ނެޓުބޯލް އެސޯސިއޭޝަން އޮފް މޯލްޑިވްސްއާ ދެކޮޅަށް ޔޫތު އެލަޔަންސްގެ ފަރާތުން ހުށައެޅި މައްސަލް ސިވިލް ކޯޓުން ބަލައި ނުގަނެ އެ މައްސަލަ ކޯޓުން ބޭރުކޮށްލައިފިއެވެ.
ސިވިލް ކޯޓަށް ހުށައަޅާފައިވާ މައްސަލަ އެ ކޯޓުން ބަލައިގަނެ ދައުވާ ކުރިއަށް ގެންދެވެން ނެއްކަމަށް ބުނެފައިވަނީ އެ ކޯޓުން 29 މާރޗްގައި ނެރުނު ޝަރީއަތް ނިމުނުގޮތުގެ ޙުލާސާ ރިޕޯޓުގައެވެ.
މާރޗް 28 ވަނަ ދުވަހު ޔޫތު އެލަޔަންސްގެ ފަރާތުން ސިވިލް ކޯޓަށް ހުށައަޅާފައިވާ ދައުވާގައި ވަނީ ނެޓްބޯލް އެސޯސިއޭޝަން އޮފް މޯލްޑިވްސްގެ ހިންގާ ޤަވާއިދުގެ 9.2.5 ވަނަ މާއްދާގައާއި ހިލާފަށް ނެޓްބޯލް އެސޯސިއޭޝަނުގެ ގިނަ ފުރިހަ މެމްބަރު ކްލަބްތަކަކަށް 21 މާރޗްގައި ބޭއްވުނު ޢާންމު ބައްދަލުވުމުގައި ބައިވެރިވުމުގެ ފުރުސަތު ނުދީ، އެ ބައްދަލުވުމުގައި އެސޯސިއޭޝަންގެ ހިނަގާ ގަވާއިދަށް ބޮޑެތި ބަދަލުތަކެއް ގެނެސްފައިވާ ކަމަށާއި، އަދި ގިނަ މެމްބަރު ކްލަބުތަކެއްގެ ވޯޓު ދިނުމުގެ ހައްގު ނިގުޅައިގަނެފައިވާތީ، އެ ބައްދަލުވުމަކީ ބާތިލް ބައްދަލުލވުމެއްކަމަށާއި އަދި އެބައްދަލަުވުމުގައި ނިންމާފައިވާ ނިންމުންތަކަކީ ބާތިލް ނިންމުންތަކެއް ކަމުގައި ކަނޑައަޅައި ދިނުމަށެވެ.
މި މައްސަލަ ޔޫތު އެލަޔަންސްއިން ސިޓީއަކުން ސްޕޯރޓް ކޮމިޝަންއަށް ހުށައަޅުމުން އެ ކޮމިޝަނުން ޔޫތު އެލަޔަންސްއަށް ސިޓީއަކުން ދީފައިވާ ޖަވާބުގައި ބުނެފައިވަނީ "ނެޓްބޯލް އެސޯސިއޭޝަން އޮފް މޯލްޑިވްސްއިން ފާއިތުވެދިޔަ ހަތަރު އަހަރު ދުވަހުގެ ތެރޭގައި ހިނގާފައިވާ އެއްވެސް މުބާރާތެއްގައި އަދި ޙަރަކާތެއްގައި ތިޔަ ކްލަބްއިން (ޔޫތު އެލަޔަންސް) ބައިވެރިވެފައި ނުވާތީ، ނެޓްބޯލް އެސޯސިއޭޝަން އޮފް މޯލްޑިވްސްގެ ކުރިއަށް އޮތް ޙާއްސަ އާންމު ޖަލްސާގައި ވޯޓު ދިނުމުގެ ޙައްޤު ތިޔަ ކްލަބަށް ދެވެން ނެތްވާހަކަ ދެންނެވީމެވެ."
އެ މައްސަލަ ބާތިލްކޮށް ސިވިލް ކޯޓުން ނެރުނު ރިޕޯރޓުގައި ބުނެފައިވަނީ ޔޫތު އެލަޔަންސްއިން ދައުވާގައި އެދުނު ކަންކަމަކީ ޤާނޫނުގައި ވާގޮތުން ސްޕޯރޓްސް ކޮމިޝަނުން ފިޔަވަޅު އެޅުމުގެ ބާރު ލިބިގެންވާ ކަންކަން ކަމުގައި ވާތީ އާއި، އެމައްސަލައަށް އެ ކޮމިޝަނުން ޖަވާބުދާރީ ވެފައި ވާތީ ޔޫތު އެލަަޔަންސްއިން ހުށައެޅި މައްސަލަ އެ ކޯޓުން ބަލައި ދައުވާ ކުރިއަށް ގެންދެވެން ނެއްކަމަށެވެ.
ސިވިލް ކޯރޓުގެ މި ނިންމުމާއެކު ނެޓްބޯލް އެސޯސިއޭޝަނަށް އަލަށް އައްޔަނު ކުރެވުނު ބޯރޑު މެމްބަރުންގެ މަޤާމު ސައްހަވާނެއެވެ. އަދި ހާއްސަ އާންމު ޖަލްސާގައި ނިންމުނު ކަންކަންވެސް ސައްހަ ވާނެއެވެ.
