ވޯލްޑްކަޕަށް ކޮލިފައިނުވުމުން އެމެރިކާ ކޯޗް އިސްތިއުފާދީފި

1986ވަނަ އަހަރުގެ ފަހުން ފުރަތަމަ ފަހަރަށް އެމެރިކާ ވޯލްޑް ކަޕަށް ކޮލިފައި ނުވުމުގެ ޒިންމާ ނަގައި، ކޯޗް ބްރޫސް އެރީނާ ކޯޗުކަމުން އިސްތިއުފާދީފިއެވެ.

އަންނަ އަހަރު ރަޝިޔާގައި ބާއްވާ ވޯލްޑް ކަޕްގެ ފުރުސަތު އެމެރިކާއަށް ގެއްލުނީ މިދިޔަ އަންގާރަ ދުވަހު ޓްރިނިޑާޑް އެންޑް ޓޮބޭގޯ އަތުން 2 – 1 އިން އެމެރިކާ ބަލިވުމުންނެވެ. އެރީނާ ބުނީ މެޗުން ބަލިވެ، ވޯލްޑް ކަޕުން އެމެރިކާ ކެޓުމުގެ ޒިންމާ ނަގާކަމަށެވެ.

އެމެރިކާގެ ޤައުމީ ފުޓުބޯޅަ ޓީމާއި އެރީނާ، 66 ހަވާލުވީ ކޯޗުކަމުގައި ކުރިން ހުރި ޖަރގަން ކްލިންސްމަން ވަކިކުރުމާއި ގުޅިގެންނެވެ. އޭރު އެމެރިކާ އޮތީ ކޮލިފައިން ގްރޫޕްގެ އެންމެ ފުލުގައެވެ. އަދި އެލްއޭ ގެލެކްސީއަސް ކޯޗްކޮށްދެމުން އައި އެރީނާ އެމެރިކާގެ ޤައުމީ ޓީމާއި ހަވާލުވެ، ވޯލްޑް ކަޕަށް އެމެރިކާ ކޮލިފައިވުމުގެ އުއްމީދު އައުކޮށްދިނެވެ. އެމެރިކާ ޓްރިނިޑާޑް އަތުން ބަލިވެ ކޮލިފައިންގައި ކެޓިއިރު، ޓްރިނިޑާޑް މޮޅުވެފައިވާ އޭގެ ކުރިން ކުޅުނު 9 މެޗުގެ ތެރެއިން އެންމެ މެޗަކުންނެވެ.

މިއީ އެރީނާ އެމެރިކާއަށް ކޯޗްކޮށްދިން 2ވަނަ ފަހަރެވެ. މީގެ ކުރިން 2002ވަނަ އަހަރު ވޯލްޑް ކަޕްގައި ކުއާރޓަރ ފައިނަލާއި ހަމަޔަށް އެމެރިކާ ގެންގޮސްދިނީ އެރީނާއެވެ.

އެލްއޭ ގެލެކްސީއާއި ޑީސީ ޔުނައިޓެޑްގެ ކޯޗްކަމުގައި ހުރެ އެރީނާވަނީ އެމެރިކާގެ ފުޓުބޯޅަ ލީގުކަމަށްވާ މޭޖަރ ލީގް ސޮކަރ 5 ފަހަރު ކާމިޔާބުކޮށްފައެވެ.