ކޮވިޑަށް ފަރުވާހޯދާ މީހުން މޮނިޓަރ ކުރަން ޑޮކްޓަރުންގެ ހާއްސަ ޓީމެއް
އަންނަ ހަފްތާއިން ފެށިގެން 24 ގަޑިއިރުގެ ހިދުމަތް ދެވޭނެ
އައިޖީއެމްއެޗްގެ އެެތެރެ ހަށީގެ ޑރ. މޫސާ މުރާދު
ރާއްޖޭގައި ކޮވިޑް-19 އަށް ފަރުވާ ހޯދާ މީހުންގެ ހާލަތު ބެލުމަށް ކްލިނިކަލް އެޑްވައިޒަރީ ޓީމެއް އެކުލާވަލުމުގެ މަސައްކަތް ފަށައިފި އެވެ.
ބުދަ ދުވަހުގެރޭ ނެޝަނަަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗްގެ އެެތެރެ ހަށީގެ ޑރ. މޫސާ މުރާދު ވިދާޅުވީ، ރާއްޖޭގެ ހުރިހާ ހިސާބެއްގައި ކޮވިޑް-19 އަށް ޕޮޒިޓިވްވާ މީހުން މެނޭޖް ކުރުމާއި، ދޭން ޖެހޭ ލަފަޔާ އިރުޝާދު ދިނުމުގެ އިތުރުން ބަލި މީހަކު ހުރި ތަނެއްގައި ދިމާވާ މައްސަލަތައް ހައްލު ކުރުމަށް ލަފާދޭން އައިޖީއެމްއެޗްގެ ޑޮކްޓަރުންގެ ޓީމެއް އެކުލަވާލެވި އެ ޓީމުގެ މަސައްކަތްތަކެއް މިހާރުން ފެށައިގެން ކުރިޔަށްދާ ކަމަށެވެ.
ކޮވިޑް-19 އަށް ފަރުވާދިނުމަށް ސަރުކާރުން ޓްރީޓޮޕް ހޮސްޕިޓަލްވެސް ބޭނުން ކުރަން ފަށާފައިވާއިރު، ޑރ. މުރާދު ވިދާޅުވީ، އެ ހޮސްޕިޓަލުގައި ކޮވިޑް-19 އަށް ފަރުވާ ހޯދަމުންދާ މީހުންވެސް މޮނިޓަރ ކުރެވެމުންދާނީ އެ ޓީމުގެ ބެލުމުގެ ދަށުން ކަމަށެވެ. އެގޮތުން އަންނަ ހަފުތާއިން ފެށިގެން މި ޓީމުން 24 ގަޑިއިރު ހަރަކާތްތެރިވަމުން ދާނެކަމަށް މަބްރޫކް ވިދާޅުވިއެެވެ.
ކޮވިޑް-19 ގެ ބަލި މީހުންގެ ތެރެއިން އެކި ތަންތަނުގައި ތިބި މީހުން އެއް ތަަނަށް އަނެއް ތަނަށް ގެންދިޔުމުގައި އެތަންތަނުގައި ތިބޭއިރު ބަލި މީހުންނަށް ދިމާވާ މައްސަލަތަކާއި އެފަދަ ކަންކަން ގާތުން ބަލައި ގެންދަން ޖެހޭ ހާލަތުގައި ވަގުތުން ގެންދެވޭނެ ނިޒާމުތަކެއް ކަނޑައެޅިގެން ދިޔުމަކީ ބަލި މީހުންގެ ފަރުވާގެ މުހިއްމު ބައެއް ކަމަށް ޑރ. މުރާދު ފާހަގަކުރެއްވި އެވެ.
