ޑީނަމޯ ޑްރެސްޑެންގެ ސްކޮޑު އެއްކޮށް އައިސޮލޭޝަނަށް

ޖަރުމަންގެ ދެވަނަ ޑިވިޝަނުގައި ވާދަކުރަމުން އަންނަ ޑީނަމޯ ޑްރެސްޑެންގެ ސްކޮޑު އެއްކޮށް އައިސޮލޭޝަނަށް ބަދަލުކޮށްފި އެވެ.

ޑީނަމޯ ޑްރެސްޑެންގެ ސްކޮޑު އެއްކޮށް އައިސޮލޭޝަނަށް ބަދަލުކުރީ އެ ކްލަބުގެ ދެ ކުޅުންތެރިއަކު ނޮވެލް ކޮރޯނާވައިރަސް (ކޮވިޑް-19) އަށް ޕޮޒިޓިވްވުމާ ގުޅިގެންނެވެ. އެ ކްލަބުގެ ހުރިހާ ކުޅުންތެރިންނާއި މުވައްޒަފުން 14 ދުވަހުގެ އައިސޮލޭޝަނުގައި މަޑުކުރަން ޖެހޭއިރު، މިމަހުގެ 16 ވަނަ ދުވަހު ޖަރުމަންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ކުޅުން އަލުން ފެށުމަށް ވަނީ ނިންމާފައެވެ.

ޑީނަމޯ ޑްރެސްޑެން އިން ނެރުނު ބަޔާނެއްގައި ބުނެފައިވަނީ ސްކޮޑު އެއްކޮށް އައިސޮލޭޝަނަށް ބަދަލުކުރުމާ ގުޅިގެން، ދެވަނަ ޑިވިޝަންގައި ކުޅެން ތާވަލުކޮށްފައި ހުރި މެޗުތައް ނުކުޅެވޭނެ ކަމަށެވެ. އަދި މި ދަނޑިވަޅުގައި މުހިންމީ ކުޅުންތެރިންގެ ސިއްހަތު ކަމަށްވެސް ވަނީ ބުނެފައެވެ.

ރިޕޯޓުތައް ބުނާ ގޮތުން ޖަރުމަން ފުޓްބޯލް ލީގުން ދެވަނަ ޑިވިޝަނުގެ ހުރިހާ މެޗެއް ފަސްކުރުމުގެ ބަދަލުގައި، ޑީނަމޯ ޑްރެސްޑެން އިން ކުޅެން ތާވަލުކޮށްފައި ހުރި މެޗުތައް ފަސްކުރުމަށް އަންނަނީ މަޝްވަރާ ކުރަމުންނެވެ.

ޖަރުމަންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ކުޅުން މިމަހުގެ 16 ވަނަ ދުވަހު ފަށަން ނިންމީ ޖަރުމަންގެ ޗާންސެލަރ އެންގެލާ މަރކެލް ލީގުތައް އަލުން ފަށަން ހުއްދަ ދެއްވުމާއި ގުޅިގެންނެވެ.

ޖަރުމަން ލީގުތައް އަލުން ފަށާނީ ސަޕޯޓަރުން ނުވައްދައި މެޗުތައް ކުޅޭ ގޮތަށެވެ.

މީގެ ކުރިން ޖަރުމަންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 އަށް ޓެސްޓުކޮށްފައެވެ. އެފަހަރު ކުރި ޓެސްޓުތަކުން ދެ ޑިވިޝަނުން 10 ކުޅުންތެރިއަކު ވަނީ މި ވައިރަހަށް ޕޮޒިޓިވްވެފައެވެ. އަދި އޭގެ ކުރިން ފުރަތަމަ ޑިވިޝަނުގައި ވާދަކުރަމުން އަންނަ ކޮލޯންގެ ތިން ކުޅުންތެރިއަކުވެސް ވަނީ ކޮވިޑް-19 އަށް ޕޮޒިޓިވްވެފައެވެ.