މިމަހުގެ ނިޔަލަށް ހަދިޔާ ފޮށިގަނޑުތައް މާލެއަށް ފޮނުވުން ވަގުތީގޮތުން ހުއްޓާލަން ލޮކްޑައުން ކޮމެޓީން ނިންމައިފި
މިމަހުގެ 15 އިން ފެށިގެން 31 ވަނަ ދުވަހުގެ ނިޔަލަށް ރާއްޖޭގެ އެއްވެސް ރަށަކުން މާލެއަށް ހަދިޔާ ފޮށިގަނޑު ނުފޮނުވަން އެދިފައިވޭ
އެލްޖީއޭ ގެ ބައްދަލުވުމެއްގެ ތެެރެއިން: ރަށްރަށުން ހަދިޔާ ފޮށިގަނޑުތައް މާލެ ނުފޮނުވަން ކައުންސިލްތަކަށް އެންގީ ލޮކްޑައުން ކޮމެޓީން އެގޮތަށް ނިންމުމާއި ގުޅިގެން
މި ހިނގާ މެއި މަހުގެ 15 ވަނަ ދުވަހުން ފެށިގެން 31 ވަނަ ދުވަހު ނިޔަލަށް ރަށްރަށުން މާލެއަށް ހަދިޔާ ފޮށިގަނޑުތައް (ކެއަރ ޕެކޭޖް) ފޮނުވުން ވަގުތީ ގޮތުން މަޑުޖައްސާާލުމަށް ލޮކްޑައުން ކޮމެޓީން ނިންމައިފި އެވެ.
ލޮކްޑައުން ކޮމެޓީން އެގޮތަށް ނިންމުމާއި ގުޅިގެން، ލޯކަލް ގަވަރންމަންޓް އޮތޯރިޓީ (އެލްޖީއޭ) އިން ވަނީ ސިޓީ ކައުންސިލްތަކާއި އަތޮޅު އަދި ރަށު ކައުންސިލްތަކުގެ ރައީސުން ނަށް އެކަން އަންގާފަ އެވެ.
އެލްޖީއޭއިން އަންގާރަ ދުވަހު ކައުންސިލްތަކުގެ ރައީސުންނަށް ފޮނުވާފައިވާ ސިޓީއެއްގައި ވަނީ، މިމަހުގެ 15 އިން 31 އާ ދެމެދުގެ ދުވަސްތަކަކީ ރާއްޖޭގައި ކޮވިޑް-19ގެ ކޭސްތައް "ސަރޖް"އަށް ދާ ދުވަސްތައް ކަމަށް ލަފާކުރެވޭތީ، ރައްޔިތުންގެ ޞިއްޙީ ސަލާމަތްތެރިކަމަށްޓަކައި، އެ މުއްދަތުގެ ތެރޭގައި ރަށްރަށުން މާލެއަށް ހަދިޔާ ފޮށިގަނޑު (ކެއަރ ޕެކޭޖް) ފޮނުވުން ވަގުތީ 14 ދުވަހަށް މަޑުޖައްސާލުމަށް ވަނީ ލޮކްޑައުން ކޮމެޓީން ނިންމާފައިވާ ކަމަށެވެ.
އެހެންކަމުން، ސިޓީ އަދި ރަށްރަށުގެ ޓާސްކްފޯސްތަކުން، ދަތުރުތަކުގެ ހުއްދަ ދީ ދަތުރުތަކުގެ ކަންކަން ވިލަރެސްކުރުމުގެ ތެރޭގައި މިކަމަށް ސަމާލުކަން ދިނުމަށް އެލްޖީއޭއިން ވަނީ ކައުންސިލްތަކުގެ ރައީސުންގެ ކިބައިން އެދިފަ އެވެ.
ނޭޝަނަލް އިމަރޖެންސީ އޮޕަރޭޝަން ސެންޓަރުން ލަފާ ކުރާ ގޮތުން މިމަހުގެ ފަހު ދެ ހަފުތާއަކީ ކޮވިޑް-19 ފެތުރުމާއި ޕޮޒިޓިވްވާ މީހުން އިތުރުވެގެން ހިނގައިދާނެ ދުވަސްތަކެއް ކަމަށް ލަފާކޮށްފަ އެވެ.
ރާއްޖެއިން ކޮވިޑް-19 އަށް މިހާތަނަށް 904 މީހަކު ޕޮޒިޓިވް ވެފައި ވެއެވެ.
