އައިޖީއެމްއެޗުން ފަރުވާދެމުން އައި ކޮވިޑް-19ގެ ފަސް ބަލިމީހުން ޓްރީޓޮޕަށް ބަދަލުކޮށްފި
މުވައްޒަފުންގެ މުސާރަ އާއި އެހެނިހެން ޚަރަދުގެ ގޮތުގައި މަހެއްގެ މައްޗަށް 20 މިލިޔަން ރުފިޔާ ޚަރަދުވޭ
ޓްރީޓޮޕް ހޮސްޕިޓަލް: ހުޅުމާލޭގައި ހުންނަ މިހޮސްޕިޓަލަކީ ރާއްޖޭގައި އެންމެ މަތީ ފެންވަރުގެ ސިއްހީ ހިދްމަތް ފޯރުކޮށްދޭ، ޕްރައިވެޓް ކުންފުންޏަކުން ހިންގާ ހޮސްޕިޓަލެއް
ކޮވިޑް-19 އަށް ޕޮޒިޓިވްގެ، ދަރުމަވަންތަ ހޮސްޕިޓަލުގައި ފަރުވާ ދެމުންދިޔަ 5 މީހުން ހުޅުމާލޭގައި ހުންނަ ޓްރީޓޮޕް ހޮސްޕިޓަލަށް ބަދަލުކޮށް ފަރުވާ ދޭން ފަށައިފިއެވެ.
ނޭޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ)ގައި ހޮނިހިރު ދުވަހު، އައިޖީއެމްއެޗާއި ޓްރީޓޮޕް ގުޅިގެން ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗްގެ ސީއީއޯ އިބްރާހީމް ސަލީމް ވިދާޅުވީ ސަރުކާރާއެކު ވެފައިވާ އެއްބަސްވުމުގެ ދަށުން ޓްރީޓޮޕް ހޮސްޕިޓަލް ކޮވިޑް-19 އަށް ފަރުވާދޭ ހޮސްޕިޓަލެއްގެ ގޮތުގައި އެ ހޮސްޕިޓަލް އޮޕަރޭޝަނަށް ގެނެވިފައިވާކަމަށެވެ.
މިމަހު އެއްވަނަ ދުވަހު ދުވަހުގެ ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ކޮވިޑް-19 ގެ ޓަސްކްފޯސްގެ ތަރުޖަމާނު މަބްރޫކް އަޒީޒު ވެސް ވަނީ، ރާއްޖޭގެ ޙާލަތު މިހާރު މިވަނީ ޓްރީޓޮޕް ހޮސްޕިޓަލް "އެކްޓިވޭޓް" ކުރަންޖެހޭ ހާލަތުގައި ކަމަށް ވިދާޅުވެފަ އެވެ.
ޓްރީޓޮޕް ކޮވިޑް-19 ގެ ބަލި މީހުންނަށް ފަރުވާ ދޭ ހޮސްޕިޓަލަކަށް ބަދަލުކުރިއިރު، އެ ހޮސްޕިޓަލުގައި ފަރުވާ ދެމުންދާ ފަރާތްތައް އެހެންތަނަކަށް ބަދަލު ކުރަންޖެހޭ ކަމަށެވެ. އެގޮތުން އެތަން އައިޖީއެމްއެޗު ތެރޭގައި ހަދައިދޭ ގޮތަށް ނިންމާފައިވާ ކަމަށްވެސް މަބްރޫކު މީގެކުރިން ވަނީ ވިދާޅުވެފައެވެ.
ކޮވިޑް-19އަށް ފަރުވާދޭ ހޮސްޕިޓަލެއްގެ ގޮތުގައި ޓްރީޓޮޕް ހޮސްޕިޓަލް ބޭނުން ކުރުމަށް ސަރުކާރާއި ޙަވާލުކޮށްފައި ވީނަމަވެސް މުވައްޒަފުންނަށް މުސާރައާއި އެލަވަންސްތައް ދިނުމާއި ހޮސްޕިޓަލް ހިންގުމުގެ ޚަރަދުތައް ކުރަމުން ދާނީ، ޓްރީޓޮޕް ހެލްތު ޕްރައިވެޓް ލިމިޓެޑުންކަމުގައި އެކުންފުނިން ބުނެފައިވެއެވެ.
އެކުންފުނިން ހާމަކޮށްފައިވާ ގޮތުގައި މުވައްޒަފުންގެ މުސާރައާއި އެހެނިހެން ޚަރަދުގެ ގޮތުގައި މަހެއްގެ މައްޗަށް 20 މިލިޔަން ރުފިޔާ ޚަރަދުވެއެވެ. އެޚަރަދުތައް ކުރާނީ ޓްރީޓޮޕް ހެލްތު ޕްރައިވެޓް ލިމިޓެޑުން ކަމަށް އެކުންފުނި ބުނެއެވެ.
ޓްރީޓޮޕް ހޮސްޕިޓަލަކީ، 2018 ވަނަ އަހަރުގެ މާރޗު މަހު ހުޅުގައި ޚިދުމަތްދޭން ފެށި ހޮސްޕިޓަލެކެވެ. ޓްރީޓޮޕް ހޮސްޕިޓަލަކީ ރާއްޖޭގެ ޓޫރިޒަމް ދާއިރާގެ މަޝްހޫރު ވިޔަފާރި ކުންފުނި ތަކެއްކަމަށްވާ، ކްރައުން ކޮމްޕެނީ ޕްރައިވެޓް ލިމިޓެޑާއި، ޗާންޕާ ބްރަދާސް ޕްރައިވެޓް ލިމިޓެޑާއި، ކުރެއްދޫ ހޯލްޑިންސް ޕްރައިވެޓް ލިމިޓެޑާއި، އަދި ކާސާ ހޯލްޑިންގސް ޕްރައިވެޓް ލިމިޓެޑްގެ ހިއްސާ އޮންނަ ހޮސްޕިޓަލެކެވެ.
ޓްރީޓޮޕް ހޮސްޕިޓަލް ބޭނުންކުރާނީ 200 އެނދުގެ އައިސީޔޫ ފެސިލިޓީއެއްގެ ގޮތުގައެވެ.
