އެހީތެރިކަން ފޯރުކޮށްދިނުމުގެ ކަންކަން ކުރިޔަށްދާ ގޮތާއިގުޅޭ މަޝްވަރާ ނައިބު ރައީސް ކުރައްވައިފި
އެހީތެރިކަމަށް ބޭނުންވެފައިވާ މީހުންނަށް އެހީތެރިކަން ފޯރުކޮށްދިނުމުގެ ކަންކަން ހިނގަމުންދާ ގޮތުގެ އެންމެ ފަހުގެ މަޢޫލޫމާތު އޮޅުން ފިލުއްވި
ނައިބު ރައީސް ކަމާބެހޭ ފަރާތްތަކާއި ބައްދަލުކުރައްވާ މައުލޫމާތު އޮޅުންފިލުއްވަނީ
ރައީސުލްޖުމްހޫރިއްޔާގެ ނައިބު، ފައިޞަލް ނަސީމް، ކޯވިޑް-19އާއި ގުޅިގެން އެކިއެކި ޙާލަތްތައް މެދުވެރިވެ އެހީތެރިކަމަށް ބޭނުންވެފައިވާ ފަރާތްތަކަށް އެހީތެރިކަން ފޯރުކޮށްދިނުމުގެ ކަންކަން ކުރިޔަށް ގެންދިއުމުގައި އެންމެ އިސްކޮށް ހަރަކާތްތެރިވާ މިނިސްޓަރ އޮފް ޖެންޑަރ، ފެމެލީ އެންޑް ސޯޝަލް ސަރވިސަސް، ޢާއިޝަތު މުޙައްމަދު ދީދީއާއި، އެ މިނިސްޓްރީގެ ދަށުން ހިނގަމުންދާ މަރުކަޒުތަކުގެ އިސްފަރާތްތަކާއި، އަދި، ކަމާގުޅޭ އެހެން އިދާރާތަކުގެ އިސްފަރާތްތަކާއެކު ބައްދަލުކުރައްވައި އެމަސައްކަތް ކުރިޔަށްދާގޮތާ ބެހޭގޮތުން މަޝްވަރާކުރައްވައިފި އެވެ.
އޮންލައިންކޮށް ބޭއްވެވި މި މަޝްވަރާ ބައްދަލުވުމުގައި ރައީސުލްޖުމްހޫރިއްޔާގެ ނައިބު ވަނީ ކޯވިޑް-19ގެ ސަބަބުން އެހީތެރިކަމަށް ބޭނުންވެފައިވާ މީހުންނަށް އެހީތެރިކަން ފޯރުކޮށްދިނުމުގެ ކަންކަން ހިނގަމުންދާ ގޮތުގެ އެންމެ ފަހުގެ މަޢޫލޫމާތު އޮޅުން ފިލުއްވާފަ އެވެ. އޭގެ އިތުރުން، އިޖްތިމާޢީ ރައްކާތެރިކަން ކަށަވަރު ކޮށްދިނުމަށް ކުރިޔަށްގެންދެވޭ މަސައްކަތްތަކާއި ޚާއްޞަކޮށް މިނިސްޓްރީ އޮފް ޖެންޑަރ، ފެމެލީ އެންޑް ސޯޝަލް ސަރވިސަސްގެ ބެލުމުގެ ދަށުން ހިނގަމުންދާ ފިޔަވައްޗާއި ކުޑަކުދިންގެ ހިޔާގެ އިތުރުން ގުރައިދޫގައި ހުންނަ ޚާއްޞަ އެހީއަށް ބޭނުންވާ މީހުންގެ މަޒުކަޒާއި އަދި ނެޝަނަލް ޑްރަގް އެޖެންސީގެ ދަށުން ހިނގަމުންދާ މަރުކަޒުތަކުގައި ތިބި މީހުންގެ ކަންކަން މި ކޯވިޑް ބަލިމަޑުކަމުގެ ޙާލަތުގައި ކުރިޔަށް ގެންދެވޭގޮތާއި އަދި ކަންކަން ކުރިޔަށް ރާވާލެވިފައިވާ ގޮތުގެ ޕްލޭން ތަކާބެހޭ މަޢުލޫމާތު ތައްވެސް އެމަނިކުފާނު އޮޅުންފިލުއްވި އެވެ.
މީގެ އިތުރުން ޚާއްޞަ ބަލިތަކަށް ފަރުވާކުރާ މީހުންނަށް ބޭސްލިބުން ފަދަ އިންތިޒާމުތަކާއި، ވަގުތީ ބޭނުމެއްގައި މާލެއައިސް ރަށަށް ނުދެވި ތިބި ފަރާތްތަކަށް އެހީތެރިވުމާއި، ރަށަށް ބަދަލުވުމުގެ ކަންކަން އިންތިޒާމު ކުރެވިފައިވާ ގޮތްތަކާ ބެހޭގޮތުން ވެސް ރައީސުލްޖުމްހޫރިއްޔާގެ ނައިބު ވަނީ މަޢުލޫމާތު އޮޅުންފިލުއްވާފަ އެވެ.
މި ބައްދަލުވުމުގައި އިދާރާތަކުން ބައިވެރިވި ފަރާތްތަކުން ވަނީ ކޯވިޑް-19ގެ ޙާލަތުގައި އެ އިދާރާތަކުން ކުރަމުން އަންނަ މަސައްކަތްތަކުގެ ތަފްޞީލުތައް ރައީސުލްޖުމްހޫރިއްޔާގެ ނައިބާ ޙިއްޞާ ކުރައްވާފަ އެވެ.
ރައީސުލްޖުމްހޫރިއްޔާގެ ނައިބު ވަނީ މި ޙާލަތުގައި އެހީއަށް ބޭނުންފައިވާ ފަރާތްތަކުގެ ކަންކަން ބެލެހެއްޓުމަށް ހުރިހާ އިދާރާތައް ގުޅިގެން ކުރަމުންގެންދާ މަސައްކަތްތައް ފާހަގަކުރައްވައި އެ ފަރާތްތަކަށް ޝުކުރު އަދާކުރައްވާފަ އެވެ. އަދި، އެކަންކަމުގެ ތެރެއިން އިތުރަށް ރަނގަޅު ކުރަންޖެހޭ ކަންކަން ދެނެގަނެ އެހީތެރިކަމަށް ބޭނުންވެފައިވާ ފަރާތްތަކާއި މިނިސްޓްރީ އޮފް ޖެންޑަރ، ފެމެލީ އެންޑް ސޯޝަލް ސަރވިސަސްގެ ދަށުން ހިނގަމުންދާ އިދާރާތަކުގެ ބެލުމުގެ ދަށުގައި ތިބި ފަރާތްތަކުގެ ކަންކަން ވީހާވެސް ރަނގަޅަށް ބަލަހައްޓަވަމުން ގެންދެވުމަށް ރައީސުލްޖުމްހޫރިއްޔާގެ ނައިބު ވަނީ އެދިވަޑައި ގަންނަވާފަ އެވެ.
