"ގައިގޯޅިވެ އުފާފާޅު ކުރިޔަސް އަދަބެއް ނުދޭނެ"

ލަނޑު ޖެހުމަށްފަހު ކުޅުންތެރިން ގައިގޯޅިވެ އުފާފާޅު ކުރިޔަސް އަދަބެއް ނުދޭނެ ކަމަށް ޖަރުމަން ފުޓްބޯލް ލީގު (ޑީއެފްއެލް) އިން ބުނެފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލި ޖަރުމަން ލީގުގެ ކުޅުން ހޮނިހިރު ދުވަހު ފެށިއިރު، މިއީ ޔޫރަޕްގެ ގަދަ ފަސް ލީގުގެ ތެރެއިން ކުޅުން ފެށި ފުރަތަމަ ލީގެވެ. ޖަރުމަން ލީގުގެ މެޗުތައް ކުރިއަށް ގެންދަން ނިންމާފައިވަނީ ދަނޑަށް ސަޕޯޓަރުން ނުވައްދައެވެ.

ޖަރުމަން ލީގު ފެށުމުގެ ކުރިން ހުރިހާ ކުޅުންތެރިން ކޮވިޑް-19 އަށް ޓެސްތު ކޮށްފައިވާއިރު، އަލުން މެޗުތައް ފެށީ ޓީމުތަކުން އަމަލުކުރަންޖެހޭ އުސޫލުތަކެއް ކަނޑައެޅުމަށް ފަހު އެވެ. އެ ގޮތުން މެޗު ފެށުމުގެ ކުރިން ސަލާން ކުރުން މަނާ ކޮށްފައިވާއިރު، ބެންޗުގައި ތިބޭ ކުޅުންތެރިންގެ ދެމެދުގައި ވެސް އެކަށީގެންވާ ދުރުމިނެއް ބަހައްޓަން ވަނީ އަންގާފައެވެ. އަދި މެޗު ކުޅޭ ބޯޅަތައް ޑިސްއިންފެކްޓް ކުރަން ވެސް ވަނީ އަންގާފައެވެ.

ހޮނިހިރު ދުވަހުގެރޭ ލީގުގެ ހަ މެޗެއް ކުޅުނުއިރު ލަނޑު ޖެހުމަށް ފަހު ގިނަ ކުޅުންތެރިން ގައިގޯޅިވެ އުފާފާޅު ކޮށްފައެއް ނުވެއެވެ. އެކަމަކު ހޮނިހިރު ދުވަހުގެރޭ ހޮފެންހައިމް އަތުން 3-0 އިން ހާތާ ބާލިން މޮޅުވި މެޗުގައި އެ ޓީމުގެ ކުޅުންތެރިން ލަނޑު ޖެހުމަށް ފަހު އަދި މެޗަށް ފަހު ވެސް ވަރަށް ބޮޑަށް ގައިގޯޅިވެ ވަނީ އުފާފާޅުކޮށްފައެވެ.

ހާތާގެ ކުޅުންތެރިންގެ މެދުގައި ހިނގައިދިޔަ ކަންތައްތަކާ ބެހޭގޮތުން ޑީއެފްއެލްގެ އޮފިޝަލަކު ބުނީ ގަވާއިދުތައް ހެދިއިރު ލަނޑު ޖެހުމަށް ފަހު އުފާފާޅުކުރުމުން ދޭނެ އަދަބެއް ލިޔެވިފައި ނުވާ ކަމަށެވެ. އެކަމަކު ލަނޑު ޖެހުމަށްފަހު ކުޅުންތެރިން ގައިގޯޅިވެ އުފާފާޅު ނުކުރަން ވަނީ ލަފާ ދީފައެވެ.

ހާއްސަ އުސޫލުތަކެއް ކަނޑައެޅުމަށްފަހު ޖަރުމަން ލީގު ހޮނިހިރު ދުވަހު ފެށިއިރު، ޖޫން މަހުގެ 28 ވަނަ ދުވަހު ލީގުގެ ކުޅުން އެއްކޮށް ނިންމާލަން ޖަރުމަން ފުޓްބޯލް ލީގުން ވަނީ ނިންމާފައެވެ.