ރިހެބުން ތިން މީހަކު ކޮވިޑް-19 އަށް ޕޮޒިޓިވްވީ ކިހިނެއްކަމެއް ނޭންގޭ
16 މެއި 2020 | ހޮނިހިރު 00:22އޭޕްރީލް 13 އިން ފެށިގެން ރިހެބް ސެންޓަރަށް މީހުން އައިސްގޮސް ނުހަދާ
ނޭޝަނަލް ޑްރަގް އެޖެންސީ - މަސްތުވާތަކެތީގެ ވަބާގައި ޖެހިފައިވާ މީހުންނަށް ލޮކްޑައުންގައިވެސް އަންނަނީ އެހީތެރިކަން ފޯރުކޮށްދެމުން
ކ. ހިންމަފުށީގައި ހުންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުން ފަރުވާ ހޯދަމުން އަންނަ ތިން މީހަކު ކޮވިޑް-19 އަށް ޕޮޒިޓިވްވީ ކިހިނެއްކަމެއް ނޭނގޭކަމަށް ނޭޝަނަލް ޑްރަގް އެޖެންސީގެ ލީގަލް އޮފިސަރ އަހުމަދު ހިލްމީ ވިދާޅުވެއްޖެ އެވެ.
ރާއްޖެޓީވީން ގެންނަ "ކޮވިޑް-19 ޚާއްސަ ކަވަރޭޖް" ގައި މިކަމާއި ގުޅޭގޮތުން ވާހަކަ ދައްކަވަމުން ހިލްމީ ވިދާޅުވީ ލޮކްޑައުންއާ ގުޅިގެން ނޭޝަނަލް ޑްރަގް އެޖެންސީން މިހާރު ޚިދުމަތްތައް ދެމުން ގެންދަނީ ގަލޮޅު ދަނޑުގައި ގާއިމުކޮށްފައިވާ ވަގުތީ ޑިޓޮކްސި ސެންޓަރާއި ހިންމަފުށީގައި ހުންނަ ސެންޓަރުގައި ކަމަށެވެ. އެތަންތަނުގައި މީހުން ބައިތިއްބައިގެން މަސައްކަތް ކުރަމުންދާއިރު ނޭޝަނަލް ޑްރަގް އެޖެންސީގެ އެދެމުގެ މަތިން އެ ދެތަނުން ޓެސްޓްކުރުމަށް ސާމްޕަލްތަކެއް ނެގިކަމަށް ހިލްމީ ވިދާޅުވި އެވެ.
މި ސާމްޕަލްތަކުގެ ނަތީޖާ ދައްކާގޮތުން ގަލޮޅު ދަނޑުގައި ހުރި ވަގުތީ ޑިޓޮކްސީ ސެންޓަރުގައި ގާއުމުކޮށްފައި ހުރި ތަނުން ނެގުނު ސާމްޕަލްތައް ނެގެޓިވް ކަމަށް ހިލްމީ ވިދާޅުވި އެވެ. އެހެންނަމަވެސް ހިންމަފުށީގައި ނެގުނު 10 ސާމްޕަލްގެ ތެރެއިން 3 ސާމްޕަލް ޕޮޒިޓިވްވި ކަމަށް ހިލްމީ ވިދާޅުވި އެވެ.
ހިންމަފުށީގައި ހުރި ރިހެބް ސެންޓަރުގެ 3 ސާމްޕަލެއް ޕޮޒިޓިވް ވިއިރު އެފެސިލިޓީގައި ތިބޭނީ ލޮކްޑައުން ވީއިރު ފެސިލިޓީގައި ތިބި ބައެއް ކަމަށް ހިލްމީ ވިދާޅުވި އެވެ. އޭޕްރީލް 13 އިން ފެށިގެން އެތަނަށް މީހުން އައިސްގޮސް ނުހަދާ ކަމަށް ހިލްމީ ވިދާޅުވި އެވެ.
ހިންމަފުށީ ރިހެބް ސެންޓަރުގައި 7 އަންހެނުންނާއި 103 ފިރިހެނުން ފަރުވާ ހޯދަމުންދެ އެވެ.
ހިލްމީ ވިދާޅުވީ ކޮވިޑް-19 ރާއްޖެއަށް ފެތުރުމުގެ ކުރިންވެސް ދިޔައީ އެންމެ ވޯސްޓް ކޭސް ސިނާރިއޯއަކަށް ވިސްނާ ފަރުވާ ހޯދާ ފަރާތްތައް އެތަނުގައި ތިބޭތީވެ މިކަހަލަ ކަމެއް ދިމާވެދާނެ ކަމަށް ބަލާ އެކަމަށް ތައްޔާރުވަމުން ކަމަށެވެ. އެގޮތުން މިފަދަ ހާލަތެއް ދިމާވެއްޖެނަމަ އެތަނުގައި މީހުން އައިސޮލޭޓް ކުރެވޭނެ ގޮތެއް ހަމަޖައްސަމުންދިޔަ ކަމަށް ހިލްމީ ވިދާޅުވި އެވެ. އެހެންކަމުން މީހުން ޕޮޒިޓިވްވުމުން އެމީހުން ބައިތިއްބާފައިވަނީ މިގޮތުގެ މަތިން ގާއިމުކުރެވުނު އައިސޮލޭޓް ތަނުގައި ކަމަށް ހިލްމީ ވިދާޅުވި އެވެ.
އެހެންނަަމަވެސް އެޗްޕީއޭއިން ޕޮޒިޓިވްވާ މީހުން އައިސޮލޭޓް ކުރުމަށް ފެސިލިޓީއަށް ގެންދިޔުމުގެ މަސައްކަތް ކުރަމުންދާ ކަމަށް ހިލްމީ ވިދާޅުވި އެވެ.
ކޮވިޑް-19 އަށް ރާއްޖޭން ޕޮޒިޓިވްވި މީހުންގެ އަދަދު ހާހަކަށްވުރެ މައްޗަށް އަރާފައިވާއިރު، މާލެ ފިޔަވައި މި ބަލީގެ މީހުން ފެނިފައިވަނީ ކ. ހިންމަފުޓާއި ނ. މަނަދޫ، ހއ. އުލިގަމާއި އެ އަތޮޅު ތަކަންދު އާއި ށ. ނަރުދޫ އާއި ށ.މިލަންދޫ އަދި ކ. ތުލުސްދޫންނެވެ.
