ކޮވިޑް-19 ފެތުރުން ކޮންޓްރޯލް ކުރުމަށް ކުރަމުންދާ މަސައްކަތްތަކުގެ ތެރެއިން މާފުށީ ޖަލުގައި ތިބި ޤައިދީންނާއި ޖަލު އޮފިސަރުންގެ ތެރެއިން ނެގި ރެންޑަމް ސާމްޕަލްތަކުގެ ތެރެއިން 22 ސާމްޕަލް ނެގެޓިވް ވެފައިވާކަން ސަރުކާރުން ހާމަކޮށްފިއެވެ.

ހޯމަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ހޯމް މިނިސްޓަރ ޝައިޙް އިމްރާން ޢަބްދުﷲ ވިދާޅުވީ، ކަރެކްޝަންސްއާއި ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގުޅިގެން ކުރި މި މަސައްކަތުގެ ތެރެއިން 38 ސާމްޕަލެއް ނެގިފައިވާ ކަމަށެވެ.

އެގޮތުން ޤައިދީންގެ ތެރެއިން 15 މީހަކާއި، ޖަލު އޮފިސަރުންގެ ތެރެއިން 23 އޮފިސަރެއްގެ ސާމްޕަލް ނަގާފައިވާއިރު، އޭގެ ތެރެއިން މިހާތަނަށް ލިބިފައިވާ 22 ނަތީޖާވެސް ނެގެޓިވް ވެފައިވާކަމަށް މިނިސްޓަރ ވިދާޅުވިއެވެ.

ރާއްޖޭގައި ކޮވިޑް-19 ފެތުރިފައި އޮތް މިންވަރު ދެނެގަތުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ 'ކޮމިއުނިޓީ ސްޕްރެޑް ސަރވޭ' އެއްވެސް ފަށާފައެވެ. އެގޮތުން މާލެއިން ފުރަތަމަ ކޭސް އެއް ފެނުމުގެ ތިން ހަފުތާއެއް ކުރިން ޢާންމުންގެ ތެރޭގައި ބަލި ފެތުރެން ފަށާފައިވާކަމަށް ޓެކްނިކަލް އެޑްވައިޒަރީ ގްރޫޕް (ޓެގް) އިން ބުނެފައިވާއިރު، އެއާ ގުޅިގެން ރެންޑަމް ސާމްޕަލް ނެގުމުގެ މަސައްކަތް އެކި ޞަރަޙައްދުތަކުގައި ކުރިއަށް ދެއެވެ.

މީގެ ކުރިންވެސް މާލޭ ޞަރަޙައްދުގެ އިތުރުން ރީޖަނަލް ހޮސްޕިޓަލް ތަކުގައި އޯޕީޑީއަށް ޒިޔާރަތްކުރާ ފަރާތްތަކުގެ ތެރެއިން ހޮވާލެވޭ ފަރާތްތަަކާއި، ރާއްޖޭގެ އެކި ޞަރަޙައްދުތަކުގައި ޤާއިމުކޮށްފައިިވާ 'ފްލޫ ކްލިނިކް' ތަކަށް ޒިޔާރަތްކުރާ ފަރާތްތަކުގެ ތެރެއިންވެސް ރެންޑަމް ސާމްޕަލް ނަގާފައިވެއެވެ.