އައްޑޫ ސިޓީގައި ކޮވިޑް-19 އަށް ޓެސްޓް ނުކުރެވޭތީ ހުށަހަޅާފައިވާ ކުއްލި މައްސަލައަށް ބަހުސް ކުރުން ފާސްކޮށްފި
މި މައްސަލަ ހުށަހެޅުއްވީ ނައިފަރު ދާއިރާގެ މެމްބަރު އަހުމަދު ޝިޔާމް
ނައިފަރު ދާއިރާގެ މެމްބަރު އަހުމަދު ޝިޔާމް: އައްޑޫގައި 35،000 މީހުން ދިރިއުޅޭއިރު ސިއްހީ ނިޒާމު ހަރުދަނާ ކުރުމަށް ގޮވާލެއްވި
ކޮވިޑް-19އާ ގުޅިގެން އައްޑޫސިޓީގައި ޓެސްޓް ކުރެވޭނެ ގޮތާއި، ރައްކާތެރި ކަމުގެ ވަޞީލަތްތަކާއި، ފަރުވާދެވޭނެ އެކަށީގެންވާ ނިޒާމެއް ޤާއިމްކުރެވިފައި ނުވާތީ ރައްޔިތުންގެ މަޖިލީހަށް ހުށަހެޅި ކުއްލި މައްސަލައަށް ބަހުސް ކުރުން މަޖިލީހުން ފާސްކޮށްފި އެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ކުއްލި މައްސަލައަށް ބަހުސްކުރަން ފެންނަ ކަމަށް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 42 މެމްބަރުން އިއްތިފާގުން ނެވެ
މި ކުއްލި މައްސަލަ ހުށަހެޅުއްވީ، ނައިފަރު ދާއިރާގެ މެމްބަރު އަދި ޕީޕީއެމްގެ ނާއިބު ރައީސް އަހުމަދު ޝިޔާމް އެވެ. މެމްބަރު ހުށަހެޅުއްވި ކުއްލި މައްސަލައިގައި، ކޮވިޑް19އާ ގުޅިގެން މާލެ ފިޔަވާ ރާއްޖޭގެ އެންމެ ބޮޑު އާބާދީއެއް ދިރިއުޅޭ އައްޑޫ ސިޓީގައި މިހާތަނަށް ޓެސްޓްކުރެވޭނެ އެއްވެސް ވަޞީލަތެއް ޤާއިމުކުރެވިފައި ނެތްކަން ފާހަގަކޮށްފައި ވެއެވެ.
އެގޮތުން، 35،000 އަށްވުރެ ބޮޑު އާބާދީއެއްގައި ކޮންމެ ސާމްޕަލެއް ނަގައިގެން ޓެސްޓްކުރަން ފްލައިޓެއް ޗާޓަރ ކޮށްގެން މާލެއަށް ގެންނަން ޖެހުމާއި، މިއީ ބޮޑު ޚަރަދެއް ހޭދަކުރަންޖެހޭ ކަމެއް ކަމަށްވެސް ކުއްލި މައްސަލައިގައި ވެއެވެ. ހަމައެއާއި އެކު، އައްޑޫސިޓީ ހޮސްޕިޓަލްގައި މަސައްކަތްކުރާ ޑޮކްޓަރުންނާއި ނަރުހުން ބޭނުންކުރުމަށް ސަލާމަތީ ވަޞީލަތްތައް އެކަށީގެންވާ މިންވަރަށް ނެތްކަމުގެ ޝަކުވާ އެފަރާތްތަކުން ކުރަމުންދާ ކަމަށެވެ.
އެގޮތުން ކޮވިޑަށް ފަރުވާ ދިނުމުގައި ޑޮކްޓަރުންނާއި ނަރުހުން ރަނގަޅަށް ތަމްރީނުވެފައި ނެތުމާއި، އައްޑޫ ސިޓީގައި ޤާއިމުކުރުމަށް ހަމަޖެހިފައިވާ އައިސީޔޫ ފެސިލިޓީގެ މަސައްކަތް އަދިވެސް ނިމިފައި ނުވާކަމަށް ޝިޔާމް ހުށަހެޅުއްވި ކުއްލި މައްސަލައިގައި ވެއެވެ.
މީގެއިތުރުން، މެމްބަރު ވަނީ އައްޑޫ ސިޓީގައި ކޮމިއުނިޓީ ސްޕްރެޑަކަށް ގޮސް، މީހުން ކަރަންޓީނު ކުރަންޖެހޭ ޙާލަތުގައި ބޮޑު އާބާދީއެއްގައި މީހުން ކަރަންޓީނުކޮށް ފަރުވާދިނުމުގެ ރަނގަޅު ޕްލޭނެއް ނެތިއްޖެނަމަ ވަރަށް ނުރައްކާތެރި ޙާލަތަކަށް ހިނގައިދާނެ ކަމުގެ ކަންބޮޑުވުން ފާޅުކުރައްވާފަ އެވެ.
ޝިޔާމް ވަނީ އައްޑޫސިޓީގެ ރައްޔިތުންގެ ސަލާމަތާއި ރައްކާތެރިކަމަށްޓަކައި އެސިޓީގައި ޓެސްޓް ކުރެވޭނެ ނިޒާމު ޤާއިމްކޮށް، ރައްކާތެރިކަމުގެ ވަޞީލަތްތައް ހަމަކޮށް ދިނުމާއެކު، ފަރުވާދިނުމަށް ރަނގަޅު ޕްލޭނެއްގެ ދަށުން މަސައްކަތްތައް ރާވާ ހިންގުމަށް ގޮވާލައްވާފަ އެވެ. އަދި ރާއްޖޭގެ ކޮންމެ އަތޮޅެއްގައި ކޮވިޑް-19ށް ޓެސްޓްކޮށް ފަރުވާދެވޭނެ ނިޒާމެއް ވީ އެންމެ އަވަހަށް ޤާއިމުކުރުމަށް މެމްބަރު ވަނީ ސަރުކާރަށް ގޮވާލައްވާފައެވެ.
