10 ދުވަހުގެ ތެރޭގައި ވޫހާންގެ 11 މިލިއަން ރަށްވެހިން ޓެސްޓުކުރުމުގެ މަސައްކަތް ފަށަނީ
15 މެއި 2020 | ހުކުރު 08:46ވޫހާންގެ އާބާދީ ޓެސްޓުކުރަން ނިންމީ އައު ކޭސްތަކެއް ފެނުމާއި ގުޅިގެން
ވޫހާންގައި ޓެސްޓު ކުރުމުގެ މަސައްކަތް ވަނީ ފަށާފައި: ދުވާލެއްގެ މައްޗަށް ގިނަ ޓެސްޓުތަކެއް ހަދަން ވަނީ އަމާޒު ހިފާފައި
ގިނަ ދުވަސްތަކަކަށް ފަހު، ވޫހާން އިން ކޮވިޑް-19 ޖެހިފައިވާ ބަޔަކު ފެނުމާއި ގުޅިގެން އެ އަވަށުގެ އާބާދީ އެއްކޮށް ޓެސްޓުކުރުމުގެ މަސައްކަތް ޗައިނާ ސަރުކާރުން ފަށައިފި އެވެ.
ވޫހާން ގެ ޖުމުލަ އާބާދީ 11 މިލިއަނަށް އަރާއިރު، އެ ހުރިހާ އެންމެން ޓެސްޓު ކުރުމަށް ޗައިނާ ސަރުކާރުން ދިހަ ދުވަހުގެ މުހުލަތެކެވެ. މި މަސައްކަތް ފެށުމަށް ޗައިނާ ސަރުކާރުން ނިންމީ 35 ދުވަސް ފަހުން، ކުރިން ފެނުނު އެއްވެސް ކޭސްތަކަކާ ގުޅުމެއް ނެތް ހަ މީހަކަށް ވައިރަސް ޖެހުމާއި ގުޅިގެންނެވެ.
ޗައިނާ ސަރުކާރުގެ އިސްނެގުމަކަށް މި މަސައްކަތް ކުރަން ފަށާފައި ވަނީ، ދެވަނަ ރާޅެއް އައިސްފިނަމަ، ޗައިނާގައި ކޮވިޑް-19 ފެތުރުން ހުއްޓުވުމަށް ދުރާލާ ފިޔަވަޅުތަކެއް އެޅުމުގެ ގޮތުންނެވެ. "10 ޑޭ ބެޓްލް" ނުވަތަ ދިހަ ދުވަހުގެ ހަނގުރާމައިގެ ގޮތުގައި ޗައިނާ ސަރުކާރުން މި މަސައްކަތް ސިފަކުރަމުން އަންނައިރު، ހުރިހާ ރައްޔިތުން މި މަސައްކަތުގައި އެއްބާރުލުން ދިނުމަށް ވަނީ އެދިފަ އެވެ.
މިހާތަނަށް ލިބިފައިވާ މައުލޫމާތުތަކަށް ބަލާއިރު، ވައިރަސް އަށް ޓެސްޓުކުރެވިފައިވާ ފަރާތްތައް އުނިކުރުމުން ވެސް، ޗައިނާ އިން ދުވާލެއްގެ މައްޗަށް ހައްދަން ޖެހޭ ޓެސްޓުތަކުގެ އަދަދު 750،000ށް އަރަ އެވެ. އެންމެ ފަހުން އެ ގައުމުން ހާމަކޮށްފައިވާ މައުލޫމާތަށް ބަލާއިރު ވޫހާން ގެ ލެބޯރެޓަރީތަކުން ދުވާލެއްގެ މައްޗަށް ހެދޭނީ 100،000 ޓެސްޓެވެ.
