ފްރެންޗު ލީގު ކެންސަލް ކުރުމުން ދެވަނަ ޑިވިޝަނަށް ރެލިގޭޓްވި އަމިއެންސް ކޯޓުގައި މައްސަލަ ޖައްސަން ނިންމައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ފްރެންޗު ލީގު ކެންސަލް ކޮށް، ޕީއެސްޖީ އަށް ވަނީ ޗެމްޕިއަންކަން ދީފައެވެ. މި ނިންމުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓްވެފައެވެ. 19 ވަނައިގައި އޮތް އަމިއެންސް އާއި 18 ވަނައިގައި އޮތް ނިމްސްއާ ދެމެދު އޮތީ ހަތަރު ޕޮއިންޓުގެ ފަރަގެކެވެ.

އަމިއެންސް އާއި ޓުލޫސް އިން ގަބޫލުކުރާ ގޮތުގައި އެންމެ ރަނގަޅު ނިންމުމަކީ އަންނަ ސީޒަން 22 ޓީމާއެކު ކުޅުމެވެ. އެއީ ދެވަނަ ޑިވިޝަނުން ފުރަތަމަ ޑިވިޝަނަށް ޕްރޮމޯޓުވާ 2 ޓީމު ހިމަނައިގެންނެވެ.

މީގެ ކުރިން އަމިއެންސް އިން ވަނީ ފެޓިޝަނެއް ހުށަހަޅަން ވެސް މަސައްކަތް ކޮށްފައެވެ. ދާދި ފަހުން އަމިއެންސްގެ ރައީސް ބާނާޑް ޖޮއާނިން ވިދާޅުވީ ފްރެންޗު ލީގު ކެންސަލް ކުރަން ނިންމި ނިންމުމަކީ ބޭއިންސާފު ނިންމުމެއް ކަމަށެވެ. އެކަމުގެ ސަބަބުން ކްލަބަށް މާލީ ގޮތުންވެސް ގެއްލުންތަކާ ކުރިމަތިލާން ޖެހިފައިވާ ކަމަށާއި، އެހެންކަމުން ލިބޭ ގެއްލުމުގެ ބަދަލު ހޯދަން ކޯޓަށް ދިޔުމަށް ނިންމާފައިވާ ކަމަށްވެސް ވިދާޅުވި އެވެ.

އަމިއެންސް އިން ކޯޓަށް ދާން ނިންމިއިރު، މީގެ ކުރިން ލިޔޯން އިން ވެސް ވަނީ ކޯޓަށް ދާން ނިންމާފައެވެ. އެޓީމުން ކޯޓަށް ދާން ނިންމީ ޔޫރަޕުގެ ޖާގައެއް ނުލިބުމުން އެ ޓީމަށް ކުރިމަތިވި މާލީ ގެއްލުމުގެ ބަދަލު ހޯދުމަށެވެ.