އިންޑިއާގައި ތިބި 234 ދިވެހިން މިއަދު ރާއްޖެއަށް ގެނެވޭނެ: ފޮރިން މިނިސްޓްރީ
އެއް ފްލައިޓްއަކީ މާލެއާ ޓްރިވެންޑްރަމްއާ ދެމެދުގެ ފްލައިޓެއް
އިންޑިއާގައި ތިބި ދިވެހިން ގޮވައިގެން އަންނަ ފުރަތަމަ ފްލައިޓް ވަނީ ދަތުރު ފަށާފައި، ރާއްޖޭގައި ތިބި ޤައުމަށް ދާން ބޭނުންވާ އިންޑިއާ ރައްޔިތުން ފޮނުވާލުމުގެ މަސައްކަތްވެސް ސަރުކާރުން ދަނީ ކުރަމުން
އިންޑިއާގައި ތިބި ދިވެހިން ރާއްޖެ ގެނައުމަށް ކުރަމުންދާ މަސައްކަތުގެ ދަށުން ހޯމަ ދުވަހު ވެސް އިތުރު 234 ދިވެހިން ގެނެވޭނެ ކަމަށް މިނިސްޓްރީ އޮފް ފޮރިން އެފެއަރޒުން ބުނެފިއެވެ.
ހޯމަ ދުވަހު ރާއްޖެޓީވީގެ ކޮވިޑް-19 ކަވަރޭޖަށް ދެއްވި ޚާއްޞަ އިންޓަރވިއުއެއްގައި ފޮރިން މިނިސްޓްރީގެ ޑިރެކްޓަރ އޮފް ކޮމިއުނިކޭޝަންސް މިއުވާން މުޙައްމަދު ވިދާޅުވީ، ދިވެހިން ރާއްޖެއަށް ގެނައުމަށް ބާއްވާ ފުރަތަމަ ފްލައިޓް އިންޑިއާގެ ޓްރިވެންޑްރަމްއިން ފުރައިގެން ،މާލެއަށް ދަތުރު ފަށާފައިވާ ކަމަށާއި، އެ ފްލައިޓަކީ މާލެއާ ޓްރިވެންޑްރަމްއާ ދެމެދުގެ ފްލައިޓެއް ކަމަށެވެ. އަދި އިންޑިއާގެ ވެރިރަށް ނިއު ދިއްލީން ޓްރިވެންޑްރަމަށް އައުމަށް ފަހު މާލެ ދަތުރުކުރާ ފްލައިޓެއް ހަވީރު އޮންނާނެކަމަށް މިއުވާން ވިދާޅުވިއެވެ.
މިއުވާން ވިދާޅުވީ، ފުރަތަމަ ފްލައިޓުގައި 50 މީހުންނަށް ޖާގަ ދީފައިވާ ކަމަށާއި، ދެވަނަ ފްލައިޓުން އެއަށްވުރެ ގިނަ މީހުން އަންނާނެ ކަމަށެވެ. މި ދެ ފްލައިޓުން ޖުމުލަ 234 ދިވެހިން ރާއްޖެއަށް ގެނެވޭނެކަން މިއުވާން ފާހަގަކުރެއްވިއެވެ.
މިއުވާން ވިދާޅުވީ، އިންޑިއާގައި ތިބި ދިވެހިންގެ ތެރެއިން މިފަހަރު އިސްކަންދިނީ ކުރު މުއްދަތެއްގެ ވިސާގައި ގޮސް ތިބި ފަރާތްތަކަށާއި، ބޭސްފަރުވާއަށް ގޮސް ތިބި ފަރާތްތަކުގެ އިތުރުން، ލޮކްޑައުންގެ ސަބަބުން ބޭސްފަރުވާ ހުއްޓިފައިވާ ފަރާތްތަކާއި، އިންޑިއާގެ ދުރު ހިސާބުތަކުގައި ދިރިއުޅެމުންދާ ދިވެހިންނަށް ކަމަށެވެ.
އެކަމާ ގުޅޭގޮތުން އިންޑިއަން ހައިކޮމިޝަނުން ކުރި ޓްވީޓެއްގައި ބުނީ، ދިވެހިން ރާއްޖެއަށް އަނބުރާ ގެނައުމުގެ ތައްޔާރީތައް ފަށާފައިވާ ކަމަށާއި، މިކަމުގައި އިންޑިއާ ސަރުކާރުގެ ފަރާތުން ލިބުނު އެއްބާރުލުމާއި އެހީތެރިކަން ފާހަގަކުރާ ކަމަށެވެ.
ލޮކްޑައުންގެ ޙާލަތުގައި ރާއްޖެއިން އެއްތަނުން އަނެއްތަނަށް ފުރުމުގައި ގޮންޖެހުންތައް ހުރިހެން މި މަސައްކަތުގައިވެސް ވަރަށް ގިނަ ގޮންޖެހުންތަކެއް ހުރިކަމަށް ފޮރިން މިނިސްޓްރީން ބުނެއެވެ. އަދި އިންޑިއާގެ ވަކިވަކި ސްޓޭޓްތަކުން މީހުން އެއްކުރުމުގައިވެސް ދަތިތަކެއް ދިމާވިކަމަށާއި، ނަމަވެސް ޚާރިޖީ ވުޒާރާއާއި އިންޑިއާ ސަރުކާރު ގުޅިގެން އެ މަސައްކަތްތައް ކުރަމުންދާކަމަށް ފޮރިން މިނިސްޓްރީން ބުނެފައި ވެއެވެ.
އިންޑިއާގެ ޕަންޖާބް ސްޓޭޓާއި، ކަލްކަތާ ސްޓޭޓާއި، ގުރްގާއޯން ސިޓީއާއި، ރިޝިކޭޝްއާއި، ނިއު ދިއްލީއާއި، ވެއްލޫރު ސިޓީއާއި، ޗެންނާއި ސިޓީއާއި، ޓްރިވެންޑްރަމް ސިޓީއާއި، ކޮޗިން ސިޓީއިން މީހުން ގެނައުމުގެ މަސައްކަތްތައް ފޮރިން މިނިސްޓްރީން ދަނީ ކުރަމުންނެވެ.
