ކޮވިޑް-19 ޖެހިގެން ރާއްޖޭގައި ރަނގަޅުވި މީހުންގެ އަދަދު 59ށް

ރާއްޖޭގައި ކޮވިޑް-19 ޖެހިގެން މިހާތަނަށް ރަނގަޅުވި މީހުންގެ އަދަދު 59 ށް އަރައިފި އެވެ.

ކޮވިޑް-19 ޓާސްކް ފޯހުގެ ފަރާތުން ހޮނިހިރު ދުވަހު ކުރިޔަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެލްތް ޕްރޮޓެކްޝަން އެޖެންސީ(އެޗްޕީއޭ) ގެ ޑޮކްޓަރ، ޑޮކްޓަރ އިބްރާހީމް އަފްޒަލް ވިދާޅުވީ ހުކުރު ދުވަހު 13 މީހުން ރަނގަޅުވެފައިވާ ކަމަށެވެ.

މީގެތެރޭގައި ހިމެނެނީ 9 ދިވެހިންނާއި، އިންޑިޔާ މީހަކާއި، ބަންގްލަދޭޝް މީހެއްގެ އިތުރުން ޕާކިސްތާން މީހެއް އަދި ސްރީލަންކާ މީހެއް ކަމަށް ޑރ. އަފްޒަލް ވިދާޅުވި އެވެ. މިއަދުވެސް ބަޔަކު ރަނގަޅުވި ކަމަށާއި ނަމަވެސް އެމީހުންގެ މައުލޫމާތު ފަހުން ހާމަކުރާނެ ކަމަށް ޑރ އަފްޒަލް ވިދާޅުވި އެވެ.

ޑޭޝްބޯޑުން ފެންނަ ގޮތުގައި ރާއްޖޭގައި ރިކަވަރީ ރޭޓް އުޅެނީ 5.83 އިންސައްތައިގަ އެވެ. މީގެކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވެފައިވަނީ ރާއްޖޭގައި ރިކަވަރީ ރޭޓް އުޅެނީ ދަށްކޮށް ކަމަށެވެ.

މިހާތަނަށް ރާއްޖެއިން ކޮވިޑް-19 1,078 މީހަކަށް ވަނީ ޖެހިފަ އެވެ. މީގެތެރެއިން 4 މީހަކު ވަނީ ނިޔާވެފަ އެވެ. މިވަގުތު 1013 މީހަކަށް އަންނަނީ ފަރުވާ ދެމުންނެވެ.