ކޮވިޑް-19: ޚަރަދު ކުޑަކުރުމުގެ ގޮތުން މުސާރައާއި އިނާޔަތަށް ގެނައި ބަދަލު ރައްޔިތުންގެ މަޖިލީހަށް ހުށަހަޅައިފި

ރާއްޖޭގައި ކޮވިޑް-19 ރޯގާ ފެތުރި، "ކޮމިއުނިޓީ ސްޕްރެޑް" އާއެކު ޙާލަތު އިތުރަށް ގޯސްވުމާއި ގުޅިގެން، ދައުލަތުގެ ޚަރަދު ކުޑަކުރުމުގެ ގޮތުން މުވައްޒަފުންގެ މުސާރައާއި އިނާޔަތްތަކުން އުނިކުރުމަށް ނިންމާފައިވާ ގޮތުގެ ތަފުސީލު ފިނޭންސް މިނިސްޓްރީން ރައްޔިތުންގެ މަޖިލީހަށް ފޮނުވައިފި އެވެ.

އެގޮތުން ފިނޭންސް މިނިސްޓްރު އިބްރާހީމް އަމީރު ރައްޔިތުންގެ މަޖިލީހަށް ފޮނުއްވާފައިވާ ލިޔުމުގައި ވާގޮތުން، ދައުލަތުގެ އެންމެހައި މުވައްޒަފުންގެ އަސާސީ މުސާރައިގެ ނިސްބަތުން އަސާސީ މުސާރައިން އުނިކުރަން ނިންމާފައި ވަނީ، 20،001ރ އަށްވުރެ މަތިން އަސާސީ މުސާރަ ލިބޭ ފަރާތްތަކުގެ މުސާރައިން ނެވެ.

Advertisement

އަސާސީ މުސާރަ އުނިކުރާ މިންވަރަކީ:

1. 20،000ރ އަށްވުރެ ދަށް: 0 ޕަސެންޓް

2. 20،001ރ - 30،000ރ: 20 ޕަސެންޓް

3. 30،001ރ - 60،000ރ: 30 ޕަސެންޓް

4. 60،001ރ އަށްވުރެ މަތި: 35 ޕަސެންޓް

މިނިސްޓަރުގެ ނައިބާއި އެ ފެންވަރުގެ މަގާމުތަކުން ފެށިގެން މަތީ މަގާމުތަކުގެ ތެރެއިން، އަސާސީ މުސާރަ 20،000ރ އަށް ވުރެ ދަށްވިނަމަވެސް، އެމަގާމުތަކުގެ އަސާސީ މުސާރައިން %20 އުނިކުރުމާއި، އަދި މިނިސްޓަރުގެ ނައިބާއި އެފެންވަރުގެ މަގާމުތަކުން ފެށިގެން މަތީ މަގާމުތަކުގެ ތެރެއިން، އަސާސީ މުސާރަ 20،000ރ އަށްވުރެމަތި ސިޔާސީ މަގާމުތަކުގެ މުސާރަ މަތީގައި ބަޔާންކޮށްފައިވާ ގޮތުގެ މަތިން އުނިކުރަށް ފިނޭންސް މިނިސްޓްރީން ވަނީ ނިންމާފަ އެވެ.

މީގެ އިތުރުން ފިނޭންސް މިނިސްޓްރީން ވަނީ، ދައުލަތުގެ އެންމެހާ މުވައްޒަފުންގެ ގެއަށް ގެންދަން ލިބޭ ޖުމުލަ މުސާރަ (ޓޭކް ހޯމް ޕޭ) އަށް ސީލިންގ އެއް ކަނޑައަޅާފަ އެވެ.

