ޓްރާންސިޓް ކަރަންޓީން ފެސިލިޓީގެ ގޮތުގައި 3 ރިސޯޓެއް ހަމަޖައްސަައިފި
ޖުމްލަ 7 ޓްރާންސިޓް ކަރަންޓީން ފެސިލިޓީ މިހާތަނަށް ގާއިމްކުރެވިފައިވޭ
މެދުފުށި އައިލަންޑް ރިސޯޓު
ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުން ރަށަށް ދިއުމުގެ ކުރިން ކަރަންޓީން ވުމަށް "ޓްރާންސިޓް ކަރަންޓީން ފެސިލިޓީސް" ގެ ގޮތުގައި އިތުރު 3 ތަނެއް ހަމަޖައްސާފައި ވާކަމަށް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.
ރަށަށް ދާން ބޭނުންވާ މީހުންގެ އަދަދު 5000ށް އަރާފައި ވާއިރު، އިތުރު ފެސިލިޓީސް ހަމަޖެހިފައި ވާކަން ހާމަކުރައްވާ މިނިސްޓަރ އަލީ ވަހީދު ވިދާޅުވީ، ލޮކްޑައުން އާއި ގުޅިގެން ރަށަށް ނުދެވި މާލޭގައި ތާށިވެފައި ތިބި ރައްޔިތުން ކަރަންޓީން ކުރުމަށް ހދ، ފ، އަދި މ އަތޮޅުން 3 ރިސޯޓު ހަމަޖެހިފައި ވާކަމަށެވެ. އެއީ ހދ. އަތޮޅުން ހޮނޑާފުށި އައިލެންޑް ރިސޯޓު، ފ. އަތޮޅުން ފިލިތެޔޮ އައިލެންޑް ރިސޯޓު އަދި މ. އަތޮޅުން މެދުފުށި އައިލެންޑް ރިސޯޓުކަމަށް ޓުއަރިޒަމް މިނިސްޓްރީން މައުލޫމާތު ދެއެވެ.
ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުން އަނބުރާ ރަށަށް ފޮނުވުމުގައި ލަސްތަކެއް އުޅެނީ ވަސީލަތްތައް ނެތިގެން ނޫންކަމަށާއި، ބަލިމަޑުކަމެއްގެ ތެރޭގައި ރިސްކް ނަގަން ބޭނުން ނުވާތީ ކަމަށް ޓުއަރިޒަމް މިނިސްޓަރ އަލީ ވަހީދު ވަނީ މީގެކުރިންވެސް ވިދާޅުވެފައެވެ. ސަރުކާރުގެ މައިގަނޑު އަމާޒަކީ އަތޮޅުތެރެއަށް ބަލި ފެތުރުނަ ނުދީ ކޮންޓްރޯލް ކުރުން ކަމަށް ވާއިރު، ރަށަށް ދާން ބޭނުންވާ މީހެއްގެ ފުށުން އެ ބަލި ރަށުތެރޭގައި ފެތުރިއްޖެނަމަ، ރަށުގައި ދިރިއުޅޭ އެންމެން ނުރައްކަލެއްގެ ތެރެއަށް ހުށަހެޅިގެން ދާނެ އެވެ.
މި 3 ރިސޯޓުގެ އިތުރުންވެސް އިތުރު 4 ރިސޯޓު ދަނީ ޓްރާންސިޓް ކަރަންޓީން ފެސިލިޓީގެ ގޮތުގައި ބޭނުން ކުރަމުންނެވެ. މިނިސްޓަރ ވިދާޅުވީ، އެއީ އައްޑޫ، ދ، ޅ، އަދި ރ އަތޮޅުގައި ވާ ރިސޯޓުތަކެއް ކަމަށެވެ. އައްޑޫގައި ހެރެތެރެ އައިލެންޑް ރިސޯޓު ހަމަޖައްސާފައި ވާއިރު، ދ. އަތޮޅުން ސަން އަކުއާ އިރުވެލި، ޅ އަތޮޅުން ފުށިފަރު މޯލްޑިވްސް އަދި ރ އަތޮޅުން ފުރަވެރި އައިލެންޑް ރިސޯޓް އެންޑް ސްޕާ ވަނީ ހަމަޖައްސާފައެވެ.
