މި ސީޒަންގެ ސްޕެނިޝް ލީގު ކާމިޔާބު ކުރުމަށްފަހު ރެއާލް މެޑްރިޑްގެ ކޯޗު ކާލޯ އަންޗެލޯޓީ، އެޓީމަށް ކުރިން ކުޅުނު ލެޖެންޑުންނާއެކު އުފާފާޅުކޮށްފިއެވެ.

ރެއާލްއަށް މުބާރާތުގެ ޗެމްޕިއަންކަން ކަށަވަރުވީ ލީގުގައި އެސްޕާންޔޯލްއާއި ވާދަކޮށް 4-0ން މޮޅުވުމުންނެވެ. ހޮނިހިރު ދުވަހުގެރޭ ކުޅުނު މި މެޗުން މޮޅުވުމާއެކު ތާވަލުގެ އެއްވަނާގައި ރެއާލް އޮތީ 31 މެޗު ކުޅެގެން 81 ޕޮއިންޓު ހޯދައިގެންނެވެ.

ލަލީގާގެ ތައްޓަކީ އަންޗެލޯޓީގެ ޓްރޮފީ ކެބިނެޓުން މަދުވެފައިވާ ހަމައެކަނި ޓްރޮފީއެވެ. މުބާރާާތް ކާމިޔާބު ކުރެވުމާއެކު އަންޗެލޯޓީ ވަނީ ޔޫރަޕުގެ ގަދަ ފަސް ލީގު ކަމުގަައިވާ ލަލީގާ، އިޓާލިއަން ލީގު، ޕްރިމިއަރ ލީގު، ފްރެންޗް ލީގު އަދި ބުންޑެސްލީގާ ކާމިޔާބުކުރި ފުރަތަމަ ކޯޗަށް ވެފައެވެ. އަންޗެލޯޓީ ވަނީ މި ލީގުތަކުގެ އިތުރުން، ޔުއެފާ ޗެމްޕިއަންސް ލީގުވެސް ތިން ފަހަރަށް ކާމިޔާބުކޮށްފައެވެ.

މި އުފާފާޅުކުރުމުގެ އަންޗެލޯޓީއާއެކު ބައިވެރިވި ރެއާލްގެ ލެޖެންޑުންގެ ތެރޭގައި ހިމެނެނީ ރޮނާލްޑޯ ނަޒާރިއޯ، ލުއިސް ފީގޯ، ފެނާންޑޯ އަދި މިކޭލް ގޮންޒާލޭޒްއެވެ. ކްލިނިކާ މެނޯކާގެ ފައުންޑަރ އަދި ޑިރެކްޓަރ، ޑޮކްޓަރ އެންހެލް މާޓިންގެ ގޭގައި ކުރިއަށް ގެންދިޔަ މި އުފާފާޅުކުރުމުގައި ގިނަ އަދަދެއްގެ ޓެނިސް ކުޅުންތެރިންވެސް ބައިވެރިވިއެވެ. އޭގެ ތެރޭގައި މެޑްރިޑްގެ ސަޕޯޓަރެއް ކަމުގައިވާ ޓެނިސް ޗެމްޕިއަން ރަފާ ނަޑޭލްވެސް ހިމެނެއެވެ. ނަޑޭލްގެ ކޯޗުލް ކާލޯސް މޮޔާވެސް މި އުފާފާޅުކުރުމުގައި ބައިވެރިވިއެވެ.

މިއީ ރެއާލް މެޑްރިޑުން ލަލީގާ ކާމިޔާބުކުރި 35 ވަނަ ފަހަރެވެ.