ވައިރަހަށް ނެގެޓިވް ވުމުން ރެނަން ލޯޑީ ތަމްރީނުތަކަށް

އެތުލެޓިކޯ މެޑްރިޑަށް ކުޅެމުން އަންނަ ބްރެޒިލްގެ ޑިފެންޑަރު ރެނަން ލޯޑީ ކޮރޯނާވައިރަސް (ކޮވިޑް-19) އަށް ނެގެޓިވް ވުމުން، ތަމްރީނުތަކަށް ނުކުމެއްޖެ އެވެ.

އުމުރުން 22 އަހަރުގެ ރެނަން ލޯޑީ ކޮވިޑް-19 އަށް އެންމެ ފުރަތަމަ ހެދި ޓެސްޓުން ޕޮޒިޓިވްވި ނަމަވެސް، އެއްވެސް އަލާމާތެއް ފެނިފައެއް ނުވެ އެވެ. އަދި ފަހުން ހެދި ޓެސްޓު ނެގެޓިވް ވުމުން އޭނާ ވަނީ އެތުލެޓިކޯގެ ޓްރެއިނިން ސެންޓަރަށް ގޮސް އެކަނި ތަމްރީނުތަކަށް ނުކުމެފަ އެވެ.

މެދުކަނޑާލި ސްޕެނިޝް ލީގު ޖޫން މަހު 20 ވަނަ ދުވަހު އަލުން ފެށަން ސްޕެނިޝް ފުޓްބޯލް ފެޑެރޭޝަނުން މަސައްކަތް ކުރަމުން އަންނައިރު، މިމަހުގެ ހަތަރުވަނަ ދުވަހުން ފެށިގެން ކުޅުންތެރިން އެކަނި ތަމްރީނުތައް ހެދުމުގެ ހުއްދަ ސްޕެއިން ސަރުކާރުން ވަނީ ދީފަ އެވެ. އެކަމަކު ކުޅުންތެރިން އެކުގައި ތަމްރީން ކުރުމުގެ ހުއްދަ އަދި ދީފައެއް ނުވެ އެވެ.

ސްޕެނިޝް ލީގު ފުރިހަމަ ކުރަން ސްޕެނިޝް ފުޓްބޯލް ފެޑެރޭޝަނުން މަސައްކަތް ކުރަމުން އަންނައިރު، ރިޕޯޓުތައް ބުނާ ގޮތުން ލަލީގާގެ ވިސްނުމަކީ މިމަހުގެ 18 ވަނަ ދުވަހު ޓީމުތަކުގެ ހުރިހާ ކުޅުންތެރިން އެކުގައި ތަމްރީނުތައް ހަދަން ފެށުމެވެ.

މީގެ ކުރިން ލަލީގާގެ ރައީސް ހާވިއޭ ޓެބާސް ވަނީ ޖޫން މަހުގެ 12 ވަނަ ދުވަހު ލީގު އަލުން ފެށޭނެ ކަމަށް އުންމީދު ކުރާ ކަމަށް ވިދާޅުވެފަ އެވެ.