އޭސީ މިލާނުގެ ހުރިހާ ކުޅުންތެރިން ކޮރޯނާވައިރަހަށް ނެގެޓިވް

ކޮރޯނާވައިރަސް (ކޮވިޑް-19) އަށް އޭސީ މިލާނުގެ ހުރިހާ ކުޅުންތެރިން ނެގެޓިވްވެފައިވާ ކަމަށް އެ ކްލަބުން ބުނެފި އެވެ.

މީގެ ކުރިން ކޮވިޑް-19 އަށް އޭސީ މިލާނުގެ ޓެކްނިކަލް ޑިރެކްޓަރު ޕައޮލޯ މަލްޑިނީ އާއި އޭނާގެ ދަރިފުޅު އުމުރުން 18 އަހަރުގެ ޑެނިއަލް މަލްޑިނީ ވަނީ ޕޮޒިޓިވް ވެފައެވެ. އެކަމަކު ދެބަފައިން މިހާރު ވަނީ ވައިރަހުން ރަނގަޅުވެފައެވެ.

ދާދި ފަހުން އޭސީ މިލާނުގެ ރައީސް ޕައޮލޯ ސްކަރޯނީ ވަނީ މަލްޑިނީގެ ދެ ބަފައިން މީގެ ކުރިން ކޮވިޑް-19 އަށް ޕޮޒިޓިވްވުމުން، އެކަމުގެ އަސަރު އެޓީމުގެ ބައެއް ކުޅުންތެރިންގެ ފަރާތުން ފެންނަ ކަމަށް ވިދާޅުވެފައެވެ. އެކަމަކު އޭސީ މިލާނުގެ ހުރިހާ ކުޅުންތެރިންނާއި މުވައްޒަފުން ކޮވިޑް-19 އަށް ޓެސްޓު ކުރިއިރު، އެންމެން ވަނީ ވައިރަހަށް ނެގެޓިވްވެފައެވެ.

އިޓާލިއަން ލީގު އަލުން ފަށަން ތައްޔާރުވަމުން އަންނައިރު، މީގެ ކުރިން އޭސީ މިލާނުގެ ކުޅުންތެރިން ވަނީ އެކަނި ތަމްރީނުތަކަށް ނުކުމެފައެވެ.

ރިޕޯޓުތައް ބުނާ ގޮތުން މިމަހުގެ 27 އާއި ޖޫން މަހުގެ 2 އާ ދެމެދު އިޓާލިއަން ލީގުގެ ކުޅުން އަލުން ފަށަން މަސައްކަތް ކުރަމުން އަންނައިރު، މިމަހުގެ 18 ވަނަ ދުވަހުން ފަށައިގެން ކުޅުންތެރިން އެކުގައި ތަމްރީން ކުރުމުގެ ހުއްދަ އިޓަލީގެ ސަރުކާރުން ދޭނެ އެވެ.

އޭސީ މިލާނުގެ ހުރިހާ ކުޅުންތެރިން ކޮވިޑް-19 އަށް ނެގެޓިވްވި ނަމަވެސް، ދާދި ފަހުން ހެދި ޓެސްޓު ތަކުން ސަމްޕްޑޯރިއާގެ ހަތަރު ކުޅުންތެރިއަކާއި ޓޮރީނޯގެ ކުޅުންތެރިއެއްގެ އިތުރުން ފިއޮރެންޓީނާގެ ތިން ކުޅުންތެރިއަކު ވަނީ މި ވައިރަހަށް ޕޮޒިޓިވްވެފައެވެ.