މާލޭގައި ތާށިވި މީހުން މީގެފަަހުން ކަރަންޓީން ކުރާނީ "ޓްރާންސިޓް" ފެސިލިޓީ ތަކުގަ: މަބްރޫކް

ރަށްރަށުން ކުރު މުއްދަތަށް މާލެ އައިސް މާލޭގައި ތާށިވެފައި ތިބި މީހުން، އެބައެއްގެ ރަށުގައި ކަރަންޓީން މުއްދަތު ފުރިހަމަ ކުރެވޭގޮތަށް އިންތިޒާމު ކުރުމަށް ކުރިން ނިންމި ނިންމުން ބަދަލު ކޮށްފައިވާ ކަމަށް ސަރުކާރުން ހާމަކޮށްފިއެވެ.

ހޮނިހިރު ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވީ، ރަށްރަށުން މާލެ އައިސް ތިބި މީހުން އަނބުރާ ފޮނުވާލުމުގައި ސަރުކާރުން ގެންގުޅޭ ސިޔާސަތަށް އަނެއްކާވެސް ބަދަލު ގެެނެސްފައިވާ ކަމަށެވެ. މަބްރޫކު ވިދާޅުވީ، ރަށްރަށުގެ ކަރަންޓީން ފެސިލިޓީތަކަށް މީހުން ގެންދިއުން އެއާއެކު މަޑުޖައްސާލާފައިވާ ކަމަށެވެ.

އެގޮތުން އިތުރު ގޮތެއް ނިންމަންދެން ކުރިއަށް އޮތް ދުވަސްތަކުގައި ބޭނުންކުރާނީ ހަމައެކަނި "ޓްރާންސިޓް" ކަރަންޓީން ފެސިލިޓީތައް ކަމަށެވެ. އަދި މިހާރު ޓްރާންސިޓް ކަރަންޓީން ފެސިލިޓީތަކަށް ނަގާފަހުރި ރިސޯޓުތަކުގެ ޖާގަހުރި ވަރަކުން އެތަންތަނަށް ގެންގޮސް 14 ދުވަހުގެ ކަރަންޓީން މުއްދަތު ފުރިހަމަ ކުރުމަށްފަހު، ޓެސްޓު ހެދުމަށްފަހު މެނުވީ އަނބުރާ ރަށަށް ނުފޮނުވާނެކަމަށް މަބްރޫކް ވިދާޅުވިއެވެ.

މިހާރު އޮތް ޙާލަތުގައި ޚާއްޞަ ހުއްދައެއް ނެތި ރަށްރަށަށް ދަތުރެއް ނުކުރެވެއެވެ. އެއީ މިހާރުގެ ޙާލަތުން ބަލި އެހެން ރަށަކަށް ފެތުރުނަ ނުދިނުމަށް އެޅި ފިޔަވަޅެއްކަން މަބްރޫކު ފާހަގަ ކުރެއްވިއެވެ. ސަރުކާރުން މިގެނައި ބަދަލާއި ގުޅިގެން މާލޭގައި ތާށިވެފައިވާ ރަށްރަށުގެ ގިނަ ބަޔަކު ދަނީ ކަންބޮޑުވާކަން ފާޅުކުރަމުންނެވެ.