ތިން މަސް ދުވަހަށްފަހު ނަދާލް އެނބުރި ޓެނިސް ކޯޓަށް

ތިން މަސް ދުވަހަށް ފަހު ދުނިޔޭގެ އެއްވަނަ ޓެނިސް ކުޅުންތެރިޔާ ރަފައޭލް ނަޑާލް ޑޭވިސް ކަޕްގެ ކުއާޓާގައި ކުޅެން ތައްޔާރުވެއްޖެއެވެ.

މިދިޔަ ޖެނުއަރީ މަހު އޮސްޓްރޭލިއަން އޯޕަން ޓެނިސް މުބާރާތުގެ ކުއާޓަރ ފައިނަލްގައި މެރިން ކިލިޗްއާ ދެކޮޅަށް ކުޅެނިކޮށް ލިބުނު އަނިޔާ އަށް ފަހު 31 އަހަރުގެ ނަޑާލް ވާދަވެރި މުބާރާތެއްގައި ކުޅެފައެއް ނުވެއެވެ. އުނަގަނޑަށް ލިބުނު އަނިޔާއިން ނަޑާލް އެއްކޮށް ރަނގަޅުވެފައިވާއިރު ޑޭވިސް ކަޕްގެ ކުއާޓާ ފައިނަލުގައި ސްޕެއިން އަދި ޖަރުމަނު ބައްދަލުކުރާއިރު ނަޑާލް ސިންގަލްސް މެޗެއް ކުޅޭނެއެވެ.

ވެލެންސިއާގައި ކުޅޭ މި މެޗުގައި ޖަރުމަނުގެ ފިލިޕް ކޯލްޝްރައިބާއާ ދެކޮޅަށް ނަޑާލް ނުކުންނައިރު އޭނާގެ ޓީމުގައި ހިމެނޭ ޑޭވިޑް ފެރާ ނުކުންނާނީ ޖަރުމަނުގެ ޓީމުގައި ހިމެނޭ ދުނިޔޭގެ ހަތަރުވަނައިގައި ރޭންކް ކުރެވިފައިވާ ޒުވާން ޓެނިސް ކުޅުންތެރިޔާ އެލެކްޒެންޑްރާ ޒްވަރޭވްއާ ދެކޮޅަށެވެ.

އެންމެފަހުން ޑޭވިސް ކަޕްގައި ކުޅުނު 22 މެޗު ވެސް ނަޑާލް ކާމިޔާބުކޮށްފައިވާއިރު އާދިއްތަ ދުވަހު ޒްވަރޭވްއާ ދެކޮޅަށް ވެސް އޭނާ ނުކުންނާނެއެވެ. އޭނާ ޑޭވިސް ކަޕްގެ ސިންގަލްސް މެޗަކުން ބަލިވީ އެ މުބާރާތުގައި ކުޅުނު އެންމެ ފުރަތަމަ މެޗުގައި 2004 ވަނަ އަހަރު ޗެކް ރިޕަބްލިކްގެ ޖިރީ ނޮވާކް އަތުންނެވެ.

މިދިޔަ މަހު ބޭއްވި އެކަޕުލްކޯ އޯޕަންގައި ވާދަކުރުމަށް ނަޑާލް ނިންމި ނަމަވެސް އެ ނިންމުން ބަދަލުކޮށް، ނަޑާލް ވަނީ އިންޑިއަން ވެލްސް އަދި މަޔާމީގައި ބާއްވާ އޭޓީޕީ މާސްޓަރސް މުބާރާތްތަކުން ވެސް ވަކިވެފައެވެ.

ޖެނުއަރީ މަހުގެ ފަހުން ވާދަވެރި މެޗެއް ކުޅެފައިނުވި ނަމަވެސް، މަޔާމީ އޯޕަންގެ ދެވަނަ ބުރުން ސްވިޓްޒަލެންޑްގެ ރޮޖަރ ފެޑެރާ މި ހަފްތާގައި ކެޓުމާ އެކު، ނަޑާލް މިމުބާރާތަށް ނުކުންނަނީ ދުނިޔޭގެ ޓެނިސް ރޭންކިންގެ އެއްވަނަ ކުޅުންތެރިޔާގެ ގޮތުގައެވެ. ނަޑާލް ވަނީ އޭނާގެ ޓެނިސް ކެރިއަރުގައި ގްރޭންޑް ސްލޭމްގެ 16 މުބާރާތެއް ކާމިޔާބުކޮށްފައެވެ.

ޑޭވިސް ކަޕްގެ ފުރަތަމަ ބުރުގައި މިދިޔަ މަހު ގްރޭޓް ބްރިޓަން ބަލިކޮށް މުބާރާތުން ކަޓުވާލި ސްޕެއިންގެ ޓީމުން ޖަރުމަނާއި ދެކޮޅަށް އޭޕްރީލް މަހުގެ 6-8 އަށް ކުޅޭ ކުއާޓަރ ފައިނަލްގައި ނުކުންނާނީ ވެލެންސިޔާގައި އޮންނަ ނަޑާލް އެންމެ ގަޔާވާ ކްލޭ ކޯޓުގައެވެ.

ޑޭވިސް ކަޕްގައި ވާދަކުރާ ސްޕެއިންގެ ޓީމުގައި ނަޑާލް އަދި ކެޕްޓަން ސާޖީ ބްރުގުއޭރާގެ އިތުރުން ދެން ހިމެނެނީ ރޮބާޓޯ ބައުޓިސްޓާ އަގުޓް، ޕަބްލޯ ކަރޭނޯ ބުސްޓާ އަދި ފެލިސިއާނޯ ލޯޕޭޒްގެ އިތުރުން ޑޭވިޑް ފެރަރއެވެ.