ރާއްޖޭގައި ތިބި ތައިލެންޑުގެ 148 މީހަކު ގެންގޮސްފި
17 މެއި 2020 | އާދީއްތަ 07:39ގެންގޮސްފައިވަނީ މޯލްޑިވިއަންގެ ޗާޓަރޑް ފްލައިޓެއްގައި
ރާއްޖޭގައި ތިބި ތައިލެންޑް މީހުން ފުރަން އެއަރޕޯޓުގައި
ކޮވިޑް-19 ގެ ސަބަބުން ރާއްޖޭގައި ތާށިވެފައި ތިބ ތައިލެންޑްގެ ރައްޔިތުންގެ ތެރެއިން 148 މީހަކު އަނބުރާ ގައުމަށް ގެންގޮސްފި އެވެ.
ރާއްޖޭގައި ހުންނަ ތައިލެންޑްގެ އޮނަރަރީ ކޮންސަލްޓެންޓުން ކޮށްފައިވާ ޓްވީޓެއްގައި ބުނީ، ރާއްޖޭގައި ތިބި ތައިލެންޑް މީހުން އަނބުރާ ގައުމަށް ގެންދިޔުމަށް ކުރަމުންދާ މަސައްކަތުގެ ތެރެއިން އާދިއްތަ ދުވަހު އެ ގައުމުގެ 148 ރައްޔިތަކު ފުރުވާލާފައިވާ ކަމަށެވެ. އެ މީހުން ގެންދިޔައީ މޯލްޑިވިއަންގެ ޗާޓަރޑް ފްލައިޓެއްގަ އެެވެ.
މިއީ ރާއްޖޭގައި ތިބި ތައިލޭންޑް މީހުންގެ އަނބުރާ ޤައުމަށް ގެންދިޔުމަށް އެޤައުމުގެ ސަރުކާރުން ކުރަމުންދާ މަސައްކަތުގެ ތެރެއިން، ބޭއްވި ތިން ވަނަ ފްލައިޓެވެ. އަނބުރާ ތައިލޭންްޑަށް ދާން ބޭނުންވާ ރާއްޖޭގައި ދިރިއުޅޭ ތައިލޭންޑުގެ އެންމެހައި ފަރާތްތަކަށް ވަނީ ފުރުޞަތު ހުޅުވާލާފަ އެވެ. ނަން ނޯޓުކުރުމުގެ ފުރުޞަތު ހުޅުވާލާފައި އޮތީ މެއި މަހުގެ 17 ވަނަ ދުވަހުގެ ނިޔަލަށެވެ.
މާލެ ލޮކްޑައުން ކުރުމާއި ގުޅިގެން ރާއްޖޭގައި ދިރިއުޅޭ ބިދޭސީން ގައުމަށް ފޮނުވާލުމުގެ މަސައްކަތް ފޮރިން މިނިސްޓްރީއާ ގުޅިގެން އެކި ގައުމުތަކުން ދަނީ ކުރަމުންނެވެ. އެގޮތުން މިހާތަނަށް ސްރީލަންކާ، ކޮރެޔާ، ޖަޕާނު، ބަންގްލަދޭޝްގެ އިތުރުން އިންޑިއާގެ ގިނަ ރައްޔިތުންތަކެއް ވަނީ ގެންގޮސްފަ އެވެ.
