އިންޓަރނެޓަކީ އަސާސީ ހިދުމަތެއްގެ ގޮތުގައި ކަނޑައަޅަންޖެހޭ: މިނިސްޓަރ މަލީހް

ރާއްޖޭގައި ދެމުންދާ އިންޓަރނެޓްގެ ޚިދުމަތް އަގު ހެޔޮކުރުމަށްޓަކައި އިންޓަރނެޓަކީ ޢަސާސީ ޚިދުމަތެއްގެ ގޮތުގައި ކަނޑައެޅުން ވަރަށް މުހިންމު ކަމަށް ކޮމިއުނިކޭޝަން، ސައިންސް އެންޑް ޓެކްނޮލޮޖީ މިނިސްޓަރު މުޙައްމަދު މަލީހު ޖަމާލު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރަކައިގެ ކޮމެޓީން މިއަދު ބޭއްވި ބައްދަލުވުމުގައި ރާއްޖޭގައި ދެމުންދާ އިންޓަރނެޓްގެ ސްޕީޑާއި އަދި ނަގަމުންދާ އަގާ ގުޅޭގޮތުން ހޯރަފުށި ދާއިރާގެ މެންބަރު އަޙްމަދު ސަލީމް ކުރެއްވި ސުވާލަށް ޖަވާބު ދެއްވަމުން މިނިސްޓަރު މަލީހު ވިދާޅުވީ، ރާއްޖޭގައި ދެމުންދާ އިންޓަރނެޓްގެ ސްޕީޑާއި އަދި ނަގަމުންދާ އަގުތަކާމެދު ދިވެހި ރައްޔިތުންގެ އޮތް ކަންބޮޑުވުން ފާހަގަކުރެއްވޭ ކަަށެވެ. އަދި މިނިސްޓަރ މަލީހު ވިދާޅުވީ އިންޓަރނެޓް ގެ ސްޕީޑް މާބޮޑުތަނުންވެސް ރަނގަޅުވާން ޖެހޭ ކަމާއި އަދި އަގަށް ވެސް އެކަށީގެންވާ ރަނގަޅު ބަދަލުތަކެއް އަންނަންޖެހޭ ކަމަށެވެ.

Advertisement

މީގެއިތުރުން މަލީހު ވިދާޅުވީ، ރާއްޖޭގެ ހުރިހާ ރަށެއްގައި މޮބައިލް ފޯނުގެ ރޭންޖް ދިއުމުގެ މައްސަލަތައް ޙައްލުކޮށް، އިންޓަރނެޓްގެ ޚިދުމަތް ފޯރުކޮށްދިނުމުގައި މިހާރަށް ވުރެ މާބޮޑަށް ފުޅާވާންޖެހޭ ކަމަށް ޤަބޫލު ކުރައްވާ ކަމަށެވެ.

ކޮމެޓީގެ މިބައްދަލުވުމުގައި މަލީހު ވަނީ އިންޓަރނެޓަކީ ޢަސާސީ ޚިދުމަތެއްގެ ގޮތުގައި ޤާނޫނަކުން ކަނޑައެޅުމުގެ މުހިންމުކަން ފާހަގަ ކުރައްވާފަ އެވެ. އަދި މިއީ އިންޓަނެޓް ޢަސާސީ ޚިދުމަތެއްގެ ގޮތުގައި ކަނޑައަޅަންވީ ވަގުތު ކަމަށާއި އެކަން ކުރުމަށް ޤާނޫނަށް ގެންނަންޖެހޭ ބަދަލުތައް ގެނައުމަކީ ސަރުކާރު ކޯލިޝަނުން ފައްޓަންޖެހިފައިވާ މަސައްކަތެއް ވެސް މަލީހު ވިދާޅުވި އެވެ.

މަލީހު ވިދާޅުވީ، ކޮވިޑް-19 އާ ގުޅިގެން ދުނިޔެ ޤަބޫލުކުރާ ވައްޓަފާޅިއާ ދިމާލަށް މިޞްރާބު ޖަހާއިރު، އިންޓަރނެޓްގެ ޚިދުމަތާއި މޮބައިލް ޚިދުމަތުގެ ފެންވަރަށާއި އަގަށް ރަނގަޅު ބަދަލެއް ގެނެވޭނީ ޢަސާސީ ޚިދުމަތެއްގެ ގޮތުގައި ކަނޑައެޅިގެންކަމަށް ވިދާޅުވެ، މިނިސްޓަރު މަލީހު ވަނީ އެވާހަކަފުޅު ތަކުރާރުކޮށް ކޮމެޓީގައި ވިދާޅުވެފަ އެވެ.

މީގެއިތުރުން، މަލީހު ވިދާޅުވީ ރާއްޖޭގެ މުވާޞަލާތީ ޚިދުމަތުގެ ވާދަވެރިކަން އިތުރުކުރުމަށްޓަކައި ސަރުކާރުން ކުރަންޖެހޭ މަސައްކަތްތައް ކުރާނެ ކަމަށެވެ. އަދި އެއީ މޮބައިލް އަދި އިންޓަރނެޓް ޚިދުމަތް ފޯރުކޮށްދޭނެ އިތުރު ކުންފުނިތަކެއް ގެނެސްގެންވިޔަސް، އެކަމުގެ ސިޔާސަތުތައް އެކުލަވާލަން ތައްޔާރަށް ހުންނެވިކަމަށް މަލީހު ވިދާޅުވި އެވެ.

މަލީހު ވިދާޅުވީ، ކޮވިޑް-19 އާ ގުޅިގެން މެލޭޝިއާގައި ހިލޭ އިންޓަރނެޓް ފޯރުކޮށްދިން ވާހަކަ ރައްޔިތުންގެ ތެރޭގައި ފެތުރުނުއިރު، ހަގީގަތަކީ މެލޭޝިއާގެ ބޮޑެތި ޓެލެކޮމް ކުންފުނިތަކަށް މެލޭޝިއާގެ ސަރުކާރުން ފޯރުކޮށްދިން އެއް ބިލިއަން ރިންގިޓްގެ ސަބްސިޑީ ޕެކޭޖެއް ދަށުން ދެމުންދިޔަ ހިދްމަތެއް ކަމަށެވެ.

ނަމަވެސް މަލީހު ވިދާޅުވީ، ކޮވިޑް-19 އާ ގުޅިގެން ރާއްޖޭގައި އިންޓަރނެޓް ޚިދުމަތްދޭ ކުންފުނިތަކުން ދިން ލުއިތަކާއި ދިން އެހީތެރިކަމަކީ ސަރުކާރުގެ އެއްވެސް އެހީތެރިކަމަކާނުލައި އަދި ސަރުކާރުން އެންމެ ލޯލާރިއެއްގެ އެހީތެރިކަންވެސް ނުލިބި ފޯރުކޮށްދިން އެހީތެރިކަމެއް ކަމަށެވެ. މިކަން ފާހަގަ ކުރެއްވީ ކޮންމެހެން އެކުންފުނިތަކުގެ ދިފާޢުގަ ނޫން ކަމަށްވެސް މިނިސްޓަރ މަލީހު ވިދާޅުވި އެވެ.