އެންމެ ފަހުން ޗެލްސީގެ ސްކޮޑުގައި ކޯސްޓާ ހިމަނައިފި
2 ސެޕްޓެމްބަރު 2017 | ހޮނިހިރު 03:45ކޯސްޓާ ހޯދުމަށް ގިނަ ކްލަބްތަކުން އަންނަނީ މަސައްކަތްކުރަމުން
ޗެލްސީ އަށް ކުޅެމުން އަންނަ ޑިއެގޯ ކޯސްޓާ
އެންމެ ފަހުން މި ސީޒަނުގެ ޕްރިމިއާ ލީގަށް ޗެލްސީ ބޭނުން ކުރާ ސްކޮޑުގައި ޑިއެގޯ ކޯސްޓާ ހިމަނައިފި އެވެ.
މި ޓްރާންސްފާ ބާޒާރުގައި ޗެލްސީ ދޫކޮށްލާނެ ކަމަށް ބެލެވޭ ކޯސްޓާ ޗެލްސީ ސްކޯޑުގައި ހިމަނާފައިވާއިރު، މިކަމާ ގުޅިގެން ކްލަބުން ވެސް އަދި ކޯސްޓާ ވެސް އެއްޗެކޭ ބުނެފައެއް ނުވެއެވެ.
ކޯސްޓާ ޗެލްސީ ދޫކޮށް އެހެން ކްލަބަކަށް ބަދަލުވާން ޓްރާންސްފާ ބާޒާރުގައި ވަނީ މަސައްކަތް ކޮށްފައެވެ. އޭނާ އެ ކްލަބް ދޫކޮށްލަން މަސައްކަތް ކުރީ ޗެލްސީގެ ކޯޗު އެންޓޯނިއޯ ކޮންޓޭގެ ގޭމް ޕްލޭނަށް އޭނާ ފިޓް ނުވާ ކަމަށް ބުނުމުންނެވެ.
އެގޮތުން ރިޕޯޓްތައް ބުނާގޮތުގައި ކޮންޓޭ ވަނީ މިދިޔަ ޖެނުއަރީ ޓްރާންސްފާ އިން ފެށިގެން ކޯސްޓާ ވިއްކާލުމަށް ކްލަބުގެ ބޯޑަށް އަންގާފައެވެ. އެހެންނަމަވެސް އެކަން އަދިވެސް އެގޮތަށް ހިނގާފައެއްނުވެއެވެ.
ޗެލްސީން ކުރިޔަށް ގެންދާ ފަރިތަކުރުންތަކުގައި ކޯސްޓާ ބައިވެރިނުވާއިރު، އޭނާ ހޯދުމަށް ގިނަ ކްލަބްތަކުން އަންނަނީ މަސައްކަތްކުރަމުންނެވެ. އެގޮތުން އޭނާ ވަނީ އޭސީ މިލާނާއެކުވެސް ޓްރާންސްފާއާ ބެހޭގޮތުން މަޝްވަރާކޮށްފައި ކަމަށް ރިޕޯޓްތައް ބުނެއެވެ.
އެޓްލެޓިކޯ މެޑްރިޑް ދޫކޮށްލުމަށް ފަހު 2014 ވަނަ އަހަރު ޗެލްސީއާ ގުޅުނު ކޯސްޓާ ވަނީ މިވީތަނަށް އެޓީމަށް ކުޅުނު 119 މެޗުގައި 58 ލަނޑު ކާމިޔާބުކޮށް، އެޓީމާއެކު ޕްރިމިއާ ލީގު ދެފަހަރު އަދި ލީގް ކަޕް އެއްފަހަރު ކާމިޔާބު ކޮށްފައެވެ.
