ހުޅުމާލޭގައި ބިދޭސީންނަށް ހަމަލާ ދިން މީހުން ދޫކޮށްލައިފި
9 މެއި 2020 | ހޮނިހިރު 19:17ހަމަލާދިން މީހުންނަކީ ހަރުކަށި ފިކުރުގެ ބައެއް
ހުޅުމާލޭގައި ހަމަލާދިން ކަމަށް ޝައްކު ކުރެވޭ މީހަކު އުޅޭ ގެއެއް ބަލާ ފާސްކުރުމުގެ ތެރެއިން
ހުޅުމާލޭގައި ތިން ބިދޭސީންނަށް ވަޅިން ހަމަލާދިން މައްސަލާގައި ބަންދުކުރި މީހުން ދޫކޮށްލައިފިއެވެ.
އެ ތިން މީހުންނަށް ހަމަލާދީފައިވަނީ ފެބްރުއަރީ މަހުގެ ހަތަރު ވަނަ ދުވަހުއެވެ. ހަމަލާ އާއި ގުޅިގެން ހަ މީހަކު ވަނީ ހައްޔަރުކޮށްފައެވެ.
ފުލުހުން ބުނީ، ބިދޭސީންނަށް ހަމަލާދިން މީހުންގެ ތަހުގީގު ފުރިހަމަ ކުރުމަށް ފަހު ދައުވާ ކުރުމަށް ގާނޫނުގައި ބުނާ މުއްދަތުގެ ތެރޭގައި ފުލުހުން ޕީޖީ އޮފީހަށް ހުށައަޅާފައިވާ ކަމަށެވެ.
ފުލުހުން ބުނީ، އެ މައްސަލާގައި ތަހުގީގަށް ހޯދާފައިވާ ހެއްކާއި ގަރީނާ ތަކުގެ މައްޗަށް ދައުވާ ކުރެވެން ނެތް ކަމަށް ނިންމުމާއި ގުޅިގެން މި މައްސަލާގައި ބަންދު ކޮށްފައިވާ މީހުން ވަނީ ބަންދުން ދޫކުރެވިފައި ކަމަށެވެ. އަދި މައްސަލައާއި ގުޅިގެން އިތުރަށް އަޅަން ޖެހޭ ފިޔަވަޅުތައް އަޅަމުންދާ ކަމަށް ފުލުހުން ބުންޏެވެ.
މީގެ ކުރިން ފުލުހުން ހާމަކޮށްފައިވާ ގޮތުން ބިދޭސީންނަށް އަމާޒުކޮށް ދިން ހަމަލާއަކީ ދީނީ ހަރުކަށި ބަޔަކު ދިން ހަމަލާއެއް ކަމަށެވެ. ފުލުހުން ވަނީ އެ ހަމަލާއަކީ ޓެރަރިޒަމް ހަމަލާއެއް ގޮތުގައި ސިފަކޮށްފައެވެ.