ޖުމުލަ މުސާރައިން އެންމެ ގިނައިން ގެއަށް (ޓޭކް ހޯމް ޕޭ) ގެންދެވޭނެ މިންވަރު:

1. އަސާސީ މުސާރަ 10،000ރ އަށް ވުރެ ދަށް: 25،000ރ

2. އަސާސީ މުސާރަ 10،001ރ - 15،000ރ: 30،000ރ

3. އަސާސީ މުސާރަ 15،001ރ - 20،000ރ: 35،000ރ

4. އަސާސީ މުސާރަ 20،001ރ - 25،000ރ: 40،000ރ

5. އަސާސީ މުސާރަ 25،001ރ - 30،000ރ: 45،000ރ

6. އަސާސީ މުސާރަ 30،001ރ - 40،000ރ: 50،000ރ

7. އަސާސީ މުސާރަ 40،001ރ - 50،000ރ: 55،000ރ

8. އަސާސީ މުސާރަ 50،001ރ - 60،000ރ: 60،000ރ

9. އަސާސީ މުސާރަ 60،001ރ - 80،000ރ: 65،000ރ

10. އަސާސީ މުސާރަ 80،001ރ އަށް ވުރެ މަތި: 70،000ރ

މިސާލަކަށް: އަސާސީ މުސާރައިގެ ގޮތުގައި 21،000ރ ލިބޭ ފަރާތަކަށް، އެހެން އެލަވަންސްތައް ހިމަނައިގެން ގެއަށް ގެންދަން ލިބޭ މުސާރަ 40،000ރ އަށްވުރެ މަތިނަމަ، އޭނާއަށް ޖުމުިލަ ލިބޭނީ 40،000ރ އެވެ. އަދި އޭނާގެ މުސާރަ އާއި އިނާޔަތްތައް މި ސީލިންގއަށް ވުރެ ދަށްނަމަ، ދޭނީ އެ އަދަދެކެވެ.

ނަމަވެސް ނޭޝަނަަލް ޑިޒާސްޓަރ މެނޭޖްމަންޓް އޮތޯރިޓީގެ މުވައްޒަފުންނާއި، ހެލްތު ޕްރޮޓެކްޝަން އެޖެންސީގެ މުވައްޒަފުން އަދި ސިއްހީ ޚިދުމަތްދޭ މަރުކަޒުތަކާއި ހޮސްޕިޓަލުތަކުގެ މުވައްޒަފުންގެ ތެރެއިން ރައީސުލްޖުމްހޫރިއްޔާ އައްޔަން ކުރާ މަގާމުތައް ފިޔަވައި އެހެން މުވައްޒަފުން އެ އުސޫލުން އިސްތިޘްނާ ކޮށްފައި ވެއެވެ.

ފިނޭންސް މިނިސްޓްރީން ބުނެފައިވާ ގޮތުގައި، މި އުސޫލަށް އަމަލު ކުރަން ނިންމާފައިވަނީ މެއި 2020ގެ މުސާރައިން ފެށިގެން ނެވެ. އަދި ގައުމަށް ދިމާވެފައިވާ އިގްތިޞާދީ ހާލަތާއި ދައުލަތުގެ މާލިއްޔަތަށް ދިމާވެފައިވާ ހާލަތަށް ރިއާޔަތްކޮށް، ފިނޭންސް މިނިސްޓްރީން ވަކިގޮތެއް އަންގަންދެން މި ފިޔަވަޅުތައް ދެމެހެއްޓުމަށް ވެސް ފިނޭންސް މިނިސްޓްރީން ވަނީ ނިންމާފަ އެވެ.

ފިނޭންސް މިނިސްޓަރ އަމީރު ރައްޔިތުންގެ މަޖިލީހަށް ފޮނުއްވާފައިވާ މި ލިޔުމުގައި އެދިވަޑައިގަންނަވާފައި ވަނީ، މި އުސޫލުތަކާ އެއްގޮތަށް ސަރުކާރުން ކަނޑައަޅާ މަގާމުތަކުގެ މުސާރަތައް ބަދަލު ކުރުމަށް މިހާރު ނިންމާފައިވާ ކަމަށާއި، މި އުސޫލުތަކަށް ރިއާޔަތް ކުރައްވައި، ރައްޔިތުންގެ މަޖިލީހުން ކަނޑައަޅުއްވާ ދައުލަތުގެ މަގާމުތަކުގެ މުސާރަތައް، ފެނިވަޑައިގަންނަވާ ގޮތަކަށް ކަނޑައަޅުއްވައި ދެއްވުމަށެވެ.