ޕޮޒިޓިވްވި ތިން މީހަކު ނުފެނިގެން ހޯދަނީ
13 މެއި 2020 | ބުދަ 17:42ހަތް ބިދޭސީއަކު ޕޮޒިޓިވްވި
މާލެގައި ތިބި ބިދޭސީންތަކެއް ހުޅުމާލެއަށް ގެންދިޔުމުގެ ތެރެއިން
ރެންޑަމް ސާމްޕަލް ނެގުމުގެ ތެރެއިން ކޮވިޑް-19 އަށް ޕޮޒިޓިވްވި މީހުންގެ ތެރެއިން ތިން ބިދޭސީއަކު ހޯދުމުގެ މަސައްކަތް ފުލުހުން ފަށައިފި އެވެ.
މި ފަރާތްތަކަކީ ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކުރިޔަށް ގެންދިޔަ ރެންޑަމް ސާމްޕްލިންގގެ ތެރެއިން ނެގި ސާމްޕަލްތަކެއްގެ ތެރެއިން، ޕޮޒިޓިވްވެފައިވާ ސާމްޕަލްތަކެކެވެ. ޖުމްލަ ހަތް ސާމްޕަލެއް މީގެ ތެރެއިން ޕޮޒިޓިވްވެފައިވާއިރު، އޭގެ ތެރެއިން ހަތަރު މީހަކު ވަނީ ހޯދިފަ އެވެ.
މިކަމާއި ގުޅޭ ތަފްސީލު ދެއްވަމުން، އިމަރޖެންސީ އޮޕަރޭޝަންސް ސެންޓަރުގެ ތަރުޖަމާނު މަބްރޫކް ވިދާޅުވީ، ޕޮޒިޓިވްވީ ހަތް މީހުންގެ ތެރެއިން ހަތަރު މީހުންނަކީ، ތޮއްޖެހިގެން ދިރިއުޅެމުންދާ ތަނަކުން ފެނިފައިވާ ބައެއް ކަމަށެވެ. އަނެއް ތިން މީހުންނަކީ ތަފާތު އެކިއެކި އެޑްރެސްތަކުގައި ދިރިއުޅެމުން އައި ފަރާތްތަކެކެވެ. އެޗްޕީއޭއިން ވަނީ އެ މީހުން ހޯދަން ފުލުހުންނަށް އަންގާފަ އެވެ.
ގެއްލިގެން ހޯދަމުން އަންނަ މީހުން ނުފެނިއްޖެނަމަ ޑިރެކްޓަރ ޖެނެރަލް އޮފް ޕަބްލިކް ހެލްތް އަށް ލިބިގެންވާ ބާރުގެ ދަށުން އެ މީހުންގެ ޒާތީ މައުލޫމާތު ހާމަކުރާނެ ކަމަށް އެންއީއޯސީން ބުންޏެވެ. މިހާތަނަށް ކޮވިޑް-19 ޖެހިފައިވާ މީހެއްގެ ޒާތީ މައުލޫމާތު އެޗްޕީއޭ އިން ހާމައެއްނުކުރެ އެވެ. ނަމަވެސް، މައުލޫމާތު ދޭން ދެކޮޅުހެދި މީހަކަށް އެއްބާރުލުން ނުދީފިނަމަ މައުލޫމާތު ހާމަކުރާނެ ކަމުގެ އިންޒާރު މީގެކުރިން ދީފައި ވެއެވެ.
