10 ކުޅުންތެރިން އެކުގައި ތަމްރީނު ހެދުމުގެ ހުއްދަ ސްޕެނިޝް ކްލަބުތަކަށް ދީފި

ސްޕެނިޝް ލީގުގެ ކްލަބުތަކަށް ހޯމަ ދުވަހުން ފެށިގެން 10 ކުޅުންތެރިން އެކުގައި ތަމްރީނު ހެދުމުގެ ހުއްދަ ލަލީގާ އިން ދީފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން މިދިޔަ މާޗު މަހު ސްޕެނިޝް ލީގުގެ ކުޅުން ހުއްޓާލި ނަމަވެސް، މިމަހުގެ ހަތަރުވަނަ ދުވަހުން ފެށިގެން ކުޅުންތެރިން އެކަނި ތަމްރީނުތައް ހެދުމުގެ ހުއްދަ ސްޕެއިން ސަރުކާރުންވަނީ ދީފަ އެވެ. އެއާއެކު ގިނަ ކްލަބުތަކުގެ ކުޅުންތެރިން ވަނީ އެކަނި ތަމްރީނުތަކަށް ނުކުމެފައެވެ.

ލީގު އަލުން ފަށަން ކުރަމުން އަންނަ މަސައްކަތުގެ ތެރެއިން ލަލީގާ އިން ވަނީ ހޯމަ ދުވަހުން ފަށައިގެން 10 ކުޅުންތެރިން އެކުގައި ތަމްރީނުތައް ހެދުމުގެ ހުއްދަ ދީފައެވެ. 10 ކުޅުންތެރިން އެކުގައި ތަމްރީނުތައް ހަދަން ލަލީގާ އިން ހުއްދަ ދިނީ އުސޫލަތަކެއް ކަނޑައެޅުމަށްފަހު އެވެ. އެގޮތުން ކުޅުންތެރިން ޓްރެއިނިން ފެސިލިޓީއަށް އަންނަން ޖެހޭނީ އަދި އެނބުރި ދާންވެސް ޖެހޭނީ އެކަންޏެވެ. އަދި ޖިމް ބޭނުން ކުރުމުގެ ހުއްދަ ދީފައިވާއިރު، ތަމްރީނުތަކަށްފަހު ޑިސްއިންފެކްޓް ކުރަންވެސް ވަނީ އަންގާފައެވެ.

ސްޕެނިޝް ލީގު އަލުން ފެށުމަށް މަސައްކަތް ކުރަމުން އަންނައިރު، މީގެ ކުރިން ލަލީގާގެ ރައީސް ހާވިއޭ ޓެބާސް ވަނީ މެދުކަނޑާލާފައިވާ ސްޕެނިޝް ލީގު ޖޫން މަހުގެ 12 ވަނަ ދުވަހު ފެށޭނެ ކަމަށް އުންމީދު ކުރައްވާ ކަމަށްވެސް ވިދާޅުވެފައެވެ.

ސްޕެނިޝް ލީގު އަލުން ފަށަން ތައްޔާރު ވަމުންދާއިރު، ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 އަށް ޓެސްޓު ކޮށްފަ އެވެ. އެއާއެކު ދެ ޑިވިޝަނުން މީގެ ކުރިން ފަސް ކުޅުންތެރިއަކު ވަނީ ކޮވިޑް-19 އަށް ޕޮޒިޓިވްވެފަ އެވެ.