ފުލުހުންގެ ފޮރެންސިކް ލެބޯރެޓަރީ ގައި، ދުވާލެއްގެ މައްޗަށް ކޮވިޑް-19 އަށް 140 އަށް ވުރެ ގިނަ ޓެސްޓު ހެދޭނެ ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ) އިން ބުނެފި އެވެ.

ބުދަ ދުވަހުގެރޭ އެންއީއޯސީ ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބުދެއްވަމުން އެ ސެންޓަރުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ޓެސްޓިން ކެޕޭސިޓީ އިތުުރު ކުރުމުގެ ގޮތުން ކުރެވެމުންދާ މަސައްކަތުގެ ތެރެއިން ފުލުހުންގެ ލެބޯރެޓަރީގައި މިހާރު ދުވާލެއްގެ މައްޗަށް 140 ޓެސްޓު ހެދޭނެ ކަމަށް ފުލުހުން އަންގާފައިވާ ކަމަށެވެ.

ބުދަ ދުވަހު އޭޑީކޭއިން ވެސް ވަނީ ކޮވިޑަށް ޓެސްޓު ކުރެވޭ މެޝިނެއް ގެނެސްފައެވެ. އެ މެޝިނުން ދުވާލެއްގެ މައްޗަށް 500 ޓެސްޓު ހެދޭނެ ކަމަށް އޭޑީކޭ އިން ވަނީ ބުނެފަ އެވެ. ސަރުކާރުން ގެންނަ މެޝިން މެއި މަހުގެ 18 ވަނަ ދުވަހު އައިސްފިކަމުގައި ވަނީނަމަ، ރާއްޖޭގައި ދުވާލެއްގެ މައްޗަށް ހެއްދޭ ޓެސްޓުގެ އަދަދު 1000ށް ވުރެ މައްޗަށް އަރާނެ އެވެ.

އޭގެ އިތުރުން، ރަށްރަށުގައި ކޮވިޑް-19 އަށް ޓެސްޓު ކުރުުގެ ގޮތް ހެދޭގޮތް ހެދުމަށް ޖީންއެކްސްޕާޓް މެޝިނަށް ލައްވާ ކާޓްރިޖް ލިބުމުން، މާލެ ނުގެނެސް ރަށްރަށުގައި ގާއިމްކުރެވިފައިވާ ލެބޯރެޓަރީތަކުން ޓެސްޓުގެ ނަތީޖާ ލިބޭނެ އެވެ.

ރާއްޖޭގައި ކޮވިޑް-19 އަށް ޓެސްޓު ކުރެވޭ ރޭޓް ދަށްކަން އެންއީއޯސީގެ ޑޮކްޓަރުންގެ ޓީމުން ވަނީ ފާހަގަކުރައްވާފަ އެވެ. އަދި ދުވާލެއްގެ މައްޗަށް ޓެސްޓު ކުރެވޭ އަދަދު އިތުރުނަމަ، އިތުރު ކޭސްތައް ދެނެގަނެވޭނެ ކަމަށް ޑޮކްޓަރުން ވަނީ ވިދާޅުވެފަ އެވެ. މުޖުތަމައުގެ ތެރޭގައި ދެނެނުގަނެވި ހުރި ކޭސްތަކެއް އުޅޭނެ ކަމަށް މީގެ ކުރިން ވަނީ ހާމަކޮށްފަ އެވެ.