ވެންޓިލޭޓަރަށް ނުލައި އޮތް ކަމުގައިވީނަމަވެސް، ހޮސްޕިޓަލުގައި އެޑްމިޓްކޮށްގެން ފަރުވާދެމުން އަންނަ ބަލި މީހެއްގެ ހާލަތު ވަރަށް ގޯސްކަމަށް ހާމަކޮށްފިއެވެ.
މިކަން ހާމަކުރެއްވީ ޑރ. މޫސާ މުރާދު އެވެ. އެންއީއޯސީގައި ބާއްވާ ސިލްސިލާ ނޫސްވެރިންގެ ބައްދަލުވުމުގައި ޑރ. މުރާދު ވިދާޅުވީ އެ މީހާގެ ހާލަތު ގޯސްވަމުން އަންނަކަން ފާހަގަކުރެވިފައިވާ ކަމަށެވެ. އޭނާ ވެންޓިލޭޓަރަށް ނުލާ ސަބަބެއް ވިދާޅެއް ނުވެ އެވެ.
ހޮސްޕިޓަލުގައި އެޑްމިޓްކޮށްފައިވާ ފަރާތްތަކުގެ ތެރެއިން، ވެންޓިލޭޓަރުގައި ފަރުވާ ދެމުން އަންނަ ހަތަރު މީހުންގެ ތެރެއިން ދެ މީހަކަށް ފަރުވާދެމުން އަންނަނީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާ (ޑީއެޗް11) ގައެވެ. އަނެއް ދެ މީހުންނަނީ ޓްރީ ޓޮފް ހޮސްޕިޓަލުގައި ފަރުވާދެމުން އަންނަ ދެ ބިދޭސީންނެވެ.
ބަލި ފެތުރުން ކޮންޓްރޯލް ނުކުރެވިއްޖެނަމަ، ކުރިއަށް އޮތް ދުވަސްތަކުގެ ތެރޭގައި ހޮސްޕިޓަލުގައި އެޑްމިޓްކުރާ މީހުންގެ އަދަދުތައް ގިނަވެގެން ދާނެ ކަަމަށެވެ. މިކަމަށް ތައްޔާރުވުމުގެ ގޮތުން ޓްރީ ޓޮޕް ހޮސްޕިޓަލް ވަނީ ނެޝަނަލް ކޮވިޑް ސެންޓަރުގެ ގޮތުގައި ކަނޑައަޅާފަ އެވެ. އަދި ކޮވިޑް-19 ޖެހޭ މީހުންނަށް ހާއްސަކޮށްގެން އިމާރާތްކުރަމުން އަންނަ ކޮވިޑް ވިލެޖް ފެސިލިޓީ ވެސް ހުންނަނީ ހުޅުމާލޭ ގައެވެ.