ބެލެވޭ ގޮތުގައި ޗައިނާ ސަރުކާރުން ބޭނުންވާ އަދަދަށް ޓެސްޓު ހެއްދުމަށް އެ ގައުމުގެ އެހެން ސަރަހައްދުތަކާއި އަވަށްތަކުގައި ހުންނަ ލެބޯރެޓަރީތަކަށް ސާމްޕަލް ފޮނުވޭނެ އިންތިޒާމުތައް ހަމަޖެހިގެން ދާނެ އެވެ. އެ ގައުމުގެ މީޑިއާތަކުން ރިޕޯޓުކުރާ ގޮތުގައި، މިހާރު ވެސް އިތުރު ޓެސްޓު ހެއްދޭނެ އިންތިޒާމުތައް ވަނީ ހަމަޖެހިފަ އެވެ.
ބީބީސީ އަށް މައުލޫމާތު ދެމުން ވޫހާން ޔުނިވަރސިޓީގެ ޔާންގ ޝަންކޫ ބުނީ، އައު ކޭސްތަކެއް ނުފެންނަ ކަމުގައި ވަނީ ނަމަ، ޓެސްޓު ކުރުމުގެ ބޭނުމެއް ނެތް ކަމަށެވެ. ޝަންކޫގެ ލަފައަކީ، އައު ކޭސްތައް ފެންނަ ސަރަހައްދުތައް ޓެސްޓު ކުރުމެވެ.
ޗައިނާގެ ސެންޓަރ ފޯ ޑިޒީޒް ކޮންޓްރޯލް ގެ އިސް އެޕިޑިއޮމޮލޮޖިސްޓް، ވޫ ޒުންޔޫ، ގެ ވިސްނުންފުޅު ވެސް ހުންނެވީ މި ގޮތަށެވެ. އެގޮތުން ދައުލަތުގެ މީޑިއާ، ސީސީޓީވީ، އަށް ދެއްވި ބަސްތީގަތުމެއްގައި ޒުންޔޫ ވިދާޅުވީ ގިނަ އަދަދެއްގެ ޓެސްޓުކުރަން ޖެހޭނީ ވަކި އާބާދީތަކަށް އިސްކަމެއް ދީގެން ކަމަށެވެ. އަދި މުޖުތަމައުގެ ތެރޭގައި ބަލި ނުފެންނަ އާބާދީތައް ޓެސްޓުކުރުމުގެ ބޭނުމެއް ނެތް ކަމަށް ވިދާޅުވި އެވެ.
ޓެސްޓު ކުރުމުގައި އިސްކަން ދޭން ނިންމާފައިވާ ތަރުތީބު، ވޫހާން ސިޓީގެ ކަމާއިބެހޭ އިދާރާތަކުން ވަނީ ކަނޑައަޅާފަ އެވެ. އޭގެ ތެރޭގައި ހިމެނެނީ އުމުރުން ދުވަސްވީ މީހުންނާއި ސިއްހީ މަސައްކަތްތެރިންނެވެ. މީގެ ތެރެއިން ވެސް އެންމެ ބޮޑު އިސްކަމެއް ދޭނީ، އާބާދީ ބޮޑު ސަރަހައްދުތަކުގައި ދިރިއުޅޭ މީހުންނަށެވެ.
މިހާރު ދުނިޔޭގެ އެކި ކަންކޮޅުތަކަށް ފެތުރިފައިވާ ކޮވިޑް-19 އެންމެ ފުރަތަމަ ރިޕޯޓުކުރީ ޗައިނާގެ ވޫހާން ސިޓީންނެވެ. މިއާއެކު އެ ސިޓީ ލޮކްޑައުންކޮށް، ޗައިނާ ސަރުކާރުން ގިނަގުނަ ފިޔަވަޅުތަކެއް އެޅި އެވެ. މިހާރު ގިނަ ކަންކަމަށް ލުއިތަކެއް ދީފައި ވާއިރު، ގިނަ ރައްޔިތުން އަދިވެސް އިޚުތިޔާރު ކުރަނީ ގޭގައި ތިބުމަށެވެ.
