ ޤައުމީ ސަލާމަތާ ގުޅުންހުރި ދަތިތަކެއް ކުރިމަތިވަމުންދާ ކަމަށް ކޮމިޓީގެ ބައެއް މެންބަރުން ޚިޔާލު ފާޅުކޮށްފައި ވާތީ، އެ މަޢުލޫމާތު ކޮމެޓީން ސާފުކުރި ކަމަށެވެ. އެގޮތުން، މުވައްޒަފުންނާ ގުޅޭގޮތުން ސީއެސްސީން ހެދިފައި ހުރި ގިނަ ޤަވާއިދުތަކާއި އުޞޫލުތައް މައިގަނޑު ގޮތެއްގައި ފަރުމާކުރެވިފައި ވަނީ އިދާރީ މަސައްކަތް ކުރާ މުވައްޒަފުންނަށް ޢަމާޒުކުރެވިގެން ކަމަށް ކޮމެޓީއަށް ވަނީ ފާހަގަކޮށްފަ އެެވެ.
އެވްސްކޮމްގެ މުވައްޒަފުންނަކީ 24 ގަޑިއިރު އޮޕެރޭޝަނަލް ޑިއުޓީތަކުގެ މަސައްކަތްކުރަން ޖެހޭ ބަޔަކަށް ވާއިރު، މުވައްޒަފުންގެ ސަލާމާއި ޗުއްޓީ ރެގިއުލޭޓުކުރުމުގައި ދަތިވެ ޚިދުމަތަށް ބުރޫ އަރާފަދަ ޙާލަތްތައް ދިމާވެ، އެއަރޕޯޓް ސެކިއުރިޓީ ޔަޤީންކުރުމުގައި ގިނަ ގޮންޖެހުންތަކެއް ކުރިމަތިވާކަން ވެސް ރިޕޯޓުގައި ފާހަގަކޮށްފައި ވެއެވެ.
ކޮމެޓީ ރިޕޯޓުގައި ވަނީ މުވައްޒަފުންނަށް ހޯދައިދެވޭ ޢިނާޔަތްތައް ހޯދައި ދިނުމަށް ސީއެސްސީގެ ޤަވާއިދުގައި އެކުލަވާލެވިފައިވާ ބައެއް އުޞޫލުތަކަކީ އޭވިއޭޝަން ސެކިއުރިޓީ ފަދަ، ޚިދުމަތް ފޯރުކޮށްދިނުމުގައި، އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަންގެ ސެކިއުރިޓީ މިންގަނޑުތަކާއި އެއްގޮތަށް މަސައްކަތް ކުރަންޖެހޭ މުވައްޒަފުން ވަޒީފާގައި ގެންގުޅުމުގައި ބައެއް ގޮންޖެހުންތައް ހިމެނޭ އުޞޫލުތަކެއްކަން ފާހަގަކޮށްފަ އެވެ.
އޭވިއޭޝަން ސެކިއުރިޓީގެ ޚިދުމަތަކީ ޔުނިފޯމު އެޅި ލޯ އެންފޯސްމެންޓް އެޖެންސީއަކަށް ވުމުން، މުވައްޒަފުންނަށް ލިބެން ޖެހޭ މަޤާމުގެ ކުރިއެރުމާއި، ޕަރފޯމަންސް އެޕްރައިސަލް އުޞޫލުތަކާއި، މުވައްޒަފުންގެ ވެލްފެއަރ އާއި ގުޅޭ ހުރިހާކަމެއް ވަރަށް ރަނގަޅަށް ތަރުތީބުވެ އޮޕަރޭޝަނަލް ޑިއުޓީސްތަކަށް ވިސްނައިގެން ހެދިފައިވާ ނިޒާމެއްގެ މައްޗަށް ހުންނަންޖެހޭ އިރު، ސިވިލް ސަރވިސް އުޞޫލުތަކާއި، އިދާރީ މަސައްކަތްތަކަށް ބެލެވިގެން ތައްޔާރު ކުރެވިފައިވުމުގެ ސަބަބުން ގޮންޖެހުންތަކާ ކުރިމަތިވާކަމަށް ވެސް ރިޕޯޓުގައި ވެއެވެ. މިކަމުގެ ސަބަބުން އެއަރޕޯޓް މުވަޒަފުންގެ އެންމެހާ ކަންކަން ބެލެހެއްޓުމުގައި ދަތިތައް ދިމަވާ ކަމަށް ރިޕޯޓުގައި ވެއެވެ.
މީގެ އިތުރުން، އެވްސްކޮމްގެ މުވައްޒަފުންނަކީ، ބެކްގްރައުންޑް ޗެކް ކުރެވިގެން ވަޒީފާ ދެވޭ މުވައްޒަފުންނަށް ވާންޖެހޭ ކަމާއި ވަޒީފާގައި ދެމިތިބޭ އިރުވެސް، ޓެރަރިޒަމްގެ ޢަމަލެއް ހިންގަން މަގުފަހިކޮށްފާނެކަމަށް ޝައްކުކުރެވޭ ފަދަ ކަމެއް ފާހަގަ ކުރެވޭނަމަ ވަގުތުން ފިޔަވަޅު އަޅަންޖެހޭ ބަޔެއް ކަމަށް ރިޕޯޓުގައި ވެއެވެ. އަދި އެ ކޮމާންޑުގެ މުވައްޒަފުންގެ ތެރެއިން ހަރުކަށި ފިކުރަށް ވާގިދޭ މީހުންނާއި، ޤައުމީ ސަލާމަތަށް ނުރައްކާ ކުރުވަފާނެ މީހުންނާއި، އަދި ޓެރަރިޒަމްގެ ޙަމާލާއެއް ރާވާ ހިންގަފާނެ ފަދަ ބަޔަކު ފާހަގަކުރެވޭ ނަމަ މަދަނީ ވައިގެ ސިނާޢަތުގެ ސަލާމަތަށާއި ޤައުމީ ސަލާމަތަށްޓަކައި ވަގުތުން ވަކިކުރެވޭނެ އުޞޫލެއް އޮންނަ ލޯ އެންފޯސްކުރާ މުއައްސަސާތާއި އެއްފަދައިން މަސްއޫލިއްޔަތު އަދާކުރެވޭނެ ޤާނޫނީ ބާރުވެރިކަމެއް ލިބިފައިވާ މިނިވަން މުއައްސަސާއެއްގެ ގޮތުގައި އެވްސްކޮމް އޮތުން މުހިންމުކަމަށް މިނިސްޓްރީ އޮފް ޑިފެންސުން ވަނީ ކޮމިޓީއަށް މަޢުލޫމާތު ދީފައެވެ.
ކޮމެޓީން ބުނީ ކޮވިޑް-19ގެ ޕެންޑެމިކްގެ މި ޙާލަތުގައިވެސް ވައިގެ ސިނާޢަތު ނުރައްކަލުން ސަލާމަތްކުރުމަށް މިފިޔަވަޅު އެޅުން މުހިންމުކަމަށް ކޮމެޓީން ދެކޭ ކަމަށެވެ.
