ޗެމްޕިއަންސް ލީގު ނުލިބުނަސް ލިވަޕޫލްއިން އުފާފާޅުކުރާނެ
ލިވަޕޫލްއާ ރެއާލް މެޑްރިޑް ބައްދަލުކުރާ ޗެމްޕިއަންސް ލީގުގެ ފައިނަލް މެޗު އޮންނާނީ ހޮނިހިރު ދުވަހުގެރޭ
އެފްއޭކަޕް ތަށްޓާއެކު ލިވަޕޫލް ކުޅުންތެރިން އުފާފާޅުކުރަނީ: ފޮޓޯ-ލިވަޕޫލް
މި ސީޒަންގެ ޗެމްޕިއަންސް ލީގު ކާމިޔާބު ނުކުރެވުނަސް ލިވަޕޫލްއިން އުފާ ފާޅުކުރާނެ ކަމަށް އެޓީމުން ބުނެފިއެވެ.
ލިވަޕޫލްއާ ރެއާލް މެޑްރިޑް ބައްދަލުކުރާ ޗެމްޕިއަންސް ލީގުގެ ފައިނަލް މެޗު އޮންނާނީ ހޮނިހިރު ދުވަހުގެރޭ ރާއްޖެ ގަޑިން 12 ޖަހާއިރުއެވެ. ލިވަޕޫލްއިން ބުނީ މި މެޗުން މޮޅު ނުވި ނަމަވެސް އާދީއްތަ ދުވަހު އެޓީމުން އުފާ ފާޅުކުރަން ނިންމާފައިވާ ކަމަށެވެ. އެގޮތުން އާދީއްތަ ދުވަހު ލިވަޕޫލްގައި އޯޕަން ޓޮޕް ބަސް ޕެރޭޑެއް ބޭއްވުމަށް ލިވަޕޫލްއިން ވަނީ ނިންމާފައެވެ.
މި ސީޒަނަކީ ލިވަޕޫލަށް ކާމިޔާބު ސީޒަނެކެވެ. މި ސީޒަންގައި އެޓީމު ވަނީ ކަރަބާއޯ ކަޕްގެ އިތުރުން އިނގިރޭސި އެފްއޭ ކަޕް ކާމިޔާބު ކޮށްފައެވެ. އަދި ޕްރިމިއަރ ލީގުގައި ލިވަޕޫލް ދެވަނަ ހޯދިއެވެ. ޕްރިމިއަރ ލީގުގައި ލިވަޕޫލްއަށް އެއްވަނަ ނުލިބުނީ ޕޮއިންޓެއްގެ ފަރަގުން މެންޗެސްޓަރ ސިޓީ ކުރި ހޯދުމުންނެވެ.
ލިވަޕޫލްއިން އުފާ ފާޅުކުރަން ނިންމީ މިސީޒަން އެޓީމަށް ކާމިޔާބުކަމާއެކު ނިންމާލެވުމުން ކަމަށް ޓީމުގެ ކޯޗު ޔަގަން ކްލޮޕް ބުންޏެވެ. ޕްރިމިއަރ ލީގުގެ ޗެމްޕިއަންކަން ނުލިބުނު ނަމަވެސް ލީގުގެ މަތީ ފަންތީގައި ލިވަޕޫލް ވަނީ މުބާރާތް ނިންމާލާފައެވެ. ޗެމްޕިއަންސް ލީގު ފައިނަލުގައި ރެއާލް އަތުން ބަލިވި ނަމަވެސް އެޓީމަށް މުބާރާތުގެ ދެވަނަ ލިބޭނެއެވެ.
ލިވަޕޫލްގެ ފިރިހެން ޓީމުގެ އިތުރުން އަންހެން ޓީމުވެސް މި އުފާ ފާޅުކުރުމުގައި ބައިވެރިވާނެއެވެ. ލިވަޕޫލްގެ އަންހެން ޓީމު ވަނީ ވިމެންސް ސުޕަ ލީގަށް ޕްރޮމޯޓްވެފައެވެ.
