އަލުން ޓޫރިޒަމް ފަށާނެ ޕްލޭނެއް އެކުލަވާލާ ރައީސް އޮފީހަށް ފޮނުވައިފި
11 މެއި 2020 | ހޯމަ 13:02ރާއްޖެ އަލުން ހުޅުވާލުމަށް ރާއްޖޭގެ ބޯޑަރ ހުޅުވާލާއިރު އެކަމުގައި ގޯސް ނިންމުންތަކެއް ނުނިންމަވާނެ
ތުލުސްދޫގައި ބޭއްވި ކޮރަލް ފެސްޓިވަލްގެ ތެރޭގައި ޓޫރިޒަމް މިނިސްޓަރ (ވ) ރައީސް އިބްރާހީމް މުހައްމަދު ޞާލިހު އާއެކު
ކޮވިޑް-19 ފެތުރުން ކޮންޓްރޯލް ވުމުން އަލުން އެއަރޕޯޓް ހުޅުވާލާ ޓޫރިޒަމް ފަށައި ގަނެވޭނެ ޕްލޭނެއް އެކުލަވާލާ ރައީސުލްޖުމްހޫރިއްޔާގެ އޮފީހާ މިހާރު ހިއްސާ ކޮށްފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅު ވެއްޖެއެވެ.
ނޭޝަނަލް އިމަރޖެންސީ އޮޕަރޭޝަން ސެންޓަރުގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖޭގެ ފަތުރުވެރިކަން އަލުން ހުޅުވާލުމުގެ ޕްލޭނާއި ގުޅޭގޮތުން މަޢުލޫމާތު ހިއްސާ ކުރައްވަމުން އަލީ ވަހީދު ވިދާޅުވީ ކުރިޔަށް އޮތް ދެ ތިން ދުވަހެއްގެ ތެރޭގައި ރާއްޖޭގެ ކޮވިޑް-19 ގެ ޙާލަތުގެ ނުރައްކާތެރި ދުވަސްތައް ފެށިގެންދާނެ ކަމަށް ޞިއްޙީ މާހިރުން ލަފާކުރައްވާ ކަމަށެވެ. މީގެއިތުރުން ޞިއްޙީ މާހިރުން ލަފާކުރައްވަނީ ބަލި ފެތުރިގެންދާނެ މި ޙާލަތު ދެމި އޮންނާނީ ދެ ހަފުތާ އާއި ހަ ހަފުތާއާ ދެމެދުގެ މުއްދަތެއްގައި ކަމަށާއި އެހެންކަމުން މިހާރު އަޅާފައިވާ ފިޔަވަޅުތަކަަށް ރައްޔިތުންގެ އެއްބާރުލުމާއެކު ބަލި ފެތުރުން ކޮންޓްރޯލް ކުރެވި މަޑުމަޑުން ޢާންމު ޙާލަތަށް ރުޖޫޢަ ވުމުގެ މަސައްކަތް ފެށޭނެކަމަށް އަލީ ވަހީދު ވިދާޅުވި އެވެ.
އަދި ފަތުރުވެރިކަމަށް ރާއްޖެ އަލުން ހުޅުވާލުމަށް ރާއްޖޭގެ ބޯޑަރ ހުޅުވާލާއިރު އެކަމުގައި ގޯސް ނިންމުންތަކެއް ނުނިންމަވާނެ ކަމަށްވެސް މިނިސްޓަރ ވިދާޅުވި އެވެ.
ފަތުރުވެރިކަން އަލުން ހުޅުވާލާއިރު ޢަމަލުކުރާނެ އުޞޫލު އެކުލަވާލާފައިވަނީ ބޭރުގެ ބައެއް މާހިރުންނާއި އެހެން ޤައުމުތަކުގެ ތަޖުރިބާތަކަށް ވެސް ބަލައިގެން ކަމަށް މިނިސްޓަރު ވިދާޅުވިއެވެ. އަދި ޕްލޭނަށް ޓޫރިޒަމް ސިނާޢަތުގެ އިސް ބޭފުޅުންގެ މަޝްވަރާ ހޯއްދަވާނެ ކަމަށްވެސް އަލީ ވަހީދު ވިދާޅުވި އެވެ.
މިނިސްޓަރ ވިދާޅުވީ ރާއްޖޭގެ ޓޫރިޒަމް ފަށާނީ އެކި ފިޔަވަހިތަކަކައް ބަހާލައިގެން ކަމަށާއި މިއިން ކޮންމެ ފިޔަވައްސެއްގައި ރާއްޖޭގެ ޓޫރިޒަމް އަމާޒު ކުރާނެ ދާއިރާތައް އަދި ރައްކާތެރިކަމަށް އަޅާނެ ފިޔަވަޅުތައް ޕްލޭން ކުރެވިފައިވާ ކަމަށެވެ. އަދި އެ ޕްލޭން އެކުލަވާލީ، ޓޫރިޒަމް މިނިސްޓްރީން ރާއްޖެ ގެނައި ޑޮކްޓަރުންގެ ޓީމުގެ އިރުޝާދާ އެކުގައި ކަމަށް ވިދާޅުވިއެވެ.
މިނިސްޓަރ ތަކުރާރުކޮށް ވިދާޅުވީ ޓޫރިޒަމް އިންޑަސްޓްރީ ހުޅުވާލާނީ ބަލި އެއްކޮށް ކޮންޓްރޯލްވީމަ ކަމަށާއި މިވަގުތު ހުރިހާވެސް މަސައްކަތެއް ކުރަމުންދަނީ ބަލި ކޮންޓްރޯލް ކުރުމަށް ކުރަންޖެހޭ ކަންކަން ކުރުމަށްޓަކައި ކަމަށެވެ.
ރާއްޖޭގައި ޢާމްދަނީ ލިބޭ މައި ދާއިރާއަކީ ފަތުރުވެރިކަމަށް ވާއިރު އެދާއިރާއަށް އައި ހީނަރުކަމާއެކު ރާއްޖޭގެ އިޤުތިޞާދަށް ވަނީ ހީނަރުކަން އައިސްފަ އެވެ.
