ޑަބްލިއުއެޗްއޯއިން 5000 ޓެސްޓް ކިޓް ހަދިޔާކޮށްފި، މިއަދުގެ ވަގުތެއްގައި ލިބޭނެ
10 މެއި 2020 | އާދީއްތަ 22:12ދުނިޔޭގެ ސިއްހަތު ޖަމިއްޔާއިން ހަދިޔާކުރަނީ ޕީސީއާރް ޓެސްޓް ކިޓު ތަކެއް
ކޮވިޑް-19 އަށް ޓެސްޓްކުރުމަށް ލެބޯޓްރީގައި މަސައްކަތް ކުރަނީ
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ފަރާތުން 5000 ޓެސްޓް ކިޓް ހަދިޔާކޮށްފައި ވާކަމަށާއި، ހޯމަ ދުވަހު ލިބޭނެކަމަށް ސަރުކާރުން ހާމަކޮށްފި އެވެ.
އާދިއްތަ ދުވަހުގެ ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާން މަބްރޫކް އަޒީޒް ވިދާޅުވީ، ޑަބްލިއުއެޗްއޯ 5000 ޓެސްޓް ކިޓް ހޯމަ ދުވަހު ލިބޭނެކަމަށް މަބްރޫކް ވަނީ ވިދާޅުވެފަ އެވެ. ޑަބްލިޔުއެޗްއޯ އިން ވަނީ މީގެ ކުރިންވެސް، 5000 ޓެސްޓް ކިޓް ހަދިޔާކޮށްފަ އެވެ.
ރާއްޖޭގައި ކޮވިޑް-19 އަށް އައިޖީއެމްއެޗްގައި ހުންނަ ނެޝަނަލް ރެފަރެންސް ލެބޯރަޓަރީގައި ޓެސްޓުކުރާއިރު ކޮވިޑް-19 އަށް ދެ ބާވަތެއްގެ ޓެސްޓެއް ކުރެވެ އެވެ. އެއީ ސްކްރީނިންގ ޓެސްޓުގެ އިތުރުން ޖެނެޓިކް ޓެސްޓެވެ.
އަވަހަށް ނަތީޖާ ލިބޭ، ސްކްރީނިންގ ޓެސްޓުން ބަލަނީ އެއްވެސް ބާވަތެއްގެ ކޮރޯނާވައިރަހެއް ހުރިތޯ އެވެ. މި ޓެސްޓުގެ ނަތީޖާ ޕޮޒިޓިވެއްޖެނަމަ، ދެވަނަ އަށް ހައްދާ ޓެސްޓަކީ ސީދާ ކޮވިޑް-19 ހުރިތޯ ބެލުމަށް ހަދާ ޖެނެޓިކް ޓެސްޓް (ޕީސީއާރް ޓެސްޓް) އެވެ. މި ޓެސްޓު ކުރެވިގެންދަނީ ވައިރަސްގެ އާރްއެންއޭ ނުވަތަ ޑީއެންއޭ ހުރިތޯ ބަލާށެވެ. މިއީ ރާއްޖޭގައި ހެދޭ ހަމައެކަނި ކޮވިޑް ސްޕެސިފިކް ޓެސްޓެވެ.
އިތުރު ޕީސީއާރު މެޝިނެއް މި މަހުގެ 17 ވަނަ ދުވަހު ރާއްޖެ ގެނެވޭކަން ވަނީ ހާމަކޮށްފަ އެވެ. އައު މެޝިން އައުމުން، ދުވާލެއްގެ މައްޗަށް 600 އާއި 650 އާ ދެމެދު ޢަދަދެއްގެ ޓެސްޓް ހެދޭނެ ކަމަށް ސަރުކާރުން ވަނީ ބުނެފަ އެވެ.
މިހާރު ދުވާލެއްގެ މައްޗަށް ހެއްދެނީ ގާތްގަނޑަކަށް 400 ޓެސްޓެވެ. ޓެސްޓިންގ ކެޕޭސިޓީގެ މައްސަލައަކީ ކޮވިޑް-19 މުޖުތަމައުގެ ތެރޭގައި ފެތުރިފައިވާ މިންވަރު ދެނެގަތުމަށް ކުރާ މަސައްކަތުގައި ދިމާވާ އެންމެ ބޮޑު ގޮންޖެހުންކަމަށް ޑޮކްޓަރުންގެ ޓީމުން ވަނީ ހާމަކޮށްފަ އެވެ.
