އަވަށްޓެރި ގައުމުތަކަށް ދިވެހިން ބޭސް ފަރުވާއަށް ފޮނުވުމާމެދު މަޝްވަރާ ކުރަނީ
18 މެއި 2020 | ހޯމަ 06:46ލިސްޓެއް އެކުލަވާލާފައިވާ ކަމަށް ވިދާޅުވި
އެންއީއޯސީން އާދިއްތަ ދުވަހުގެރޭ ބޭއްވި ޕްރެސްކޮންފަރެންސްގެ ތެރެއިން
ކޮވިޑް-19 އާ ގުޅިގެން މާލެ ލޮކްޑައުންކޮށް، ބައިނަލްއަޤުވާމީ ވައިގެ ބަނދަރު ބަންދުކޮށްފައިވާ މި ޙާލަތުގައި އާސަންދަ މެދުވެރިކޮށް އިންޑިއާ އަށާއި ސްރިލަންކާ އަށް ބޭސްފަރުވާ ކުރަން ދެވޭނެ އިންތިޒާމު ހަމަޖެއްސުމަށް އެ ޤައުމުތަކުގެ ސަރުކާރާއެކު މަޝްވަރާ ކުރަން ފަށައިފި އެވެ.
އާދިއްތަ ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އެ ސެންޓަރުގެ ތަރުޖަމާނު މުޙައްމަދު މަބްރޫކް އަޒީޒް ވިދާޅުވީ، ރާއްޖެއިން ބޭރަށް ބޭސްފަރުވާ ދާން އެދި އެކި ފަރާތްތަކުން ހުށައަޅާފައިވާ ކަމަށެވެ. އެހެން ކަމުން އިންޑިއާ އާއި ސްރީލަންކާ ސަރުކާރާއެކު މިކަމާއި ގުޅޭ މަޝްވަރާ ކުރަމުން އަންނަ ކަމަށެވެ.
ބޭރުގެ ޤައުމުތަކަށް ބޭސްފަރުވާ ހޯދަން ގެންދިޔުުމާމެދު ސަރުކާރުން މަޝްވަރާކުރަން ފަށާފައި ވާއިރު، އިންޑިއާ އަދި ސްރީލަންކާ އަށް ބޭސް ފަރުވާ ހޯދަން ގިނަ ބަޔަކު މިހާރުވެސް އެބަތިއްބެވެ. އެ މީހުންގެ ތެރެއިން ގިނަ މީހުންނަކީ އާސަންދަ މެދުވެރިކޮށް އެ ޤައުމަށް ދިޔަ މީހުންނެވެ. އިންޑިއާ އަދި ސްރީލަންކާ ލޮކްޑައުން ކުރުމާއި ގުޅިގެން އެ ޤައުމުގައި ތާށިވެފައި ތިބި ދިވެހިން ގެނައުމުގެ މަސައްކަތް ސަރުކާރުން ދަނީ ކުރަމުންނެވެ. އެގޮތުން ގިނަ ޢަދަދެއްގެ ދިވެހިން ވަނީ ރާއްޖެއަށް ގެނެސްފަ އެވެ.
