ރާއްޖޭގައި ރިކަވަރވާ މީހުންގެ ރޭޓް ދަށް: އެޗްޕީއޭ
ލަފާކުރި އަދަދަށްވުރެ ގިނަ ދުވަސް ބަލިން ރިކަވަރ ވާން ނަގާ: ޑރ. އަފްޒަލް
ޑރ. އިބްރާހިމް އަފްޒަލް: ރޭޓް ހާމަކުރެވޭނީ އެސެސްމެންޓަކަށް ފަހު ކަމަށް ވިދާޅުވި
ރާއްޖޭގައި ކޮވިޑް-19 ޖެހިގެން އެ ބަލިން ފަސޭހަވާ މީހުންގެ ރޭޓް ހީކުރިވަރަށް ވުރެ ބޮޑަށް ދަށް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
ހޯމަ ދުވަހު އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި، ރާއްޖޭގެ ރިކަވަރީ ރޭޓާއި ބެހޭ ގޮތުން ރާއްޖެޓީވީން ކުރި ސުވާލަކަށް ޖަވާބު ދެއްވަމުން އެޗްޕީއޭގެ އެޕިޑަމޮލިޖިސްޓް ޑރ. އިބްރާހިމް އަފްޒަލް ވިދާޅުވީ، ރިކަވަރީ ރޭޓާއި ބެހޭ ގޮތުން މައުލޫމާތެއް ހާމަކުރެވެނީ ތަފްސީލީ އެސެސްމެންޓަކަށް ފަހު ކަމަށެވެ.
މިހެން ވިދާޅުވި ނަމަވެސް، މިހާތަނަށް ރާއްޖެއިން ރިޕޯޓް ކުރެވިފައިވާ ކޭސްތަކުގެ އަދަދަށް ބަލާއިރު، ލަފާކުރި އަދަދަށްވުރެ ގިނަ ދުވަސް ބަލިން ރިކަވަރ ވާން ނަގާކަން ފާހަގަކުރެވިފައިވާ ކަމަށް ޑރ. އަފްޒަލް ވަނީ ފާހަގަކުރައްވާފަ އެވެ.
ރާއްޖޭގައި ބަލި ޖެހުނު މީހުންގެ ތެރެއިން ބަލިން ފަސޭހަވެފައިވަނީ 31 މީހެކެވެ. ހެލްތް މިނިސްޓްރީގެ ޑޭޝް ބޯޑުން ދައްކާ ގޮތުން ރާއްޖޭގެ ރިކަވަރީ ރޭޓަކީ 3.23 އިންސައްތައެވެ.
ރާއްޖޭގައި ބަލި ޖެހުނު މީހުން އާއްމު ގޮތެއްގައި 17 ދުވަހުން ބަލިން ފަސޭހަވެ އެވެ. ޗައިނާ އާއި ދުނިޔޭގެ ސިއްހަތު ޖަމިއްޔާއާ ގުޅިގެން ހަދާފައިވާ ދިރާސާއަކުން ދައްކާ ގޮތުން ކޮވިޑް-19 ޖެހޭ މީހުން ބަލިން ފަސޭހަވާން އެންމެ މަދުވެގެންވެސް ދެ ހަފްތާގެ މުއްދަތު ނަގަ އެވެ.
